ആവേശകരമായ പോരാട്ടത്തിൽ മുംബൈ ഇന്ത്യൻസിനെ കീഴടക്കിയതിന് പിന്നാലെ, ഗോൾഡൻ ഡക്കായ വിരാട് കോഹ്‌ലിയെ പിന്തുണച്ച് ആർസിബി താരം ക്രുണാൽ പാണ്ഡ്യ രംഗത്ത്. റായ്പൂരിലെ കഠിനമായ പിച്ചിൽ തകർപ്പൻ ബാറ്റിംഗ് പ്രകടനം പുറത്തെടുത്ത ക്രുണാൽ , കോഹ്‌ലി ശക്തമായി തിരിച്ചുവരുമെന്ന ആത്മവിശ്വാസം പ്രകടിപ്പിച്ചു.
മുംബൈ ഇന്ത്യൻസിനെതിരായ മത്സരത്തിൽ തുടർച്ചയായ രണ്ടാം തവണയും ആദ്യ പന്തിൽ പുറത്തായ വിരാട് കോഹ്‌ലിയുടെ ഫോമിൽ ആർസിബി ക്യാമ്പിന് ആശങ്കയില്ലെന്ന് ഓൾറൗണ്ടർ ക്രുനാൽ പാണ്ഡ്യ. ഒരു ചാമ്പ്യൻ പ്ലെയർ പരാജയപ്പെടുമ്പോൾ താൻ കൂടുതൽ ആവേശഭരിതനാകാറുണ്ടെന്നും, അയാൾ കൂടുതൽ കരുത്തോടെ തിരിച്ചുവരുമെന്ന് തനിക്ക് ഉറപ്പാണെന്നും ക്രുണാൽ പറഞ്ഞു.
ഈ സീസണിൽ 11 ഇന്നിംഗ്സുകളിൽ നിന്ന് 42.11 ശരാശരിയിൽ 379 റൺസ് കോഹ്‌ലി നേടിയിട്ടുണ്ട്. അമിതമായ ആക്രമണ ശൈലി കാരണമാണ് കഴിഞ്ഞ മൂന്ന് ഇന്നിംഗ്സുകളിലായി 28 റൺസ് മാത്രം നേടി താരം പുറത്തായത്. “വിരാട് ഒരു വ്യത്യസ്തനായ കളിക്കാരനാണ്, അദ്ദേഹത്തിന് റൺസിനോടുള്ള വിശപ്പ് വലുതാണ്. വരും മത്സരങ്ങളിൽ വിരാട് കോഹ്‌ലി ‘വിരാട് കോഹ്‌ലി കാര്യങ്ങൾ’ തന്നെ ചെയ്യുമെന്ന് എനിക്ക് ഉറപ്പാണ്” – ക്രുണാൽ വ്യക്തമാക്കി.
167 റൺസ് വിജയലക്ഷ്യം പിന്തുടർന്ന ആർസിബിക്ക് വേണ്ടി 46 പന്തിൽ 73 റൺസാണ് ക്രുനാൽ നേടിയത്. ഇതിൽ നാല് ഫോറുകളും അഞ്ച് സിക്സറുകളും ഉൾപ്പെടുന്നു. കഴിഞ്ഞ സീസണിൽ ഡൽഹി ക്യാപിറ്റൽസിനെതിരെ നേടിയ ഇന്നിംഗ്സിനെക്കാൾ സ്പെഷ്യലാണ് ഇതെന്നും, സമ്മർദ്ദഘട്ടത്തിൽ ടീമിനെ വിജയത്തിലെത്തിക്കാൻ കഴിഞ്ഞതിൽ സന്തോഷമുണ്ടെന്നും അദ്ദേഹം പറഞ്ഞു.
ജേക്കബ് ബെഥേൽ (26), ജിതേഷ് ശർമ്മ (18) എന്നിവർക്കൊപ്പം ചേർന്ന് ക്രുണാൽ നടത്തിയ പോരാട്ടമാണ് ആർസിബിയെ വിജയത്തിന് അരികിലെത്തിച്ചത്. ഈ വിജയത്തോടെ ഏഴ് ജയങ്ങളുമായി ആർസിബി പോയിന്റ് പട്ടികയിൽ ഒന്നാം സ്ഥാനത്ത് തുടരുന്നു. എട്ട് തോൽവികൾ വഴങ്ങിയ മുംബൈ ഇന്ത്യൻസും ലക്നൗ സൂപ്പർ ജയന്റ്സും പ്ലേ ഓഫ് കാണാതെ പുറത്തായി.
