ഇന്ത്യൻ ക്രിക്കറ്റിലെ എക്കാലത്തെയും മികച്ച നായകന്മാരിലൊരാളായ സൗരവ് ഗാംഗുലി, തന്റെ വിശ്വസ്തനായ സഹതാരം രാഹുൽ ദ്രാവിഡിനെക്കുറിച്ച് പങ്കുവെച്ച രസകരമായ ഒരു പഴയ തന്ത്രം വീണ്ടും ചർച്ചയാകുന്നു. 2003 ലോകകപ്പിന് മുന്നോടിയായി ഇന്ത്യൻ ടീമിന്റെ ഘടന തന്നെ മാറ്റിയെഴുതിയ ആ തീരുമാനത്തെക്കുറിച്ച് ഗാംഗുലി മനസ്സ് തുറക്കുന്നു.
രാഹുൽ ദ്രാവിഡിനെ ഏകദിന ടീമിൽ നിലനിർത്താൻ താൻ നടത്തിയ വലിയൊരു പരീക്ഷണത്തെക്കുറിച്ച് വെളിപ്പെടുത്തിയിരിക്കുകയാണ് മുൻ ബിസിസിഐ പ്രസിഡന്റും ഇന്ത്യൻ മുൻ നായകനുമായ സൗരവ് ഗാംഗുലി. രാജ് ഷമാനിയുടെ പോഡ്കാസ്റ്റിലാണ് ഗാംഗുലി പഴയ കാര്യങ്ങൾ പങ്കുവെച്ചത്. 2000-ങ്ങളുടെ തുടക്കത്തിൽ രാഹുൽ ദ്രാവിഡിന്റെ ഏകദിന കരിയർ വലിയ വെല്ലുവിളി നേരിട്ടിരുന്നു. ദ്രാവിഡിന്റെ ‘സ്ട്രൈക്ക് റേറ്റ്’ മോശമാണെന്നും അദ്ദേഹത്തിന് പകരം വേറെ ആളെ നോക്കണമെന്നും സെലക്ടർമാർ പറഞ്ഞിരുന്ന കാലമായിരുന്നു അത്.
“അന്ന് ഞാൻ ദ്രാവിഡിനെ കൈവിട്ടിരുന്നെങ്കിൽ ഒരുപക്ഷേ അദ്ദേഹത്തിന്റെ ഏകദിന കരിയർ അവിടെ അവസാനിക്കുമായിരുന്നു. പക്ഷേ എനിക്ക് അദ്ദേഹത്തിൽ വിശ്വാസമുണ്ടായിരുന്നു,” ഗാംഗുലി പറഞ്ഞു. അക്കാലത്ത് മറ്റ് രാജ്യങ്ങൾക്കെല്ലാം ബാറ്റിംഗ് കൂടി അറിയാവുന്ന വിക്കറ്റ് കീപ്പർമാരുണ്ടായിരുന്നു. ഓസ്ട്രേലിയയ്ക്ക് ആദം ഗിൽക്രിസ്റ്റും, ദക്ഷിണാഫ്രിക്കയ്ക്ക് മാർക്ക് ബൗച്ചറും, ശ്രീലങ്കയ്ക്ക് കുമാർ സങ്കക്കാരയും ഉണ്ടായിരുന്നു. എന്നാൽ ഇന്ത്യയ്ക്ക് അത്തരമൊരു വിക്കറ്റ് കീപ്പർ ഉണ്ടായിരുന്നില്ല. ആറാമത്തെ ബാറ്ററോടെ ഇന്ത്യയുടെ ബാറ്റിംഗ് അവസാനിച്ചിരുന്നു. ഇതിന് പരിഹാരമായാണ് ദ്രാവിഡിനെ വിക്കറ്റ് കീപ്പറാക്കാൻ ഗാംഗുലി തീരുമാനിച്ചത്.
ദ്രാവിഡ് വിക്കറ്റ് കീപ്പർ ആയതോടെ ഇന്ത്യയ്ക്ക് ഒരു അധിക സ്പെഷ്യലിസ്റ്റ് ബാറ്ററെ കൂടി ടീമിൽ ഉൾപ്പെടുത്താൻ കഴിഞ്ഞു. മുഹമ്മദ് കൈഫിനെപ്പോലെയുള്ള താരങ്ങൾ വന്നതോടെ ഇന്ത്യയുടെ ബാറ്റിംഗ് ഏഴാം നമ്പർ വരെ നീണ്ടു. കൂടാതെ, മികച്ച ഓൾറൗണ്ടർമാരുടെ അഭാവം പരിഹരിക്കാൻ സച്ചിൻ, സെവാഗ്, യുവരാജ് എന്നിവർക്കൊപ്പം താനും പാർട്ട് ടൈം ബൗളർമാരായി മാറി ടീമിനെ ബാലൻസ് ചെയ്തുവെന്നും ഗാംഗുലി ഓർത്തെടുത്തു. വലിയ റിസ്ക് എടുത്ത് നടത്തിയ ഈ പരീക്ഷണം 2003 ലോകകപ്പിൽ ഇന്ത്യയെ ഫൈനലിൽ വരെ എത്തിക്കുന്നതിൽ നിർണ്ണായക പങ്കുവഹിച്ചു. ഒരു സാധാരണ വിക്കറ്റ് കീപ്പർ അല്ലാതിരുന്നിട്ടും ടീമിന് വേണ്ടി ആ വെല്ലുവിളി ഏറ്റെടുക്കാൻ ദ്രാവിഡ് തയ്യാറായതാണ് വഴിത്തിരിവായത്.
