ഐ.പി.എൽ 2026-ൽ നിന്നും മുംബൈ ഇന്ത്യൻസ് പുറത്തായതിന് പിന്നാലെ ക്യാപ്റ്റൻ ഹാർദിക് പാണ്ഡ്യയുടെ ഇൻസ്റ്റാഗ്രാം ആക്റ്റിവിറ്റിയെച്ചൊല്ലി സോഷ്യൽ മീഡിയയിൽ വൻ ചർച്ചകൾ. ഹാർദിക് മുംബൈ ഇന്ത്യൻസിനെ അൺഫോളോ ചെയ്തെന്നും പിന്നീട് മിനിറ്റുകൾക്കുള്ളിൽ തിരികെ ഫോളോ ചെയ്തെന്നുമാണ് ആരാധകർക്കിടയിലെ സംസാരം.
റോയൽ ചലഞ്ചേഴ്സ് ബെംഗളൂരുവിനോട് തോറ്റതോടെയാണ് മുംബൈ ഇന്ത്യൻസ് പ്ലേ ഓഫ് കാണാതെ പുറത്തായത്. ഈ മത്സരത്തിന് തൊട്ടുപിന്നാലെയാണ് ഹാർദിക് പാണ്ഡ്യ തന്റെ ഫ്രാഞ്ചൈസിയെ ഇൻസ്റ്റാഗ്രാമിൽ അൺഫോളോ ചെയ്തതായി ആരാധകർ ശ്രദ്ധിച്ചത്. മത്സരത്തിന് ശേഷം ഹാർദിക്കിന്റെ പ്രൊഫൈലിൽ ഫോളോയിംഗ് ലിസ്റ്റ് 150 ആയി കുറഞ്ഞെന്നും അതിൽ മുംബൈ ഇന്ത്യൻസ് ഉണ്ടായിരുന്നില്ലെന്നും ആരാധകർ സ്ക്രീൻഷോട്ട് സഹിതം വാദിക്കുന്നു. എന്നാൽ മിനിറ്റുകൾക്കുള്ളിൽ ഇത് 151 ആയി മാറുകയും മുംബൈ ഇന്ത്യൻസ് ലിസ്റ്റിൽ തിരികെ എത്തുകയും ചെയ്തു.
ഇത് അബദ്ധത്തിൽ സംഭവിച്ചതാണോ, അതോ തോൽവിക്ക് പിന്നാലെയുണ്ടായ പെട്ടെന്നുള്ള ദേഷ്യത്തിൽ ചെയ്തതാണോ എന്ന കാര്യത്തിൽ വ്യക്തതയില്ല. ഹാർദിക്കോ മുംബൈ മാനേജ്‌മെന്റോ ഇതിനോട് ഔദ്യോഗികമായി പ്രതികരിച്ചിട്ടില്ല. ഈ സീസൺ ഹാർദിക്കിനും മുംബൈയ്ക്കും ഒരുപോലെ കഷ്ടകാലമായിരുന്നു. പരിക്കിനെത്തുടർന്ന് ഹാർദിക്കിന് പല മത്സരങ്ങളും നഷ്ടമായി. കളിച്ച എട്ട് മത്സരങ്ങളിൽ നിന്ന് വെറും 146 റൺസും 4 വിക്കറ്റും മാത്രമാണ് താരത്തിന് നേടാനായത്. ഹാർദിക്കിന്റെ അഭാവത്തിൽ സൂര്യകുമാർ യാദവാണ് ടീമിനെ നയിച്ചത്.
നേരത്തെ രോഹിത് ശർമ്മയെ മാറ്റി ഹാർദിക്കിനെ ക്യാപ്റ്റനാക്കിയപ്പോൾ തന്നെ ആരാധകർക്കിടയിൽ വലിയ പ്രതിഷേധം ഉണ്ടായിരുന്നു. ഇപ്പോൾ ടീം പ്ലേ ഓഫ് കാണാതെ പുറത്തായതോടെ ഹാർദിക്കിന്റെ ക്യാപ്റ്റൻസി വീണ്ടും ചോദ്യം ചെയ്യപ്പെടുകയാണ്. എങ്കിലും മാനേജ്‌മെന്റ് ഇപ്പോഴും ഹാർദിക്കിനെ പിന്തുണയ്ക്കുന്നു എന്നാണ് പുറത്തുവരുന്ന റിപ്പോർട്ടുകൾ.
