കളിക്കളത്തിൽ ചെന്നൈയെ തകർത്തുവിട്ട ആവേശത്തിന് പിന്നാലെ സിനിമാ ലോകത്തെ വിസ്മയ ചിത്രം ‘ധുരന്ധർ 2’ കണ്ട് മനസ്സ് തുറന്ന് വിരാട് കോഹ്ലി. ആദിത്യ ധർ സംവിധാനം ചെയ്ത ചിത്രത്തെയും നായകൻ രൺവീർ സിംഗിനെയും വാനോളം പുകഴ്ത്തിയാണ് കോഹ്ലി സോഷ്യൽ മീഡിയയിൽ കുറിപ്പ് പങ്കുവെച്ചത്. ഇന്ത്യയിൽ ഇതിനുമുൻപ് ഇത്തരമൊരു സിനിമാ അനുഭവം താൻ കണ്ടിട്ടില്ലെന്ന് കോഹ്ലി കുറിച്ചു.
നാല് മണിക്കൂർ നീളുന്ന ചിത്രം ഒരു നിമിഷം പോലും കണ്ണെടുക്കാതെയാണ് താൻ കണ്ടതെന്ന് കോഹ്ലി പറഞ്ഞു. “ഇന്ത്യയിൽ നിർമ്മിക്കപ്പെട്ട ഇത്തരമൊരു സിനിമാ അനുഭവം ഞാൻ ഇതിനുമുൻപ് കണ്ടിട്ടില്ല. ആദിത്യ ധർ, നിങ്ങളുടെ കഴിവും നിശ്ചയദാർഢ്യവുമാണ് ഈ ചിത്രത്തിൽ പ്രതിഫലിക്കുന്നത്. നിങ്ങൾ ഒരു പ്രതിഭയാണ്. രൺവീർ സിംഗ്, ഈ സിനിമയ്ക്ക് ശേഷം നിങ്ങൾ മറ്റൊരു തലത്തിലേക്ക് ഉയർന്നിരിക്കുന്നു. അതിശയിപ്പിക്കുന്ന പ്രകടനമായിരുന്നു നിങ്ങളുടേത്.” – കോഹ്ലി ഇൻസ്റ്റാഗ്രാമിൽ കുറിച്ചു.
അനുഷ്ക ശർമ്മയും ചിത്രത്തെയും രൺവീർ സിംഗിനെയും പ്രശംസിച്ച് രംഗത്തെത്തി. ആദിത്യ ധർ ഒരു ‘ഒറിജിനൽ’ സംവിധായകനാണെന്നും രൺവീർ തന്റെ കരിയറിലെ ഏറ്റവും മികച്ച വേഷമാണ് കൈകാര്യം ചെയ്തതെന്നും അനുഷ്ക പറഞ്ഞു. ആർ. മാധവൻ, അർജുൻ രാംപാൽ തുടങ്ങിയവരുടെ പ്രകടനങ്ങളെയും അനുഷ്ക അഭിനന്ദിച്ചു.
മാർച്ച് 19-ന് റിലീസ് ചെയ്ത ‘ധുരന്ധർ 2’ ബോക്സ് ഓഫീസിൽ ചരിത്രം തിരുത്തിക്കൊണ്ടിരിക്കുകയാണ്. ആദ്യ ദിനം തന്നെ 102.55 കോടി രൂപ വാരിക്കൂട്ടിയ ചിത്രം, ഇന്ത്യൻ സിനിമയിലെ തന്നെ ഏറ്റവും വലിയ വിജയങ്ങളിലൊന്നായി മാറിയിരിക്കുകയാണ്. 14,000-ലധികം ഷോകളാണ് ഇന്ത്യയിലുടനീളം ഈ ചിത്രത്തിന് ലഭിക്കുന്നത്.
