ഭാരതം എന്ന മഹാപ്രസ്ഥാനം ഒരൊറ്റ കപ്പലാണെന്നും അതിലെ യാത്രക്കാരായ നാം ഓരോരുത്തരും ഒന്നിച്ചു തുഴഞ്ഞാൽ മാത്രമേ ലക്ഷ്യസ്ഥാനത്ത് സുരക്ഷിതമായി എത്താൻ സാധിക്കൂ എന്നും ദേശീയ സുരക്ഷാ ഉപദേഷ്ടാവ് (എൻഎസ്എ) അജിത് ഡോവൽ. മുസ്ലിം സമുദായത്തിലെ പ്രമുഖ പണ്ഡിതന്മാരും നേതാക്കളുമായും നടത്തിയ ഉന്നതതല കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്. “നമ്മൾ ഒന്നിച്ചു തുഴയും, അല്ലെങ്കിൽ ഒന്നിച്ചു മുങ്ങും” എന്ന ശക്തമായ സന്ദേശത്തിലൂടെ ഓരോ പൗരനും രാജ്യത്തിന്റെ വളർച്ചയിലും സുരക്ഷയിലും തുല്യ ഉത്തരവാദിത്തമുണ്ടെന്ന് അദ്ദേഹം ഓർമ്മിപ്പിച്ചു. വിഭജന രാഷ്ട്രീയത്തെ തള്ളിക്കളഞ്ഞ് ‘ദേശീയത’ എന്ന വികാരം നെഞ്ചിലേറ്റേണ്ടതിന്റെ അനിവാര്യതയാണ് അദ്ദേഹം തന്റെ പ്രസംഗത്തിലുടനീളം പങ്കുവെച്ചത്.
രാജ്യത്തിന്റെ ആഭ്യന്തര ഐക്യം തകർക്കാൻ ശ്രമിക്കുന്ന ബാഹ്യശക്തികൾക്കെതിരെ ജാഗ്രത വേണമെന്ന് ഡോവൽ മുന്നറിയിപ്പ് നൽകി. ഉൾപ്പോരുകൾ രാജ്യത്തിന്റെ അടിത്തറ ദുർബലപ്പെടുത്തും. വൈവിധ്യങ്ങൾക്കിടയിലും ഭാരതീയർക്കിടയിൽ വളർന്നുവരുന്ന ഐക്യബോധം രാജ്യത്തിന്റെ പ്രതിരോധ ശേഷി വർധിപ്പിക്കുന്നു. കഴിഞ്ഞ 12 വർഷത്തിനിടെ ഇന്ത്യൻ സൈന്യത്തിലും അർദ്ധസൈനിക വിഭാഗങ്ങളിലും മുസ്ലിം യുവാക്കളുടെ പങ്കാളിത്തം ഗണ്യമായി വർധിച്ചത് ഇതിന്റെ വലിയ തെളിവാണ്. ആർമി, സിആർപിഎഫ്, ബിഎസ്എഫ് തുടങ്ങിയ സുരക്ഷാ ഏജൻസികളിൽ മുസ്ലിം യുവാക്കൾ സേവനമനുഷ്ഠിക്കാൻ മുന്നോട്ടുവരുന്നത് രാജ്യത്തോടുള്ള അവരുടെ കൂറും ‘നേഷൻ ഫസ്റ്റ്’ (രാജ്യം ഒന്നാമത്) എന്ന നയം മുസ്ലിം സമൂഹത്തിനിടയിൽ വേരൂന്നുന്നതിന്റെയും അടയാളമാണെന്ന് അദ്ദേഹം ചൂണ്ടിക്കാട്ടി.
അതിർത്തി കാക്കുന്നതിൽ സമുദായം നൽകുന്ന സംഭാവനകളെ പ്രശംസിച്ച ഡോവൽ, ഇതിനെ ഒരു നിശബ്ദ വിപ്ലവമെന്നാണ് വിശേഷിപ്പിച്ചത്. എന്നാൽ, ഡിജിറ്റൽ യുഗത്തിൽ സോഷ്യൽ മീഡിയയിലൂടെ പടരുന്ന വ്യാജവാർത്തകളും തീവ്രവാദ ആശയങ്ങളും യുവാക്കളെ വഴിതെറ്റിക്കാൻ ശ്രമിക്കുന്നുണ്ട്. ഇത്തരം പ്രവണതകൾക്കെതിരെ മുസ്ലിം പണ്ഡിതന്മാരും സമുദായ നേതാക്കളും പ്രതിരോധത്തിന്റെ ഒന്നാം നിരയായി നിലകൊള്ളണം. ജനാധിപത്യപരമായ സംവാദങ്ങളിലൂടെയും ക്രിയാത്മകമായ ഇടപെടലുകളിലൂടെയും മാത്രമേ തീവ്രവാദത്തെ ചെറുക്കാനാവൂ എന്നും അദ്ദേഹം പറഞ്ഞു. ആഭ്യന്തരമായി ശക്തമായ ഒരു രാഷ്ട്രത്തിന് മാത്രമേ അതിർത്തികളിൽ ശത്രുക്കളെ ഫലപ്രദമായി നേരിടാൻ സാധിക്കൂ. ഇന്ത്യ നേരിടുന്ന ആഗോള വെല്ലുവിളികൾക്കും അതിർത്തി തർക്കങ്ങൾക്കുമിടയിൽ രാജ്യത്തിന്റെ അഖണ്ഡത കാത്തുസൂക്ഷിക്കാൻ എല്ലാ വിഭാഗം ജനങ്ങളും ഒറ്റക്കെട്ടായി നിൽക്കണമെന്നും അജിത് ഡോവൽ ആഹ്വാനം ചെയ്തു.
