മലയാളി ക്രിക്കറ്റ് താരം സഞ്ജു സാംസണും സംവിധായകനും നടനുമായ ബേസിൽ ജോസഫും തമ്മിലുള്ള സൗഹൃദം ഇതിനോടകം തന്നെ ആരാധകർക്കിടയിൽ ചർച്ചയാണ്. ബേസിൽ ജോസഫ് പ്രധാന വേഷത്തിലെത്തുന്ന ‘അതിരടി’ എന്ന ചിത്രത്തിന്റെ പ്രീ-റിലീസ് ചടങ്ങിൽ സഞ്ജു പങ്കുവെച്ച രസകരമായ കാര്യങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ചെന്നൈയിൽ നടന്ന ചിത്രത്തിന്റെ പ്രീ-റിലീസ് ചടങ്ങിലാണ് സഞ്ജുവും ബേസിലും തങ്ങളുടെ സൗഹൃദത്തെക്കുറിച്ചും സിനിമയെക്കുറിച്ചും മനസ്സ് തുറന്നത്. ചിത്രത്തിൽ സഞ്ജു സാംസണെ ഒരു വേഷം ചെയ്യാൻ ക്ഷണിച്ചിരുന്നുവെന്നും എന്നാൽ താരം അത് നിരസിച്ചുവെന്നും ബേസിൽ ജോസഫ് ചടങ്ങിൽ വെളിപ്പെടുത്തി. ഇതിന് സഞ്ജു നൽകിയ മറുപടിയാണ് എല്ലാവരെയും ചിരിപ്പിച്ചത്. “സിനിമയിൽ ഒരു ചെറിയ വേഷമാണ് അവർ എനിക്ക് ഓഫർ ചെയ്തത്. പക്ഷേ ഞാൻ അഭിനയിക്കുന്നുണ്ടെങ്കിൽ അത് കുറച്ചുകൂടി വലിയ റോളായിരിക്കണം എന്ന് ഞാൻ പറഞ്ഞു,” സഞ്ജു ചിരിച്ചുകൊണ്ട് പറഞ്ഞു.
“ബേസിൽ എന്റെ അടുത്ത സുഹൃത്താണ്. പുറമെ വളരെ കാഷ്വൽ ആയി തോന്നുമെങ്കിലും ജോലിയുടെ കാര്യത്തിൽ ബേസിൽ അതീവ ഗൗരവക്കാരനാണ്. തന്റെ ഷെഡ്യൂളുകൾ കൃത്യമായി പ്ലാൻ ചെയ്യുന്ന വ്യക്തിയാണ് അദ്ദേഹം. ഞാൻ ഏതെങ്കിലും ടൂർണമെന്റ് കഴിഞ്ഞ് വന്ന് ബേസിലിനെ ഡിന്നറിന് വിളിച്ചാൽ, ഒരു വാരം മുൻപേ പറയണ്ടേ എന്നാണ് അവൻ ചോദിക്കാറുള്ളത്. അത്രയും തിരക്കുള്ള നടനായി അവൻ മാറി.”സഞ്ജു പറഞ്ഞു.
ക്രിക്കറ്റും സിനിമയും തങ്ങൾ എങ്ങനെയാണ് പരസ്പരം ചർച്ച ചെയ്യാറുള്ളതെന്നും സഞ്ജു വ്യക്തമാക്കി. “ഓരോ കളി കഴിയുമ്പോഴും ബേസിൽ എന്നെ വിളിക്കും. ആ ഷോട്ട് കളിക്കേണ്ടിയിരുന്നില്ല അല്ലെങ്കിൽ ഈ ഷോട്ട് കളിക്കാമായിരുന്നു എന്നൊക്കെ ഉപദേശം തരും. അതുപോലെ ഞാൻ ഈ സിനിമ കണ്ടിട്ട് ഇതിലെ ഈ സീൻ ശരിയായില്ല എന്ന് അവനോട് പറയും,” സഞ്ജു പറഞ്ഞു. മിന്നൽ മുരളി കണ്ടതിന് ശേഷം താൻ ബേസിലിന്റെ വലിയ ആരാധകനായെന്നും സഞ്ജു കൂട്ടിച്ചേർത്തു.
അരുൺ അനിരുദ്ധൻ സംവിധാനം ചെയ്യുന്ന ‘അതിരടി’യിൽ ടൊവിനോ തോമസ്, വിനീത് ശ്രീനിവാസൻ എന്നിവരും പ്രധാന വേഷങ്ങളിൽ എത്തുന്നുണ്ട്. മലയാളം ഉൾപ്പെടെ അഞ്ച് ഭാഷകളിലായി ചിത്രം ഉടൻ തിയേറ്ററുകളിൽ എത്തും.
