വരാനിരിക്കുന്ന നിയമസഭാ തിരഞ്ഞെടുപ്പിൽ കാസർകോട് മണ്ഡലത്തിൽ ബിജെപിക്ക് വിജയസാധ്യതയെന്ന് സിപിഎം വിലയിരുത്തൽ. മണ്ഡലം കമ്മിറ്റി ജില്ലാ കമ്മിറ്റിക്ക് നൽകിയ റിപ്പോർട്ടിലാണ് കാസർകോട് ബിജെപി ഒന്നാം സ്ഥാനത്തെത്തുമെന്ന നിരീക്ഷണമുള്ളത്. എൽഡിഎഫ് സ്ഥാനാർത്ഥി ഷാനവാസ് പാദൂർ വലിയ രീതിയിൽ വോട്ട് സമാഹരിക്കുമെന്നും ഇത് മണ്ഡലത്തിലെ പോരാട്ടം ബിജെപിയും എൽഡിഎഫും തമ്മിലാക്കി മാറ്റിയെന്നുമാണ് സിപിഎം കരുതുന്നത്. ഇതോടെ 1980 മുതൽ മുസ്ലിം ലീഗ് മാത്രം വിജയിച്ചുപോന്ന മണ്ഡലത്തിൽ ഇത്തവണ യുഡിഎഫിന് കാലിടറുമെന്നാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്.
എൽഡിഎഫ് സ്ഥാനാർത്ഥി ഷാനവാസ് പാദൂരിന് ഇത്തവണ 50,000 വോട്ടുകൾ ലഭിക്കുമെന്നാണ് സിപിഎമ്മിന്റെ കണക്കുകൂട്ടൽ. മുൻപ് ഐഎൻഎൽ മത്സരിച്ചിരുന്ന സമയത്ത് പരമാവധി ലഭിച്ചിരുന്നത് 28,000 വോട്ടുകളായിരുന്നു. ഇത്തവണ സ്വതന്ത്ര സ്ഥാനാർത്ഥിയെ രംഗത്തിറക്കിയത് പാർട്ടിയെ സജീവമാക്കാൻ സഹായിച്ചുവെന്നും റിപ്പോർട്ടിൽ പറയുന്നു. ഷാനവാസ് പാദൂർ പിടിക്കുന്ന അധിക വോട്ടുകൾ പ്രധാനമായും യുഡിഎഫ് കേന്ദ്രങ്ങളിൽ നിന്നാകുമെന്നാണ് സിപിഎം നിരീക്ഷണം. ഇത് ബിജെപി സ്ഥാനാർത്ഥി എം.എൽ അശ്വിനിയുടെ വിജയസാധ്യത വർദ്ധിപ്പിക്കുന്നു. മുസ്ലിം ലീഗിന്റെ വോട്ടുകളിൽ വിള്ളൽ വീഴുന്നത് ബിജെപിക്ക് അനുകൂലമായ സാഹചര്യം ഒരുക്കുമെന്നാണ് മണ്ഡലം കമ്മിറ്റിയുടെ വിലയിരുത്തൽ.
വർഷങ്ങളായി കാസർകോട് മണ്ഡലത്തിൽ മൂന്നാം സ്ഥാനത്ത് തുടരുന്ന എൽഡിഎഫ്, ഇത്തവണത്തെ ശക്തമായ പോരാട്ടത്തിലൂടെ രണ്ടാം സ്ഥാനത്തേക്ക് ഉയരുമെന്നാണ് പ്രതീക്ഷിക്കുന്നത്. സ്വതന്ത്ര സ്ഥാനാർത്ഥി ഷാനവാസ് പാദൂർ വോട്ടുകൾ സമാഹരിക്കുന്നതോടെ യുഡിഎഫിന്റെ വിജയ അടിത്തറ ഇളകുമെന്നും അത് ബിജെപിയെ ഒന്നാമതെത്തിക്കുമെന്നുമാണ് സിപിഎം ജില്ലാ കമ്മിറ്റിക്ക് നൽകിയ റിപ്പോർട്ട് സൂചിപ്പിക്കുന്നത്. കാസർകോട്ടെ മാറിയ രാഷ്ട്രീയ സാഹചര്യം വരും ദിവസങ്ങളിൽ വലിയ ചർച്ചകൾക്ക് വഴിതുറക്കും.
