തുടർച്ചയായ രണ്ട് മത്സരങ്ങളിൽ സായ് സുദർശൻ ‘ഹിറ്റ്-വിക്കറ്റ്’ ആയി പുറത്തായത് ക്രിക്കറ്റ് ലോകത്തെ അമ്പരപ്പിച്ചിരിക്കുകയാണ്. ഐ.പി.എൽ ക്വാളിഫയർ 1-ൽ റോയൽ ചലഞ്ചേഴ്സ് ബെംഗളൂരുവിനെതിരെയും, ക്വാളിഫയർ 2-ൽ രാജസ്ഥാൻ റോയൽസിനെതിരെയും സായ് സുദർശൻ ഇതേ രീതിയിൽ പുറത്തായി. ഷോട്ടുകൾ കളിക്കുന്നതിനിടയിൽ കൈയിൽ നിന്ന് ബാറ്റ് വഴുതിപ്പോയി സ്റ്റമ്പിൽ തട്ടുകയായിരുന്നു.
താരത്തിന് ഇനി ബാറ്റ് കൈയിൽ നിന്ന് വഴുതാതിരിക്കാൻ ഗ്ലൗസിൽ പശ പുരട്ടേണ്ടി വരുമെന്ന് മുൻ താരം വീരേന്ദർ സെവാഗ് പരിഹസിച്ചു. തെറ്റുകളിൽ നിന്ന് പഠിക്കാൻ താരം തയ്യാറാകുന്നില്ലെന്നും അദ്ദേഹം വിമർശിച്ചു. സായ് സുദർശന്റെ പുറത്താകൽ കണ്ട് നോൺ-സ്ട്രൈക്കർ എൻഡിലുണ്ടായിരുന്ന ശുഭ്മാൻ ഗിൽ അവിശ്വസനീയതയോടെയാണ് പ്രതികരിച്ചത്. 167 റൺസിന്റെ മികച്ച ഓപ്പണിംഗ് കൂട്ടുകെട്ടിന് ശേഷമാണ് താരം പുറത്തായത്.
അഞ്ചു സീസണുകൾക്കിടയിൽ മൂന്നാം തവണയാണ് ഗുജറാത്ത് ടൈറ്റൻസ് ഐ.പി.എൽ ഫൈനലിൽ പ്രവേശിക്കുന്നത്. മെയ് 31-ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന ഫൈനലിൽ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരുവാണ് ഗുജറാത്തിന്റെ എതിരാളികൾ. സീസണിന്റെ തുടക്കത്തിൽ ഗുജറാത്ത് ടൈറ്റൻസിനെ ആരും വലിയ പ്രതീക്ഷയോടെ കണ്ടിരുന്നില്ലെന്നും, എന്നാൽ മികച്ച ബാറ്റിംഗ് പ്രകടനത്തിലൂടെ അവർ ഫൈനലിൽ എത്തിയെന്നും സെവാഗ് പറഞ്ഞു. ശുഭ്മാൻ ഗില്ലിന്റെ മികച്ച പ്രകടനത്തെ മനോജ് തിവാരിയും അഭിനന്ദിച്ചു.
