വിദേശമണ്ണിലും നാടൻ മാമ്പഴത്തിന്റെ മധുരം വിളമ്പി സോഷ്യൽ മീഡിയയിൽ തരംഗമാവുകയാണ് ഒരു ഇന്ത്യൻ വംശജൻ. അമേരിക്കയിലെ സാന്ഫ്രാൻസിസ്കോയിൽ മാമ്പഴക്ഷാമം പരിഹരിക്കാൻ ‘മാമ്പഴ പാർട്ടി’യുമായി രംഗത്തെത്തിയിരിക്കുകയാണ് ഈ യുവാവ്. കഴിഞ്ഞ മൂന്ന് വർഷമായി വിജയകരമായി നടത്തിവരുന്ന ഈ മാമ്പഴ സംഗമം ഈ മാസാവസാനം നാലാം വർഷത്തിലേക്ക് കടക്കുകയാണെന്ന് സംഘാടകൻ സോഷ്യൽ മീഡിയയിലൂടെ അറിയിച്ചു. “കഴിഞ്ഞ വർഷം ഞങ്ങൾ മാമ്പഴക്ഷാമം പരിഹരിച്ചു, ഇപ്പോൾ ഞങ്ങൾ വീണ്ടും തിരിച്ചെത്തിയിരിക്കുന്നു” എന്ന കുറിപ്പോടെയാണ് ഇദ്ദേഹം മാമ്പഴ പാർട്ടിയുടെ വിശേഷങ്ങൾ പങ്കുവെച്ചത്. ഇന്ത്യയിൽ നിന്നുള്ള വൈവിധ്യമാർന്ന മാമ്പഴങ്ങൾ ആസ്വദിക്കാൻ നൂറുകണക്കിന് ആളുകളാണ് ഇവിടേക്ക് ഒഴുകിയെത്തുന്നത്.
അമേരിക്കയിൽ ഇന്ത്യൻ മാമ്പഴങ്ങൾക്ക് പ്രിയമേറുന്ന സാഹചര്യത്തിലാണ് ഇത്തരമൊരു ആഘോഷം ശ്രദ്ധേയമാകുന്നത്. വെർജീനിയയിൽ ഇംപോർട്ട് ബിസിനസ് നടത്തുന്ന സമീർ ഫനാസെയെ പോലുള്ളവർ പറയുന്നത്, മാമ്പഴം എത്തുന്നതിന് മുൻപേ ഓർഡറുകൾ കുമിഞ്ഞുകൂടുകയാണെന്നാണ്. മെക്സിക്കൻ മാമ്പഴങ്ങൾ കഴിച്ചു വളർന്നവർ പോലും ഇപ്പോൾ ഇന്ത്യൻ മാമ്പഴങ്ങളുടെ ആരാധകരായി മാറിയിരിക്കുന്നു. 2007-ൽ ഇന്ത്യൻ മാമ്പഴങ്ങൾക്കുള്ള നിരോധനം നീക്കിയതു മുതൽ അമേരിക്കയിലേക്ക് ഇവ എത്തിക്കുന്ന ഭാസ്കർ സവാനിയുടെ അഭിപ്രായത്തിൽ, മാമ്പഴത്തിന് പ്രത്യേകിച്ച് മാർക്കറ്റിംഗ് ഒന്നും ആവശ്യമില്ല,
കാരണം അത് ‘ദൈവത്തിന്റെ ഫലം’ ആണ്. സോഷ്യൽ മീഡിയയിൽ വൈറലായ മാമ്പഴ പാർട്ടിയുടെ ചിത്രങ്ങൾ വലിയ നൊസ്റ്റാൾജിയയാണ് പ്രവാസികൾക്കിടയിൽ ഉണ്ടാക്കുന്നത്. “എന്റെ മുത്തശ്ശി തൊലി കളഞ്ഞു തന്നിരുന്ന മാമ്പഴമാണ് ലോകത്തിലെ ഏറ്റവും വലിയ രുചി” എന്നിങ്ങനെയുള്ള വൈകാരികമായ കമന്റുകളാണ് പോസ്റ്റിന് താഴെ വരുന്നത്. വിദേശ രാജ്യങ്ങളിൽ ഇന്ത്യൻ സംസ്കാരത്തിന്റെയും രുചിയുടെയും വക്താക്കളായി മാമ്പഴം മാറുന്ന കാഴ്ചയാണ് ഇപ്പോൾ കാണാൻ സാധിക്കുന്നത്.
