ഇന്ത്യൻ ടീമിലെ സഞ്ജു സാംസണിന്റെ സാന്നിധ്യത്തെയും യുവതാരം വൈഭവ് സൂർയവംശിക്ക് അവസരങ്ങൾ ലഭിക്കാത്തതിനെയും രൂക്ഷമായി വിമർശിച്ച് മുൻ ഇന്ത്യൻ ക്യാപ്റ്റനും വെറ്ററൻ കൃഷ്ണമാചാരി ശ്രീകാന്ത്. സഞ്ജു സാംസൺ ഇന്ത്യയ്ക്ക് ലോകകപ്പ് നേടിത്തന്നത് ശരിയാണെന്നും എല്ലാവർക്കും അത് അറിയാവുന്ന കാര്യമാണെന്നും, എന്നാൽ അതിന് ശേഷം അദ്ദേഹത്തിന്റെ പ്രകടനം തികച്ചും സാധാരണ നിലവാരത്തിലുള്ളതാണെന്നും ശ്രീകാന്ത് പറഞ്ഞു.
ഭൂതകാലത്തിലെ നേട്ടങ്ങളെ മാത്രം പിൻപറ്റി അധികകാലം നിലനിൽക്കാൻ കഴിയില്ലെന്ന് ഓർമ്മിപ്പിച്ച അദ്ദേഹം, സഞ്ജുവിന്റെ ഈ പ്രകടനം മികച്ച ഫോമിലുള്ള വൈഭവ് സൂർയവംശിയുടെ അവസരങ്ങളാണ് തടയുന്നതെന്നും ചൂണ്ടിക്കാട്ടി. കഴിഞ്ഞ മത്സരത്തിൽ സഞ്ജു ഒരു മികച്ച ഇന്നിംഗ്സ് കളിച്ചതോടെ അടുത്ത 10 ഇന്നിംഗ്സുകളിലേക്ക് തന്റെ സ്ഥാനം സുരക്ഷിതമാക്കിയിരിക്കുകയാണെന്ന് ശ്രീകാന്ത് അഭിപ്രായപ്പെട്ടു.
എന്നാൽ ഇന്ത്യൻ സ്ക്വാഡിൽ ഉൾപ്പെട്ടിട്ടും വളരെ കുറച്ച് മത്സരങ്ങളിൽ മാത്രം അവസരം ലഭിച്ച യുവതാരമായ വൈഭവ് സൂർയവംശി വീണ്ടും തഴയപ്പെടുകയാണെന്നും, ഇത് ആ ചെറുപ്പക്കാരനോട് കാണിക്കുന്ന വലിയ അനീതിയാണെന്നും അദ്ദേഹം കൂട്ടിച്ചേർത്തു
