ദേശീയ സുരക്ഷയുടെ കാര്യത്തിൽ ഒരു വിട്ടുവീഴ്ചയ്ക്കുമില്ലെന്ന് വീണ്ടും തെളിയിച്ച് നരേന്ദ്ര മോദി സർക്കാർ. തന്ത്രപ്രധാനമായ കിഴക്കൻ ഇന്ത്യൻ മഹാസമുദ്രത്തിൽ ചൈനീസ് കടന്നുകയറ്റത്തിന് അന്ത്യം കുറിക്കാൻ ലക്ഷ്യമിട്ട് ഗ്രേറ്റ് നിക്കോബാർ ദ്വീപിൽ 13,000 കോടി രൂപയുടെ അത്യാധുനിക ഗ്രീൻഫീൽഡ് സിവിൽ-മിലിട്ടറി വിമാനത്താവളം നിർമ്മിക്കാൻ കേന്ദ്ര സർക്കാർ അന്തിമ തീരുമാനമെടുത്തു.
നിലവിലുള്ള ഐഎൻഎസ് ബാസ് (INS Baaz) നാവിക വ്യോമതാവളം വികസിപ്പിക്കുന്നതിന് പകരമായാണ് സിവിലിയൻ-സൈനിക ആവശ്യങ്ങൾക്ക് ഒരുപോലെ ഉപയോഗിക്കാൻ സാധിക്കുന്ന ഈ വമ്പൻ ‘ഡ്യുവൽ യൂസ്’ വിമാനത്താവളം യാഥാർത്ഥ്യമാക്കുന്നത്. രാജ്യത്തിന്റെ സുരക്ഷാ താല്പര്യങ്ങൾ മുൻനിർത്തി ഗലാത്യ ബേയ്ക്ക് സമീപമുള്ള ചീങ്കൻ എന്ന പ്രദേശമാണ് പുതിയ എയർപോർട്ടിനായി തിരഞ്ഞെടുത്തതെന്ന് ഔദ്യോഗിക പ്രതിരോധ മന്ത്രാലയ വൃത്തങ്ങൾ സ്ഥിരീകരിച്ചു. ഇതോടെ കാംബെൽ ബേയിലെ ഐഎൻഎസ് ബാസ് എയർ സ്റ്റേഷനിലെ റൺവേ നീട്ടാനുള്ള പഴയ പദ്ധതികൾ പൂർണ്ണമായും മാറ്റിവെച്ചു.
ആഗോള വ്യാപാരത്തിന്റെ ജീവനനാഡിയായ മലാക്ക കടലിടുക്ക് കപ്പൽപ്പാതയോട് ഏറ്റവും ചേർന്നുനിൽക്കുന്ന ഈ പ്രദേശം ഇന്ത്യയുടെ സൈനിക മേധാവിത്വം ഉറപ്പാക്കാൻ പോന്നതാണ്. ഭാരതത്തിന്റെ പരമാധികാരത്തെ വെല്ലുവിളിക്കാൻ നോക്കുന്ന ചൈനീസ് നാവികസേനയുടെ എല്ലാ നീക്കങ്ങളും തത്സമയം നിരീക്ഷിക്കാനും പ്രതിരോധിക്കാനും ഈ പുതിയ വിമാനത്താവളം വഴി ഇന്ത്യൻ സൈന്യത്തിന് സാധിക്കും.
അഖണ്ഡ ഭാരതത്തിന്റെ സുരക്ഷയ്ക്ക് അത്യന്താപേക്ഷിതമായ, മൊത്തം 81,000 കോടി രൂപ ചെലവ് വരുന്ന ഗ്രേറ്റ് നിക്കോബാർ മെഗാ വികസന പദ്ധതിയെ തകർക്കാൻ വികസനവിരുദ്ധരും ചില വിദേശ ശക്തികളുടെ താല്പര്യങ്ങൾ സംരക്ഷിക്കുന്നവരുമായ ഇടത്-വലത് മുന്നണികൾ വലിയ രീതിയിലുള്ള രാഷ്ട്രീയ കള്ളപ്രചാരണങ്ങളാണ് പരിസ്ഥിതിയുടെ പേരിൽ അഴിച്ചുവിട്ടിരുന്നത്. എന്നാൽ രാജ്യസുരക്ഷയ്ക്കൊപ്പം ദ്വീപിന്റെ സുസ്ഥിര വികസനവും ഒരുപോലെ ഉറപ്പാക്കുന്ന മാസ്റ്റർ പ്ലാനിലൂടെ പ്രതിപക്ഷത്തിന്റെ എല്ലാ കുപ്രചാരണങ്ങളുടെയും കാറ്റഴിച്ചുവിട്ടിരിക്കുകയാണ് കേന്ദ്ര സർക്കാർ. ചീങ്കനിലെ പുതിയ ഗ്രീൻഫീൽഡ് വിമാനത്താവളം വഴി അതിവേഗ സൈനിക നീക്കങ്ങൾ സാധ്യമാകുന്നതിനൊപ്പം ഈ മേഖലയിലെ ടൂറിസം, സാമ്പത്തിക വളർച്ച എന്നിവയ്ക്കും വൻ കുതിപ്പുണ്ടാകും. ഭാരതത്തെ ലോകത്തിന്റെ നെറുകയിൽ എത്തിക്കാനുള്ള മോദി സർക്കാരിന്റെ ഉറച്ച ചുവടുവെപ്പായിട്ടാണ് ഈ തന്ത്രപ്രധാനമായ തീരുമാനത്തെ ആഗോള പ്രതിരോധ വിദഗ്ധർ വിലയിരുത്തുന്നത്.
