ആഗോള എണ്ണ വ്യാപാരത്തിന്റെ ജീവനനാഡിയായ ഹോർമുസ് കടലിടുക്കിൽ കടുത്ത നിയന്ത്രണങ്ങൾ ഏർപ്പെടുത്തി ഇറാൻ. ഫെബ്രുവരി 28-ന് യുദ്ധം ആരംഭിച്ചത് മുതൽ അടച്ചിട്ടിരുന്ന ഈ തന്ത്രപ്രധാന പാതയിലൂടെ ഇനി മുതൽ പ്രതിദിനം 15 കപ്പലുകൾക്ക് മാത്രമേ കടന്നുപോകാൻ അനുവാദമുണ്ടാകൂ. അമേരിക്കയുമായി ഉണ്ടാക്കിയ രണ്ടാഴ്ചത്തെ താൽക്കാലിക വെടിനിർത്തൽ കരാറിന്റെ ഭാഗമായാണ് ഈ നീക്കമെന്ന് റഷ്യൻ വാർത്താ ഏജൻസിയായ ടാസ് (TASS) റിപ്പോർട്ട് ചെയ്തു. എന്നാൽ നിയന്ത്രണങ്ങൾ കടുപ്പിച്ച ഇറാൻ, കപ്പലുകൾക്ക് കടന്നുപോകാൻ തങ്ങളുടെ കരുത്തുറ്റ സൈനിക വിഭാഗമായ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) മുൻകൂർ അനുമതി നിർബന്ധമാക്കിയിരിക്കുകയാണ്.
ഓരോ കപ്പലിനും പ്രത്യേക പ്രോട്ടോക്കോൾ പാലിച്ചാൽ മാത്രമേ കടലിടുക്കിലൂടെയുള്ള യാത്ര അനുവദിക്കൂ. ലോകത്തെ ക്രൂഡ് ഓയിൽ വ്യാപാരത്തിന്റെ മൂന്നിലൊന്നും കടന്നുപോകുന്ന പാതയിൽ ഇറാൻ പിടിമുറുക്കുന്നത് ആഗോള വിപണിയിൽ എണ്ണവില കുതിച്ചുയരാൻ കാരണമായേക്കും. കപ്പൽ കമ്പനികൾ ഓരോ യാത്രയ്ക്കും ഐആർജിസിയിൽ നിന്ന് പ്രത്യേക അനുമതി തേടണം. ഇറാന്റെ പരമാധികാരവും സൈനിക മേധാവിത്വവും ഊട്ടിയുറപ്പിക്കുന്നതാണ് പുതിയ നീക്കമെന്ന് വിലയിരുത്തപ്പെടുന്നു. അമേരിക്കയുമായുള്ള സമാധാന ചർച്ചകൾക്കിടയിലും തന്ത്രപ്രധാന മേഖലയുടെ നിയന്ത്രണം കൈവിടില്ലെന്ന ശക്തമായ സന്ദേശമാണ് ഇറാൻ ഇതിലൂടെ നൽകുന്നത്. നിയന്ത്രണങ്ങൾ കടുപ്പിച്ചതോടെ ഹോർമുസ് കടലിടുക്കിൽ കപ്പലുകളുടെ നീണ്ട നിര രൂപപ്പെടാൻ സാധ്യതയുണ്ടെന്നും ഇത് ആഗോള വിതരണ ശൃംഖലയെ ബാധിക്കുമെന്നും സാമ്പത്തിക വിദഗ്ധർ മുന്നറിയിപ്പ് നൽകുന്നു.
