കേരളത്തിന്റെ രാഷ്ട്രീയ ചരിത്രത്തിൽ ഇന്നുവരെ കാണാത്ത വിധത്തിലുള്ള ശക്തമായ ഭരണവിരുദ്ധ തരംഗമാണ് നിലവിലുള്ളതെന്ന് രാഷ്ട്രീയ നിരീക്ഷകൻ അഡ്വ. എ. ജയശങ്കർ. പിണറായി വിജയന്റെ നേതൃത്വത്തിലുള്ള ഇടതുപക്ഷ സർക്കാർ ഇനിയും തുടരരുത് എന്ന് ജനങ്ങൾ ഉറപ്പിച്ചു കഴിഞ്ഞു. വോട്ടെണ്ണലിന് മണിക്കൂറുകൾ മാത്രം ബാക്കിനിൽക്കെ, എൽഡിഎഫ് ക്യാമ്പുകളെ വിറപ്പിക്കുന്ന നിരീക്ഷണങ്ങളാണ് ജയശങ്കർ പങ്കുവെച്ചത്. ഇത്തവണത്തെ നിയമസഭാ തിരഞ്ഞെടുപ്പ് ഫലം പിണറായി സർക്കാരിന്റെ അഹങ്കാരത്തിനേൽക്കുന്ന കനത്ത പ്രഹരമായിരിക്കുമെന്നും അദ്ദേഹം പറഞ്ഞു. കഴിഞ്ഞ ലോക്‌സഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പിലും പ്രകടമായ ആ ജനരോഷം ഇത്തവണ പൂർണ്ണ ശക്തിയോടെ ആഞ്ഞടിക്കുമെന്നാണ് കണക്കുകൾ സൂചിപ്പിക്കുന്നത്.
ജാതിമത രാഷ്ട്രീയ ഭേദമില്ലാതെ കേരളത്തിലെ പൊതുസമൂഹം ഈ സർക്കാരിന്റെ അഴിമതിയിലും ധിക്കാരപരമായ സമീപനത്തിലും മടുത്തിരിക്കുകയാണ്. സ്വർണ്ണക്കടത്ത് മുതൽ മാസപ്പടി വിവാദം വരെ നീളുന്ന അഴിമതി പരമ്പരകളും, സാധാരണക്കാരന്റെ ജീവിതം ദുസ്സഹമാക്കിയ നികുതി വർദ്ധനവും പിണറായി ഭരണത്തിന് അന്ത്യം കുറിക്കുമെന്നും അദ്ദേഹം കൂട്ടിച്ചേർത്തു. ഭരണവിരുദ്ധ തരംഗം വെറുമൊരു വാക്കല്ല, മറിച്ച് നിശബ്ദമായ ഒരു ‘സുനാമി’യായി വോട്ടിംഗ് യന്ത്രങ്ങളിൽ പതിഞ്ഞിട്ടുണ്ടെന്നാണ് ജയശങ്കറിന്റെ വിലയിരുത്തൽ.
എൻഡിഎയുടെ കരുത്തുറ്റ സാന്നിധ്യവും കേന്ദ്ര സർക്കാരിന്റെ വികസന നയങ്ങളും ഈ തിരഞ്ഞെടുപ്പിൽ എൽഡിഎഫിന്റെ വോട്ട് ബാങ്കിൽ വിള്ളലുണ്ടാക്കിയിട്ടുണ്ട്. മുഖ്യമന്ത്രിയുടെ ഏകാധിപത്യ ഭരണത്തിനെതിരെ ജനാധിപത്യപരമായ ഒരു തിരുത്തൽ വായനയ്ക്കാണ് കേരളം ഒരുങ്ങുന്നത്. വോട്ടെണ്ണൽ കഴിയുമ്പോൾ ഇടതുകോട്ടകൾ തകർന്നടിയുമെന്നും പിണറായി വിജയൻ എന്ന ബിംബം തകരുമെന്നും അദ്ദേഹം പറഞ്ഞു. വോട്ടർമാർ മാറ്റത്തിനായി വോട്ട് ചെയ്തത് ഭരണമാറ്റത്തിന് മാത്രമല്ല, ഒരു രാഷ്ട്രീയ ശുദ്ധീകരണത്തിന് കൂടിയാണെന്നും ജയശങ്കർ ചൂണ്ടിക്കാട്ടി.
