പരിക്കിന്റെ പിടിയിലായിരുന്ന വെറ്ററൻ ഇന്ത്യൻ താരം രോഹിത് ശർമ്മ മുംബൈ ഇന്ത്യൻസിനായി വീണ്ടും കളത്തിലിറങ്ങാൻ ഒരുങ്ങുന്നു. ബുധനാഴ്ച വാങ്കഡെ സ്റ്റേഡിയത്തിൽ നടക്കുന്ന സൺറൈസേഴ്സ് ഹൈദരാബാദിനെതിരായ മത്സരത്തിൽ അദ്ദേഹം കളിക്കാനാണ് സാധ്യത. റോയൽ ചലഞ്ചേഴ്സ് ബെംഗളൂരുവിനെതിരായ മത്സരത്തിനിടെ ബാറ്റ് ചെയ്യുമ്പോൾ ഹാംസ്ട്രിങ്ങിന് പരിക്കേറ്റതിനെ തുടർന്നാണ് രോഹിത്തിന് വിശ്രമം വേണ്ടിവന്നത്.
ഹൈദരാബാദിനെതിരായ മത്സരത്തിന് തൊട്ടുപിന്നാലെ രോഹിത് തന്റെ 39-ാം ജന്മദിനം ആഘോഷിക്കുകയാണ്. ഇതിനിടെ ജിമ്മിൽ പരിശീലനം നടത്തുന്നതിനിടെ സഹതാരം ഷാർദുൽ താക്കൂറിനെ അനുകരിച്ച് പരിഹസിക്കുന്ന രോഹിത്തിന്റെ ഒരു വീഡിയോ ഇപ്പോൾ സമൂഹമാധ്യമങ്ങളിൽ വൈറലായിട്ടുണ്ട്. രോഹിത്തിന്റെ പ്രവൃത്തി കണ്ട് ചിരിയടക്കാൻ പാടുപെടുന്ന ഷാർദുലിനെയും വീഡിയോയിൽ കാണാം.
അഞ്ച് തവണ ഐപിഎൽ ചാമ്പ്യന്മാരായ മുംബൈ നിലവിൽ ഏഴ് കളികളിൽ നിന്ന് വെറും നാല് പോയിന്റുമായി പോയിന്റ് പട്ടികയിൽ ഒമ്പതാം സ്ഥാനത്താണ്. പ്ലേ ഓഫിലെത്താൻ ഹാർദിക് പാണ്ഡ്യയ്ക്കും സംഘത്തിനും ഇനിയുള്ള എല്ലാ മത്സരങ്ങളിലും വിജയിക്കേണ്ടതുണ്ട്. കഴിഞ്ഞ മത്സരത്തിൽ ചെന്നൈ സൂപ്പർ കിംഗ്സിനോട് വലിയ തോൽവിയാണ് മുംബൈ ഏറ്റുവാങ്ങിയത്.
ചെന്നൈക്കെതിരായ മത്സരത്തിൽ ക്യാച്ചെടുക്കാൻ ശ്രമിക്കുന്നതിനിടെ പരിക്കേറ്റ മിച്ചൽ സാന്റ്നർക്ക് പകരക്കാരനായി ദക്ഷിണാഫ്രിക്കൻ സ്പിന്നർ കേശവ് മഹാരാജിനെ മുംബൈ ടീമിലെടുത്തു. കഴിഞ്ഞ മത്സരത്തിൽ ഷാർദുൽ താക്കൂറിനെ ‘കൺകഷൻ സബ്’ ആയി ഉപയോഗിച്ചത് വലിയ വിവാദങ്ങൾക്ക് വഴിവെച്ചിരുന്നു. പാറ്റ് കമ്മിൻസിന്റെ ഹൈദരാബാദിനെതിരെ മഹാരാജ് കളത്തിലിറങ്ങിയേക്കും. സ്പിൻ നിരയിലെ ഈ മാറ്റം മുംബൈയ്ക്ക് പുതിയ ഊർജ്ജം നൽകുമെന്നാണ് പ്രതീക്ഷിക്കുന്നത്.
തുടർച്ചയായ തോൽവികളിൽ വലയുന്ന മുംബൈയുടെ ക്യാപ്റ്റൻ സ്ഥാനത്ത് നിന്ന് 32-കാരനായ ഹാർദിക് പാണ്ഡ്യയെ മാറ്റണമെന്നും, പകരം ഇന്ത്യയുടെ ടി20 ക്യാപ്റ്റനായ സൂര്യകുമാർ യാദവിനെ നായകനാക്കണമെന്നും മുൻ പാകിസ്ഥാൻ താരം കമ്രാൻ അക്മൽ ആവശ്യപ്പെട്ടു.
