ഐപിഎൽ ടൂർണമെന്റിൽ നടക്കുന്ന ഭൂരിഭാഗം വിവാദങ്ങളും മുൻകൂട്ടി പ്ലാൻ ചെയ്തതും തിരക്കഥയനുസരിച്ചുള്ളതുമാണെന്ന് ഐപിഎൽ മുൻ ചെയർമാൻ ലളിത് മോദി വെളിപ്പെടുത്തി. ഹ്യൂമൻസ് ഓഫ് ബോംബെ പോഡ്കാസ്റ്റിലാണ് അദ്ദേഹം ഇക്കാര്യം തുറന്നു പറഞ്ഞത്. ഐപിഎൽ റേറ്റിങ് കുറയുന്ന സമയങ്ങളിൽ ജനശ്രദ്ധ ആകർഷിക്കുന്നതിനായി മനഃപൂർവ്വം വിവാദങ്ങൾ സൃഷ്ടിക്കാറുണ്ടെന്ന് അദ്ദേഹം പറയുന്നു.
ടൂർണമെന്റിന്റെ റേറ്റിങ് കുറയുമ്പോൾ മാധ്യമങ്ങളിൽ കൃത്രിമമായി വാർത്തകൾ നൽകി ഹൈപ്പ് ഉണ്ടാക്കാറുണ്ടെന്ന് ലളിത് മോദി വ്യക്തമാക്കി. ഇതിനൊരു ഉദാഹരണമായി അദ്ദേഹം ചൂണ്ടിക്കാട്ടിയത് ഒരു ദക്ഷിണാഫ്രിക്കൻ ക്യാപ്റ്റനും ചിയർലീഡറും തമ്മിലുള്ള ബന്ധത്തെക്കുറിച്ചുള്ള വാർത്തയാണ്. ഈ വിവാദം മാധ്യമങ്ങളിൽ ലീക്ക് ചെയ്തതോടെ ഇന്ത്യയിൽ വലിയ ചർച്ചയാവുകയും ടൂർണമെന്റിന്റെ റേറ്റിങ്ങിൽ വൻ കുതിച്ചുചാട്ടം ഉണ്ടാവുകയും ചെയ്തുവെന്ന് അദ്ദേഹം പറഞ്ഞു. വിവാദം തങ്ങൾ തിരക്കഥ തയ്യാറാക്കി ലീക്ക് ചെയ്തതാണെന്നും, എന്നാൽ ആ സംഭവം യഥാർത്ഥത്തിൽ നടന്നതാണെന്നും ലളിത് മോദി കൂട്ടിച്ചേർത്തു.
2026 ഐപിഎൽ സീസണിലും നിരവധി വിവാദങ്ങൾ അരങ്ങേറി. രാജസ്ഥാൻ റോയൽസ് ക്യാപ്റ്റൻ റിയാൻ പരാഗ് ഡ്രസ്സിങ് റൂമിലും, പഞ്ചാബ് കിങ്സ് സ്പിന്നർ യുസ്വേന്ദ്ര ചഹൽ വിമാനത്തിലും വെച്ച് വേപ്പിങ് (vaping) നടത്തിയത് വിവാദമായിരുന്നു. പഞ്ചാബ് കിങ്സ് താരം അർഷ്ദീപ് സിങ് അമിതമായി സോഷ്യൽ മീഡിയ ഉപയോഗിച്ചതും തിലക് വർമ്മയെക്കുറിച്ച് നടത്തിയ പരാമർശങ്ങളും വിവാദങ്ങൾക്ക് വഴിവെച്ചു. ഇതിനെത്തുടർന്ന് ഐപിഎൽ സമയത്ത് അർഷ്ദീപിന്റെ വ്ലോഗിങ്ങിന് ഫ്രാഞ്ചൈസി താൽക്കാലിക നിരോധനം ഏർപ്പെടുത്തിയിരുന്നു.
