ന്യൂഡൽഹി; മുതിർന്ന കോൺഗ്രസ് നേതാവും രാജ്യസഭാ എംപിയുമായ സോണിയ ഗാന്ധിയെ ആശുപത്രിയിൽ പ്രവേശിപ്പിച്ചു. ചൊവ്വാഴ്ച രാത്രിയോടെയാണ് ആരോഗ്യപ്രശ്നങ്ങളെ തുടർന്ന് ഡൽഹിയിലെ സർ ഗംഗാറാം ആശുപത്രിയിൽ സോണിയയെ പ്രവേശിപ്പിച്ചത് . നിലവിൽ ഡോക്ടർമാരുടെ നിരീക്ഷണത്തിലാണ് . ആരോഗ്യനില തൃപ്തികരമാണെന്ന് ആശുപത്രി വൃത്തങ്ങൾ അറിയിച്ചു.
ശ്വാസതടസ്സത്തെത്തുടർന്നാണ് അവരെ ആശുപത്രിയിൽ പ്രവേശിപ്പിച്ചത്. ഡൽഹിയിലെ തണുപ്പും വായുമലിനീകരണവും കാരണം അവരുടെ ബ്രോങ്കിയൽ ആസ്ത്മ വർദ്ധിച്ചതാണ് അസ്വസ്ഥതയ്ക്ക് കാരണമായതെന്ന് ഡോക്ടർമാർ അറിയിച്ചു. ആൻറിബയോട്ടിക്കുകളും മറ്റ് അനുബന്ധ മരുന്നുകളും നൽകി വരുന്നു. മുൻകരുതൽ എന്ന നിലയിലാണ് അവരെ അഡ്മിറ്റ് ചെയ്തത്.
ഇക്കഴിഞ്ഞ ജനുവരിയിലും സമാനമായ ആരോഗ്യപ്രശ്നങ്ങളാൽ അവരെ ഇതേ ആശുപത്രിയിൽ പ്രവേശിപ്പിച്ചിരുന്നു. പരിശോധനകൾക്ക് ശേഷം ആരോഗ്യനില പൂർണ്ണമായി തൃപ്തികരമായാൽ ഉടൻ തന്നെ അവരെ ഡിസ്ചാർജ് ചെയ്യുമെന്നും ആശുപത്രി അധികൃതർ വ്യക്തമാക്കി
