കോഹ്‌ലിയെ അടുത്ത് കണ്ടിട്ടും ഓട്ടോഗ്രാഫ് കിട്ടിയില്ല; ബാറ്റ് നിലത്തെറിഞ്ഞ് പൊട്ടിക്കരഞ്ഞ് കുട്ടി ആരാധകൻ; ആർസിബി ഹോട്ടലിൽ നിന്നുള്ള കാഴ്ച നോവാകുന്നു

ഐപിഎൽ 2026-ൽ റെക്കോഡുകൾ തകർത്ത് മുന്നേറുന്ന വിരാട് കോഹ്‌ലിയെ കാണാൻ എത്തിയ ഒരു കുട്ടി ആരാധകന്റെ വീഡിയോ സോഷ്യൽ മീഡിയയിൽ നോവായി മാറുന്നു. ടീം ഹോട്ടലിലെത്തിയ കോഹ്‌ലിയുടെ ഓട്ടോഗ്രാഫിനായി ഓടിയെത്തിയ കുട്ടിയെ സുരക്ഷാ ഉദ്യോഗസ്ഥർ തടഞ്ഞതാണ് ആരാധകരെ വിഷമിപ്പിച്ചത്.

ആർസിബി ടീം ഹോട്ടലിൽ എത്തിയപ്പോൾ ഓട്ടോഗ്രാഫ് വാങ്ങാനായി ഒരു കൊച്ചു ബാലൻ കോഹ്‌ലിയുടെ അടുത്തേക്ക് ആവേശത്തോടെ ഓടിയടുത്തു. എന്നാൽ ലക്ഷ്യസ്ഥാനത്തെത്തും മുൻപേ സുരക്ഷാ ഉദ്യോഗസ്ഥർ കുട്ടിയെ തടഞ്ഞു. കോഹ്‌ലിയെ കാണാൻ കഴിയാത്ത സങ്കടത്തിൽ കുട്ടി കയ്യിലുണ്ടായിരുന്ന ബാറ്റ് തറയിലെറിഞ്ഞ് പൊട്ടിക്കരഞ്ഞുകൊണ്ട് നടന്നുപോകുന്ന വീഡിയോ വൈറലായിരിക്കുകയാണ്.

അതേസമയം ഇന്നലെ ഡൽഹി ക്യാപിറ്റൽസിനെതിരായ മത്സരത്തിൽ വിരാട് കോഹ്‌ലി മറ്റൊരു നാഴികക്കല്ല് കൂടി പിന്നിട്ടു. ഐപിഎൽ ചരിത്രത്തിൽ 9000 റൺസ് തികയ്ക്കുന്ന ആദ്യ ബാറ്ററായി വിരാട് കോഹ്‌ലി മാറി. അക്സർ പട്ടേലിന്റെ പന്തിൽ സിംഗിൾ എടുത്താണ് താരം ഈ ചരിത്രനേട്ടം സ്വന്തമാക്കിയത്. നിലവിൽ 267 ഇന്നിംഗ്‌സുകളിൽ നിന്നായി 9012 റൺസാണ് കോഹ്‌ലിയുടെ സമ്പാദ്യം. ഈ സീസണിൽ മാത്രം 8 ഇന്നിംഗ്‌സുകളിൽ നിന്ന് 351 റൺസുമായി അദ്ദേഹം റൺവേട്ടയിൽ നാലാം സ്ഥാനത്തുണ്ട്.

അരുൺ ജെയ്റ്റ്‌ലി സ്റ്റേഡിയത്തിൽ നടന്ന മത്സരത്തിൽ ഡൽഹിയെ തകർത്തെറിഞ്ഞാണ് ആർസിബി വിജയിച്ചത്. ടോസ് നഷ്ടപ്പെട്ട് ബാറ്റിംഗിനിറങ്ങിയ ഡൽഹിയെ ഭുവനേശ്വർ കുമാറും (3 വിക്കറ്റ്) ജോഷ് ഹേസൽവുഡും (4 വിക്കറ്റ്) ചേർന്ന് വെറും 75 റൺസിന് പുറത്താക്കി. വെറും 6.3 ഓവറിൽ ലക്ഷ്യം കണ്ട ആർസിബി ഐപിഎൽ ചരിത്രത്തിലെ ഏറ്റവും വേഗതയേറിയ രണ്ടാമത്തെ വിജയമാണ് സ്വന്തമാക്കിയത്. 8 മത്സരങ്ങളിൽ നിന്ന് 6 വിജയങ്ങളുമായി 12 പോയിന്റോടെ പോയിന്റ് പട്ടികയിൽ രണ്ടാം സ്ഥാനത്താണ് ഡിഫൻഡിംഗ് ചാമ്പ്യന്മാരായ ആർസിബി.

Wholesome: Little fan waits excitedly with bat for Virat Kohli’s autograph in hotel lobby, but gets ignored 😭

Kid throws bat down in heartbreak 😂💔” pic.twitter.com/QVyUPEh86F

— Ghar Ke Kalesh (@gharkekalesh) April 27, 2026