സജീവ രാഷ്ട്രീയത്തിൽ ഇടപെടുകയും രാഷ്ട്രീയ നിലപാടുകൾ വ്യക്തമാക്കുകയും ചെയ്യുന്ന മതമേലധ്യക്ഷന്മാർ, തിരിച്ചു വിമർശനങ്ങൾ നേരിടേണ്ടി വരുമ്പോൾ മതപരമായ പരിരക്ഷ തേടുന്നത് ശരിയല്ലെന്ന് ബിജെപി സംസ്ഥാന വൈസ് പ്രസിഡന്റ് ഡോ. കെ.എസ്. രാധാകൃഷ്ണൻ. രാഷ്ട്രീയ നിലപാടുകൾക്ക് മറുപടിയായി വിമർശനങ്ങൾ ഉയരുമ്പോൾ തിരുവസ്ത്രത്തിന്റെ സംരക്ഷണം തേടുന്നത് ജനാധിപത്യപരമായ കീഴ്‌വഴക്കമല്ലെന്ന് അദ്ദേഹം വ്യക്തമാക്കി. കാഞ്ഞിരപ്പള്ളി ബിഷപ്പിനെതിരെ പി.സി. ജോർജും ഷോൺ ജോർജും നടത്തിയ കടുത്ത ഭാഷയിലുള്ള വിമർശനങ്ങളെ ന്യായീകരിച്ചുകൊണ്ടായിരുന്നു അദ്ദേഹത്തിന്റെ പ്രതികരണം.
മതമേലധ്യക്ഷന്മാർ രാഷ്ട്രീയമായ നിലപാടുകൾ സ്വീകരിക്കുമ്പോൾ അവരെ രാഷ്ട്രീയക്കാരായി തന്നെ കാണേണ്ടി വരും. ആ നിലപാടുകളോട് വിയോജിപ്പുള്ളവർ പ്രതികരിക്കുന്നത് സ്വാഭാവികമാണ്. പി.സി. ജോർജും മകനും നടത്തിയത് രാഷ്ട്രീയപരമായ പ്രതികരണങ്ങൾ മാത്രമാണ്. അത്തരമൊരു സാഹചര്യത്തിൽ സഭയുടെയോ വിശ്വാസത്തിന്റെയോ പേരിൽ പ്രതിരോധം തീർക്കുന്നത് യുക്തിസഹമല്ലെന്നും അദ്ദേഹം കൂട്ടിച്ചേർത്തു.
രാഷ്ട്രീയ വിഷയങ്ങളിൽ അഭിപ്രായം പറയാൻ എല്ലാവർക്കും അവകാശമുണ്ട്, എന്നാൽ അതിന്റെ പേരിൽ കേൾക്കേണ്ടി വരുന്ന വിമർശനങ്ങളെ രാഷ്ട്രീയമായി തന്നെ നേരിടാൻ മതനേതാക്കൾ തയ്യാറാകണമെന്നും രാധാകൃഷ്ണൻ കൊച്ചിയിൽ പറഞ്ഞു.
