ചെന്നൈ അന്താരാഷ്ട്ര വിമാനത്താവളത്തിൽ എയർ അറേബ്യ വിമാനത്തിൽ നാടകീയ രംഗങ്ങൾ. ഷാർജയിൽ നിന്നും ചെന്നൈയിലേക്ക് എത്തിയ വിമാനത്തിൽ നിന്നും ലാൻഡിംഗിന് പിന്നാലെ ഒരു യുവാവ് എമർജൻസി എക്സിറ്റിലൂടെ പുറത്തേക്ക് ചാടി. ഇന്ന് പുലർച്ചെയായിരുന്നു സംഭവം. വിമാനം റൺവേയിൽ നിന്നും ടാക്സി വേയിലൂടെ പാർക്കിംഗ് ബേയിലേക്ക് നീങ്ങുന്നതിനിടെയാണ് യാത്രക്കാരെയും ജീവനക്കാരെയും ഞെട്ടിച്ചുകൊണ്ട് ഇയാൾ എമർജൻസി വാതിൽ തുറന്ന് പുറത്തേക്ക് ചാടിയത്. വിമാനം പൂർണ്ണമായും നിശ്ചലമാകുന്നതിന് മുൻപായിരുന്നു ഈ സാഹസിക നീക്കം. പെട്ടെന്നുണ്ടായ ഈ പ്രവൃത്തി വിമാനത്തിനുള്ളിൽ വലിയ പരിഭ്രാന്തി സൃഷ്ടിച്ചു. ഉടൻ തന്നെ പൈലറ്റ് ഗ്രൗണ്ട് സെക്യൂരിറ്റിയെ വിവരം അറിയിക്കുകയും സിഐഎസ്എഫ് ഉദ്യോഗസ്ഥർ സ്ഥലത്തെത്തി യുവാവിനെ കസ്റ്റഡിയിലെടുക്കുകയുമായിരുന്നു.
യാത്രയ്ക്കിടെ യുവാവ് ശാരീരിക അസ്വസ്ഥതകൾ പ്രകടിപ്പിച്ചിരുന്നതായാണ് വിമാനത്താവള അധികൃതർ നൽകുന്ന പ്രാഥമിക വിവരം. വിമാനത്തിനുള്ളിൽ ഇയാൾ രണ്ട് തവണ ഛർദ്ദിച്ചിരുന്നതായും അസ്വസ്ഥനായി കാണപ്പെട്ടതായും സഹയാത്രക്കാർ മൊഴി നൽകിയിട്ടുണ്ട്. തന്റെ മാനസിക നില ശരിയല്ലെന്നും അസ്വസ്ഥത കാരണമാണ് ഇത്തരത്തിൽ പ്രവർത്തിച്ചതെന്നും യുവാവ് പോലീസിനോട് പറഞ്ഞതായാണ് സൂചന. വിമാനം പ്രധാന റൺവേയിൽ നിന്നും മാറിയ സമയത്തായതിനാൽ വലിയൊരു അപകടം ഒഴിവാകുകയായിരുന്നു. വിമാനത്തിന് കേടുപാടുകളോ മറ്റ് യാത്രക്കാർക്ക് പരിക്കുകളോ സംഭവിച്ചിട്ടില്ലെന്ന് ചെന്നൈ എയർപോർട്ട് ഉദ്യോഗസ്ഥർ സ്ഥിരീകരിച്ചു. കസ്റ്റഡിയിലെടുത്ത യുവാവിനെ വിശദമായ ചോദ്യം ചെയ്യലിനായി പോലീസിന് കൈമാറിയിരിക്കുകയാണ്. വിമാനത്തിന്റെ സുരക്ഷാ ക്രമീകരണങ്ങൾ ലംഘിച്ചതിനും യാത്രക്കാരുടെ ജീവൻ അപകടത്തിലാക്കിയതിനും ഇയാൾക്കെതിരെ നിയമനടപടികൾ സ്വീകരിക്കും. ചെന്നൈ വിമാനത്താവളത്തിൽ സമീപകാലത്തുണ്ടായ ഏറ്റവും ഗൗരവകരമായ സുരക്ഷാ ലംഘനങ്ങളിലൊന്നായി ഇതിനെ അധികൃതർ വിലയിരുത്തുന്നു. സംഭവത്തിൽ സിവിൽ ഏവിയേഷൻ ഡയറക്ടറേറ്റ് ജനറൽ (ഡിജിസിഎ) അന്വേഷണത്തിന് ഉത്തരവിട്ടിട്ടുണ്ട്. ഇയാളുടെ കൃത്യമായ പാസ്പോർട്ട് വിവരങ്ങളും പശ്ചാത്തലവും പോലീസ് പരിശോധിച്ചു വരികയാണ്.
