ഐപിഎല്ലിൽ വർഷങ്ങളായി സ്ഥിരതയാർന്ന പ്രകടനങ്ങൾ പുറത്തെടുക്കുന്ന റോയൽ ചലഞ്ചേഴ്സ് ബെംഗളൂരു സ്റ്റാർ ബാറ്റർ വിരാട് കോലിയുടെ വിജയരഹസ്യം വെളിപ്പെടുത്തി മുൻ ഇന്ത്യൻ താരം മനോജ് തിവാരി. 2017 ലെ ഐപിഎല്ലിനിടെ വിരാട് കോലിയുമായി നടത്തിയ ഒരു പഴയ സംഭാഷണമാണ് തിവാരി ഇപ്പോൾ ആരാധകർക്കായി തുറന്നുപറഞ്ഞിരിക്കുന്നത്.
ഏപ്രിൽ 15 ബുധനാഴ്ച ലഖ്‌നൗ സൂപ്പർ ജയന്റ്സിനെതിരായ മത്സരത്തിൽ കോഹ്‌ലി 34 പന്തിൽ 49 റൺസ് നേടി ആർസിബിയുടെ വിജയത്തിൽ നിർണായക പങ്ക് വഹിച്ചിരുന്നു. ഇതിന് പിന്നാലെ ക്രിക്ബസ്സിൽ നടന്ന ചർച്ചയിലാണ് തിവാരി കോലിയുടെ വിജയമന്ത്രം വെളിപ്പെടുത്തിയത്. “വെറുതെയല്ല നമ്മൾ അദ്ദേഹത്തെ ഇതിഹാസമെന്ന് വിളിക്കുന്നത്. 2017-ൽ ഞാൻ റൈസിംഗ് പൂനെ സൂപ്പർജയന്റിന് വേണ്ടി കളിക്കുന്ന സമയം. തലേവർഷം 900-ത്തിലധികം റൺസടിച്ച് കോഹ്‌ലി അമാനുഷിക ഫോമിൽ നിൽക്കുകയാണ്. ഞാൻ അദ്ദേഹത്തിന്റെയടുത്ത് പോയി ചോദിച്ചു, ‘എങ്ങനെയാണ് നിനക്ക് ഇങ്ങനെയൊക്കെ ചെയ്യാൻ കഴിയുന്നത്?’ അന്ന് കോഹ്‌ലി പറഞ്ഞ മറുപടി എനിക്ക് വളരെ ഇഷ്ടമായി. ‘എതിർ ടീമിലെ ഏറ്റവും മികച്ച ബൗളറെയാണ് ഞാൻ എപ്പോഴും ലക്ഷ്യമിടുന്നത്’ എന്നായിരുന്നു അദ്ദേഹത്തിന്റെ മറുപടി,” തിവാരി പറഞ്ഞു.
ലഖ്‌നൗവിനെതിരായ മത്സരത്തിലും കോഹ്‌ലി ഇത് തന്നെയാണ് ചെയ്തതെന്ന് തിവാരി ചൂണ്ടിക്കാട്ടി. ലഖ്‌നൗ നിരയിലെ ഏറ്റവും മികച്ച ബൗളറായ മുഹമ്മദ് ഷമിയെയാണ് പവർപ്ലേയിൽ കോലി കടന്നാക്രമിച്ചത്. പവർപ്ലേയിൽ റൺറേറ്റ് 10-ൽ എത്തിച്ചതിന് ശേഷം മികച്ച കൂട്ടുകെട്ടുകൾ ഉണ്ടാക്കാനാണ് കോഹ്‌ലി പിന്നീട് ശ്രമിച്ചത്. നിലവിൽ ഐപിഎൽ 2026 ലെ ഓറഞ്ച് ക്യാപ്പ് കോലിയുടെ കൈകളിലാണ്. അഞ്ച് ഇന്നിംഗ്സുകളിൽ നിന്ന് 158.33 സ്ട്രൈക്ക് റേറ്റിൽ 228 റൺസാണ് താരം ഇതിനോടകം അടിച്ചുകൂട്ടിയത്.
ലഖ്‌നൗവിനെതിരായ മത്സരത്തിൽ ആർസിബി മാനേജ്മെന്റ് നടത്തിയ തന്ത്രപരമായ നീക്കങ്ങളെ മുൻ ഇന്ത്യൻ പേസർ സഹീർ ഖാനും പ്രശംസിച്ചു. ടിം ഡേവിഡിന് മുൻപായി ജിതേഷ് ശർമ്മയെ ബാറ്റിംഗിനിറക്കിയ ആർസിബിയുടെ നീക്കമാണ് സഹീർ എടുത്തുപറഞ്ഞത്. “അവർ തന്ത്രപരമായ ഒരു മുൻതൂക്കം നേടിയെടുക്കുകയാണ് ചെയ്തത്. ഈ മത്സരത്തെ അവർ വെറുതെ പാഴാക്കിയില്ല. ജിതേഷ് ശർമ്മയെ ബാറ്റിംഗ് ഓർഡറിൽ പ്രൊമോട്ട് ചെയ്തത് മികച്ചൊരു നീക്കമായിരുന്നു. വലിയൊരു വിജയലക്ഷ്യമായിരുന്നെങ്കിൽ ഒരുപക്ഷേ ടിം ഡേവിഡ് മുന്നോട്ട് വന്നേനെ. ആർസിബിക്ക് ആ ബാറ്റിംഗ് ഫ്ലെക്സിബിലിറ്റി ഉണ്ട്. ഒരവസരം പോലും അവർ പാഴാക്കുന്നില്ല,” സഹീർ വ്യക്തമാക്കി.
ലഭിച്ച അവസരം മുതലാക്കിയ ജിതേഷ് വെറും 9 പന്തിൽ 23 റൺസ് നേടി. 147 റൺസ് എന്ന വിജയലക്ഷ്യം വെറും 15.1 ഓവറിലാണ് ആർസിബി മറികടന്നത്. ഐപിഎൽ 2026 സീസണിൽ കളിച്ച ആദ്യ അഞ്ച് മത്സരങ്ങളിൽ നാലിലും വിജയിച്ച ആർസിബിയാണ് ഇപ്പോൾ പോയിന്റ് പട്ടികയിൽ ഒന്നാം സ്ഥാനത്ത്.
