രാജ്യത്തെ കോടിക്കണക്കിന് വരുന്ന ജനങ്ങൾക്ക് സർക്കാർ സേവനങ്ങൾ കൂടുതൽ വേഗത്തിലും സുതാര്യമായും ലഭ്യമാക്കുന്നതിന്റെ ഭാഗമായി സ്മാർട്ട്ഫോണുകളിൽ വിപ്ലവകരമായ മാറ്റത്തിനൊരുങ്ങി കേന്ദ്ര സർക്കാർ. പുതിയതായി വിപണിയിലെത്തുന്ന എല്ലാ സ്മാർട്ട്ഫോണുകളിലും ആധാർ ആപ്പ് (mAadhaar) മുൻകൂട്ടി ഇൻസ്റ്റാൾ ചെയ്യണമെന്ന (Pre-install) നിർദ്ദേശമാണ് കേന്ദ്രം മുന്നോട്ടുവെച്ചിരിക്കുന്നത്. പൗരന്മാരുടെ ഡിജിറ്റൽ ശാക്തീകരണം ലക്ഷ്യമിട്ടുള്ള മോദി സർക്കാരിന്റെ ഈ നിർണ്ണായക നീക്കത്തിനെതിരെ ആപ്പിൾ, സാംസങ് ഉൾപ്പെടെയുള്ള ചില വിദേശ കമ്പനികൾ രംഗത്തെത്തിയിട്ടുണ്ടെങ്കിലും, രാജ്യത്തിന്റെ ഡിജിറ്റൽ പരമാധികാരവും ജനങ്ങളുടെ സൗകര്യവും മുൻനിർത്തി പദ്ധതിയുമായി മുന്നോട്ട് പോകാനാണ് അധികൃതരുടെ തീരുമാനം. 1.34 ബില്യൺ ജനങ്ങൾ അംഗങ്ങളായ ലോകത്തിലെ ഏറ്റവും വലിയ ബയോമെട്രിക് ഐഡന്റിറ്റി പ്രോഗ്രാമിനെ ഓരോ ഭാരതീയന്റെയും കൈകളിലേക്ക് നേരിട്ടെത്തിക്കുകയാണ് ഇതിലൂടെ ലക്ഷ്യമിടുന്നത്.
ഫോണുകളിൽ സാധാരണയായി കാണുന്ന ക്ലോക്ക്, കാൽക്കുലേറ്റർ തുടങ്ങിയ ആപ്പുകൾ പോലെ ആധാർ സേവനങ്ങളും പൗരന്മാർക്ക് ലഭ്യമാക്കാനാണ് യുഐഡിഎഐ (UIDAI) ഐടി മന്ത്രാലയത്തോട് ശുപാർശ ചെയ്തത്. നിലവിൽ സർക്കാർ സേവനങ്ങൾക്കായി ഓരോരുത്തരും ആപ്പുകൾ പ്രത്യേകം ഡൗൺലോഡ് ചെയ്യേണ്ടി വരുന്നത് സാധാരണക്കാരായ ജനങ്ങൾക്ക് പലപ്പോഴും ബുദ്ധിമുട്ടുണ്ടാക്കാറുണ്ട്. ഇത് ഒഴിവാക്കി സ്മാർട്ട്ഫോൺ വാങ്ങുമ്പോൾ തന്നെ സുരക്ഷിതമായ ആധാർ സേവനങ്ങൾ ലഭ്യമാക്കുന്നത് ഡിജിറ്റൽ ഇടപാടുകളിൽ വലിയ സുതാര്യത കൊണ്ടുവരും. അഴിമതി രഹിതവും വേഗതയേറിയതുമായ ഭരണം ഉറപ്പാക്കാൻ ഈ നീക്കം അത്യാവശ്യമാണെന്നാണ് സർക്കാർ വൃത്തങ്ങൾ നൽകുന്ന സൂചന. നേരത്തെ മൊബൈൽ ഫോൺ സുരക്ഷയ്ക്കായി ‘സഞ്ചാർ സാത്തി’ ആപ്പ് ഉൾപ്പെടുത്താനുള്ള നിർദ്ദേശവും സമാനമായ രീതിയിൽ വിദേശ കമ്പനികൾ തടയാൻ ശ്രമിച്ചിരുന്നു.
സ്വകാര്യതയുടെയും സുരക്ഷയുടെയും പേര് പറഞ്ഞാണ് ആപ്പിളും സാംസങ്ങും ഈ നീക്കത്തെ എതിർക്കുന്നതെങ്കിലും, ഭാരതത്തിന്റെ ആഭ്യന്തര സുരക്ഷയും പൗരന്മാരുടെ ക്ഷേമവും മുൻനിർത്തിയുള്ള നിയമങ്ങൾ പാലിക്കാൻ ഇത്തരം കമ്പനികൾ ബാധ്യസ്ഥരാണെന്ന് വിദഗ്ധർ ചൂണ്ടിക്കാട്ടുന്നു. ഡിജിറ്റൽ ഇന്ത്യ പദ്ധതിയുടെ ഭാഗമായി എല്ലാ സർക്കാർ സേവനങ്ങളും ഓൺലൈനായി ലഭ്യമാക്കുന്ന കാലഘട്ടത്തിൽ, ആധാർ ആപ്പ് ഫോണുകളിൽ നിർബന്ധമാക്കുന്നത് ജനങ്ങളുടെ ‘ഈസ് ഓഫ് ലിവിംഗ്’ (Ease of Living) മെച്ചപ്പെടുത്തും. രാജ്യത്തെ സാങ്കേതിക മേഖലയിൽ വിദേശ കമ്പനികളുടെ ആധിപത്യത്തിന് പകരം ഭാരതീയമായ സംവിധാനങ്ങൾക്ക് മുൻഗണന നൽകാനുള്ള സർക്കാരിന്റെ ദീർഘവീക്ഷണമാണ് ഈ നീക്കത്തിന് പിന്നിലുള്ളത്. സ്മാർട്ട്ഫോൺ നിർമ്മാതാക്കളുടെ സംഘടനയുമായി (MAIT) ഐടി മന്ത്രാലയം വരും ദിവസങ്ങളിൽ കൂടുതൽ ചർച്ചകൾ നടത്തി പദ്ധതി വേഗത്തിൽ നടപ്പിലാക്കാനാണ് ഒരുങ്ങുന്നത്.
