നവകേരള സദസ്സിനിടെ കറുത്ത കൊടി കാട്ടിയ യൂത്ത് കോൺഗ്രസ് – കെഎസ്യു പ്രവർത്തകരെ ക്രൂരമായി മർദ്ദിച്ച സംഭവത്തിൽ ഒടുവിൽ അന്വേഷണം മുറുകുമ്പോൾ മുൻ മുഖ്യമന്ത്രി പിണറായി വിജയന്റെ സുരക്ഷാ സംഘത്തിൽ പുതിയ നീക്കങ്ങൾ. അന്ന് അക്രമത്തിന് നേതൃത്വം നൽകുകയും പിന്നീട് മുഖ്യമന്ത്രി ‘രക്ഷാപ്രവർത്തകർ’ എന്ന് വിശേഷിപ്പിക്കുകയും ചെയ്ത സുരക്ഷാ ഉദ്യോഗസ്ഥരിൽ രണ്ടുപേരെ അദ്ദേഹത്തിന്റെ സുരക്ഷാസംഘത്തിൽ തന്നെ നിലനിർത്താൻ വൻ സമ്മർദ്ദം. യുഡിഎഫ് സർക്കാർ അധികാരമേറ്റയുടൻ ഈ മർദ്ദനക്കേസിൽ പ്രത്യേക ക്രൈംബ്രാഞ്ച് അന്വേഷണം (SIT) പ്രഖ്യാപിച്ചതിന് പിന്നാലെയാണ്, നടപടി ഭയന്ന് ഈ ഉദ്യോഗസ്ഥർ പോലീസ് സംഘടനകൾ വഴി രാഷ്ട്രീയ സ്വാധീനം ചെലുത്താൻ തുടങ്ങിയത്.
2023 ഡിസംബറിൽ ആലപ്പുഴയിൽ വെച്ചായിരുന്നു കേരള രാഷ്ട്രീയത്തെ പിടിച്ചുലച്ച മർദ്ദനം അരങ്ങേറിയത്. നവകേരള സദസ്സിന്റെ ബസിന് നേരെ കറുത്ത കൊടി കാട്ടിയ അന്നത്തെ കെഎസ്യു ജില്ലാ പ്രസിഡന്റും ഇന്നത്തെ ആലപ്പുഴ എംഎൽഎയുമായ എ.ഡി. തോമസ്, യൂത്ത് കോൺഗ്രസ് സംസ്ഥാന സെക്രട്ടറി അജയ് ജുവൽ കുര്യാക്കോസ് എന്നിവരെ പോലീസുകാർ തടഞ്ഞുമാറ്റിയിരുന്നു. എന്നാൽ ഇവർക്ക് നേരെ മുഖ്യമന്ത്രിയുടെ അകമ്പടി വാഹനത്തിൽ നിന്നിറങ്ങിയ ഗൺമാൻ അനിൽകുമാറും സുരക്ഷാ ഉദ്യോഗസ്ഥനായ എസ്. സന്ദീപും ചേർന്ന് ലാത്തി ഉപയോഗിച്ച് ക്രൂരമായി മർദ്ദിക്കുകയായിരുന്നു. തലയ്ക്കും കൈയ്ക്കും ഗുരുതരമായി പരിക്കേറ്റ ഈ സംഭവം വൻ വിവാദമായെങ്കിലും, അവർ ചെയ്തത് അക്രമമല്ലെന്നും തന്റെ ജീവൻ രക്ഷിക്കാനുള്ള ‘രക്ഷാപ്രവർത്തനം’ ആയിരുന്നു എന്നുമാണ് പിണറായി വിജയൻ അന്ന് ന്യായീകരിച്ചത്.
എന്നാൽ ഭരണം മാറിയതോടെ കഥ മാറി. വി.ഡി. സതീശൻ മുഖ്യമന്ത്രിയായി ചുമതലയേറ്റതിന് പിന്നാലെ ഈ കേസ് വീണ്ടും അന്വേഷിക്കാൻ ക്രൈംബ്രാഞ്ച് എസ്പി ഷൗക്കത്തലിയുടെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ചു. അന്വേഷണം വേഗത്തിലാക്കാനും കർശന നടപടി സ്വീകരിക്കാനും പുതിയ സർക്കാർ നിർദ്ദേശം നൽകിയതോടെയാണ് പ്രതിക്കൂട്ടിലുള്ള ഉദ്യോഗസ്ഥർക്ക് മേൽ ഭയം നിഴലിക്കാൻ തുടങ്ങിയത്. മുൻ മുഖ്യമന്ത്രിയുടെ പേഴ്സണൽ സെക്യൂരിറ്റി ടീമിൽ തുടർന്നുപോയാൽ സർക്കാരിന്റെ നേരിട്ടുള്ള വകുപ്പുതല നടപടികളിൽ നിന്നും അറസ്റ്റിൽ നിന്നും ഒരു പരിധി വരെ രക്ഷപ്പെടാം എന്ന കണക്കുകൂട്ടലിലാണ് ഉദ്യോഗസ്ഥർ.
