കണ്ണൂർ: മുഖ്യമന്ത്രി പിണറായി വിജയന്റെ ചിത്രം സ്വർണ്ണക്കള്ളനെന്ന് ചേർത്ത് സോഷ്യൽ മീഡിയയിൽ പങ്കുവച്ച യുവാവിനെതിരെ പോലീസ് കേസെടുത്തു. കണ്ണൂർ പച്ചപ്പൊയ്ക സ്വദേശിയായ അനുനന്ദിനെതിരെയാണ് (19) ചക്കരക്കൽ പോലീസ് കേസെടുത്തത്. മുഖ്യമന്ത്രിയുടെ ഫോട്ടോ മോർഫ് ചെയ്ത് വികലമായ രീതിയിൽ പ്രചരിപ്പിക്കുകയും അതിന് താഴെ അധിക്ഷേപകരമായ അടിക്കുറിപ്പ് നൽകുകയും ചെയ്തതിനാണ് നടപടി. ഒരു സിപിഎം പ്രവർത്തകൻ നൽകിയ പരാതിയുടെ അടിസ്ഥാനത്തിലാണ് പോലീസ് കേസെടുത്തിരിക്കുന്നത്.
‘പ്രിയദർശിനി ഓലായിക്കര’ എന്ന പേജിലൂടെയാണ് വിവാദമായ ചിത്രം പ്രചരിപ്പിച്ചത്. മുഖ്യമന്ത്രിയുടെ ചിത്രം വികലമാക്കിയതിനൊപ്പം ‘സ്വർണക്കള്ളൻ’ എന്ന അപകീർത്തികരമായ അടിക്കുറിപ്പും നൽകിയിരുന്നു. ഇത് ബോധപൂർവ്വം മുഖ്യമന്ത്രിയെ അധിക്ഷേപിക്കാനും കലാപമുണ്ടാക്കാനും ലക്ഷ്യമിട്ടുള്ളതാണെന്ന് പരാതിയിൽ പറയുന്നു. ഐടി ആക്ട് ഉൾപ്പെടെയുള്ള വകുപ്പുകൾ ചേർത്താണ് യുവാവിനെതിരെ കേസെടുത്തിരിക്കുന്നത്.
കോൺഗ്രസിനെ പിന്തുണയ്ക്കുന്ന പോസ്റ്റുകളാണ് പ്രിയദർശിനി ഓലായിക്കരയെന്ന പേജിൽ പങ്കുവയ്ക്കുന്നത്. ഓലായിക്കരയിലെ കോൺഗ്രസ് ഗ്രാമമെന്നും ഫിയർലെസ് എഗെയ്ൻസ്റ്റ് കോംപ്രമൈസ് എന്നുമാണ് പേജിൽ ഡിസ്ക്രിപ്ഷനായി ചേർത്തിരിക്കുന്നത്.
സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്. സോഷ്യൽ മീഡിയയിലൂടെയുള്ള ഇത്തരം വ്യക്തിഹത്യകൾക്കും വ്യാജപ്രചാരണങ്ങൾക്കുമെതിരെ കർശന നടപടി സ്വീകരിക്കുമെന്നും പോലീസ് അറിയിച്ചു.
