ബംഗ്ലാദേശിനെതിരായ ഏകദിന പരമ്പരയിലെ ദയനീയ പരാജയത്തിന് പിന്നാലെ പാകിസ്ഥാൻ ക്രിക്കറ്റ് ടീമിനും മാനേജ്മെന്റിനുമെതിരെ രൂക്ഷവിമർശനവുമായി മുൻ താരം കമ്രാൻ അക്മൽ രംഗത്തെത്തി. പാകിസ്ഥാൻ ക്രിക്കറ്റ് ഇപ്പോൾ ഒരു ‘കോമഡി ഷോ’ ആയി മാറിയിരിക്കുകയാണെന്ന് അദ്ദേഹം പരിഹസിച്ചു.
“സാധാരണ ഉഭയകക്ഷി പരമ്പരകൾ പോലും ജയിക്കാൻ കഴിയാത്തവർ എങ്ങനെയാണ് ഐസിസി ട്രോഫി നേടാൻ സ്വപ്നം കാണുന്നത്? നിങ്ങൾ ട്രോഫി മോഷ്ടിച്ച് കൊണ്ടുവരാൻ പോവുകയാണോ?” എന്ന് അക്മൽ ചോദിച്ചു. ഇത് പിസിബി ചെയർമാൻ മൊഹ്സിൻ നഖ്വിയെ ലക്ഷ്യം വെച്ചുള്ളതാണെന്നാണ് സോഷ്യൽ മീഡിയയിലെ സംസാരം. കഴിഞ്ഞ വർഷം ദുബായിൽ നടന്ന ഏഷ്യാ കപ്പിൽ ഇന്ത്യ ട്രോഫി സ്വീകരിക്കാൻ വിസമ്മതിച്ചപ്പോൾ നഖ്വി അത് എടുത്തു കൊണ്ടുപോയ സംഭവം ‘ട്രോഫി ചോർ’ (ട്രോഫി കള്ളൻ) എന്ന പേരിൽ വലിയ ട്രോളുകൾക്ക് വഴിവെച്ചിരുന്നു.
പാകിസ്ഥാൻ ടീമിന്റെ പ്രകടനം വിശകലനം ചെയ്യുന്നതിൽ അർത്ഥമില്ലെന്നും, ഇതൊരു കോമഡി ഷോ ആയി കണ്ട് ആസ്വദിക്കുകയാണ് വേണ്ടതെന്നും അദ്ദേഹം പരിഹസിച്ചു. ആഭ്യന്തര ക്രിക്കറ്റിൽ 1000 റൺസ് പോലും തികയ്ക്കാത്ത ഷാമിൽ ഹുസൈൻ, ഗാസി ഘോരി തുടങ്ങിയ താരങ്ങളെ ദേശീയ ടീമിൽ ഉൾപ്പെടുത്തിയതിനെ അദ്ദേഹം ചോദ്യം ചെയ്തു. മതിയായ പരിചയസമ്പത്തില്ലാത്ത താരങ്ങളെ അന്താരാഷ്ട്ര തലത്തിൽ കളിപ്പിക്കുന്നത് ടീമിനെ തകർക്കുമെന്നും അദ്ദേഹം കൂട്ടിച്ചേർത്തു.
