മുംബൈ ഇന്ത്യൻസ് നായകൻ രോഹിത് ശർമ്മയുടെ കോടിക്കണക്കിന് രൂപ വിലമതിക്കുന്ന വാച്ച് തട്ടിയെടുക്കാൻ ആരാധകർ ശ്രമിച്ചെന്ന വാർത്ത സോഷ്യൽ മീഡിയയിൽ കാട്ടുതീ പോലെ പടരുന്നു. കാറിനുള്ളിൽ ഇരിക്കുകയായിരുന്ന രോഹിത്തിന്റെ കൈയിൽ കടന്നുപിടിക്കാനും വാച്ച് അഴിച്ചെടുക്കാനും ശ്രമിക്കുന്ന ദൃശ്യങ്ങൾ വൈറലായതോടെ കായിക ലോകത്ത് വലിയ ചർച്ചകൾക്കാണ് വഴിതുറന്നിരിക്കുന്നത്.
തന്റെ കാറിനുള്ളിലിരുന്ന് പുറത്തുള്ള ആരാധകർക്ക് നേരെ കൈവീശുകയായിരുന്നു രോഹിത് ശർമ്മ. എന്നാൽ പെട്ടെന്ന് രണ്ട് യുവാക്കൾ കാറിനടുത്തേക്ക് വരികയും രോഹിത്തിന്റെ കൈയിൽ ബലമായി പിടിക്കാൻ ശ്രമിക്കുകയുമായിരുന്നു. ഇതിനിടെ ഒരാൾ താരത്തിന്റെ വാച്ച് അഴിച്ചെടുക്കാൻ ശ്രമിക്കുന്നത് വീഡിയോയിൽ വ്യക്തമാണ്.
രോഹിത് ധരിച്ചിരുന്നത് ‘റോളക്സ് ജിറാഫ്’ (Rolex Giraffe) എന്ന മോഡൽ വാച്ചാണെന്നാണ് റിപ്പോർട്ടുകൾ. ഏകദേശം 3.25 കോടി രൂപ ഇതിന് വിലവരുമെന്നാണ് സോഷ്യൽ മീഡിയയിലെ സംസാരം. എന്നാൽ ഇതിൽ ഔദ്യോഗിക സ്ഥിരീകരണമില്ല. യുവാക്കൾ വാച്ചിൽ പിടിച്ചതോടെ രോഹിത് ഉടൻ തന്നെ കൈ പിൻവലിക്കുകയും കാറിന്റെ വിൻഡോ ഗ്ലാസ് ഉയർത്തുകയും ചെയ്തു. ആരാധകർ അതിരുവിടരുതെന്ന് അദ്ദേഹം ആംഗ്യത്തിലൂടെ വ്യക്തമാക്കുന്നതും ദൃശ്യങ്ങളിലുണ്ട്.
ഇങ്ങനെയുള്ള വിവാദം പുകയുമ്പോഴും കളിക്കളത്തിൽ രോഹിത് മിന്നും ഫോമിലാണ്. ലഖ്നൗവിനെതിരായ മത്സരത്തിൽ 44 പന്തിൽ 84 റൺസെടുത്ത രോഹിത്തിന്റെ പ്രകടനമാണ് മുംബൈയ്ക്ക് വിജയം സമ്മാനിച്ചത്. സീസണിൽ 10 മത്സരങ്ങളിൽ 7 തോൽവികളുമായി മുംബൈ ഇന്ത്യൻസ് പോയിന്റ് പട്ടികയിൽ പിന്നിലാണ്. ശനിയാഴ്ച ആർ.സി.ബിക്കെതിരായ മത്സരത്തിൽ വിജയിച്ചാൽ മാത്രമേ മുംബൈയുടെ പ്ലേ ഓഫ് പ്രതീക്ഷകൾ സജീവമാകൂ.
Rohit Sharma Fans tried to snatch his 3.25 Cr "Giraffe" watch from his wrist. And suddenly he close the mirror. pic.twitter.com/vMIQFxcdxt
— Aman (@Proteinkohli) May 8, 2026
