ഐപിഎൽ 2026-ൽ ലഖ്നൗ സൂപ്പർ ജയന്റ്സിനെതിരെ നേടിയ തകർപ്പൻ വിജയത്തിന് പിന്നാലെ പഞ്ചാബ് കിംഗ്സ് ക്യാമ്പിൽ നിന്നുള്ള ഒരു രസകരമായ വീഡിയോ സോഷ്യൽ മീഡിയയിൽ വൈറലാകുന്നു. കളി കഴിഞ്ഞ് ചെരുപ്പിട്ട് മൈതാനത്ത് നടന്ന നായകൻ ശ്രേയസ് അയ്യർ, സമ്മാനദാന ചടങ്ങിനായി ക്യാമറാമാന്റെ ഷൂ കടം വാങ്ങേണ്ടി വന്നതാണ് ആരാധകർ ഏറ്റെടുത്തിരിക്കുന്നത്.
മത്സരശേഷം ചെരുപ്പിട്ട് നടക്കുകയായിരുന്ന ശ്രേയസ് അയ്യർ, പ്രസന്റേഷൻ ചടങ്ങിനായി വിളിച്ചപ്പോഴാണ് ഷൂ ഇടാത്ത കാര്യം ഓർത്തത്. ബിസിസിഐ നിയമപ്രകാരം സ്ലീവ്ലെസ് ജേഴ്സിയോ ചെരുപ്പോ ധരിച്ച് ഔദ്യോഗിക ചടങ്ങുകളിൽ പങ്കെടുക്കുന്നത് നിരോധിച്ചിട്ടുണ്ട്. നിയമലംഘനം നടത്തിയാൽ കനത്ത പിഴ ഒടുക്കേണ്ടി വരുമെന്നതിനാൽ, ഒട്ടും വൈകാതെ തന്നെ അടുത്തുനിന്ന ക്യാമറാമാന്റെ ഷൂ കടം വാങ്ങി അയ്യർ വേദിയിലേക്ക് നടക്കുകയായിരുന്നു. ഇതിന്റെ വീഡിയോ ഇപ്പോൾ ഇന്റർനെറ്റിൽ ചിരി പടർത്തുകയാണ്.
ആദ്യം ബാറ്റ് ചെയ്ത പഞ്ചാബ് കിംഗ്സ് നിശ്ചിത ഓവറിൽ 254 റൺസെന്ന കൂറ്റൻ സ്കോറാണ് പടുത്തുയർത്തിയത്. രണ്ടാം വിക്കറ്റിൽ ഒന്നിച്ച പ്രിയാൻഷ് ആര്യയും കൂപ്പർ കോണോലിയും ചേർന്ന് ലഖ്നൗ ബൗളർമാരെ നിലംപരിശാക്കി. വെറും 80 പന്തിൽ നിന്ന് 182 റൺസാണ് ഈ യുവസഖ്യം അടിച്ചുകൂട്ടിയത്. 16 സിക്സറുകളാണ് ഇവരുടെ ഇന്നിംഗ്സിൽ പിറന്നത്. 54 റൺസിന്റെ വലിയ വിജയമാണ് പഞ്ചാബ് സ്വന്തമാക്കിയത്.
ഈ വിജയത്തോടെ പഞ്ചാബ് കിംഗ്സ് തുടർച്ചയായ ആറ് വിജയങ്ങളുമായി പോയിന്റ് പട്ടികയിൽ 11 പോയിന്റോടെ ഒന്നാം സ്ഥാനത്ത് തുടരുന്നു. യുവതാരങ്ങളുടെ പ്രകടനത്തെ ശ്രേയസ് അയ്യർ വാനോളം പുകഴ്ത്തി. “അവിശ്വസനീയമായ ഷോട്ടുകളാണ് ഇന്ന് കണ്ടത്. സ്പിന്നർമാരെയും പേസർമാരെയും ഒരുപോലെ നേരിടാൻ അവർ കാണിച്ച ധൈര്യം അപാരമാണ്.” ശ്രേയസ് അയ്യർ പറഞ്ഞു.
പഞ്ചാബിന്റെ അടുത്ത മത്സരം ഏപ്രിൽ 25-ന് ഡൽഹി ക്യാപിറ്റൽസിനെതിരെയാണ്.
Shreyas Iyer had forgotten his shoes, and since he had to go for the post-match presentation, he borrowed the cameraman’s shoes to wear.😂❤️ pic.twitter.com/MdjfeQ9Td0
— 𝐑𝐮𝐬𝐡𝐢𝐢𝐢⁴⁵ (@rushiii_12) April 20, 2026
