അക്കൗണ്ട് പൂട്ടിയത് ശരിയല്ല, യുവാക്കളുടെ വായടയ്ക്കരുത്; കോക്രോച്ച് ജനതാ പാർട്ടിക്ക് പിന്തുണയുമായി ശശി തരൂർ; ഒപ്പം കൂട്ടാൻ പ്രതിപക്ഷത്തിന് ഉപദ്ദേശവും

ഇന്റർനെറ്റിൽ വൻ തരംഗമായി മാറിയ പരിഹാസ പ്ലാറ്റ്‌ഫോമായ ‘കോക്രോച്ച് ജനതാ പാർട്ടി’യുടെ എക്സ് അക്കൗണ്ട് ഇന്ത്യയിൽ റദ്ദാക്കിയ കേന്ദ്ര സർക്കാർ നടപടിക്കെതിരെ കടുത്ത വിമർശനവുമായി കോൺഗ്രസ് എം.പി ശശി തരൂർ രംഗത്ത്. അക്കൗണ്ട് പൂട്ടിപ്പൂട്ടിയ നടപടി തികച്ചും വിനാശകരവും വിവേകശൂന്യവുമാണെന്ന് വിശേഷിപ്പിച്ച തരൂർ, യുവാക്കൾക്ക് തങ്ങളുടെ വികാരങ്ങൾ പ്രകടിപ്പിക്കാനുള്ള ഒരിടം വേണമെന്നും വ്യക്തമാക്കി.

വെറും അഞ്ച് ദിവസം കൊണ്ട് ഇൻസ്റ്റാഗ്രാമിൽ 19 മില്യൺ ഫോളോവേഴ്‌സ് എന്ന അവിശ്വസനീയമായ നേട്ടത്തിലേക്ക് കുതിക്കുന്ന കോക്രോച്ച് ജനതാ പാർട്ടിയുടെ വളർച്ചയിൽ താൻ ഏറെ ആകർഷിതനാണെന്ന് ശശി തരൂർ തന്റെ എക്സ് പോസ്റ്റിലൂടെ വ്യക്തമാക്കി. രണ്ട് ലക്ഷത്തിലധികം ഫോളോവേഴ്‌സുള്ള സി.ജെ.പി.യുടെ എക്സ് അക്കൗണ്ട് കഴിഞ്ഞ ബുധനാഴ്ചയാണ് നിയമപരമായ ആവശ്യത്തെത്തുടർന്ന് ഇന്ത്യയിൽ ബ്ലോക്ക് ചെയ്തത്.

“ഇത്രയും കുറഞ്ഞ ദിവസങ്ങൾക്കുള്ളിൽ ഈ പ്ലാറ്റ്‌ഫോം കൈവരിച്ച വളർച്ച എന്നെ അത്ഭുതപ്പെടുത്തുന്നു. യുവാക്കളുടെ നിരാശയും എന്തുകൊണ്ടാണ് അവർ ഈ പേജിനോട് ഇത്രയധികം അടുക്കുന്നതെന്നും എനിക്ക് മനസ്സിലാക്കാൻ സാധിക്കും. അതുകൊണ്ട് തന്നെ ഇതിന്റെ അക്കൗണ്ട് റദ്ദാക്കിയത് വലിയ തെറ്റാണ്. യുവാക്കൾക്ക് അവരുടെ വികാരങ്ങൾ പ്രകടിപ്പിക്കാൻ ഒരിടം വേണം, അതിനാൽ സി.ജെ.പി അക്കൗണ്ട് പൂട്ടിപ്പൂട്ടുന്നതിന് പകരം അത് പ്രവർത്തിക്കാൻ അനുവദിക്കണം,” തരൂർ ആവശ്യപ്പെട്ടു.

ജനാധിപത്യ രാജ്യങ്ങളിൽ വിയോജിപ്പുകൾക്കും തമാശകൾക്കും പരിഹാസങ്ങൾക്കും നിരാശ പ്രകടിപ്പിക്കാനുമുള്ള സ്വാതന്ത്ര്യം അനിവാര്യമാണെന്ന് അദ്ദേഹം ഓർമ്മിപ്പിച്ചു. ഈ പ്രസ്ഥാനത്തിന്റെ ഭാവി എന്താകുമെന്ന് അറിയില്ലെങ്കിലും ഇതിന് പിന്നിലുള്ള യുവാക്കൾ തങ്ങളുടെ ഊർജ്ജം മുഖ്യധാര രാഷ്ട്രീയത്തിലേക്ക് കൊണ്ടുവരുമെന്ന് തരൂർ പ്രത്യാശ പ്രകടിപ്പിച്ചു. വോട്ട് രേഖപ്പെടുത്തിക്കൊണ്ട് മാറ്റത്തിന്റെ ശബ്ദമാകാൻ അദ്ദേഹം യുവാക്കളോട് ആഹ്വാനം ചെയ്തു. ഒപ്പം, ഈ വൻ തരംഗം ഒരു അവസരമായി കണ്ട് യുവാക്കളെ തങ്ങളിലേക്ക് ആകർഷിക്കാൻ പ്രതിപക്ഷ പാർട്ടികൾ മടിക്കരുത് എന്ന ഉപദേശവും തരൂർ നൽകി.

വെറും അഞ്ച് ദിവസം മുൻപ് ഇന്റർനെറ്റിൽ പ്രത്യക്ഷപ്പെട്ട ഈ പ്ലാറ്റ്‌ഫോം തങ്ങളെ വിശേഷിപ്പിക്കുന്നത് “യുവാക്കളുടെ, യുവാക്കൾക്ക് വേണ്ടിയുള്ള, യുവാക്കൾ നയിക്കുന്ന രാഷ്ട്രീയ മുന്നണി” എന്നാണ്. “മടിയന്മാരുടെയും തൊഴിലില്ലാത്തവരുടെയും ശബ്ദം” എന്നാണ് ഇവർ സ്വയം പ്രഖ്യാപിച്ചിരിക്കുന്നത്. യു.എസിൽ പബ്ലിക് റിലേഷൻസ് പഠനം പൂർത്തിയാക്കിയ അഭീജീത് ദിപ്കെയാണ് ഇതിന്റെ സ്ഥാപകൻ.