സ്വാതന്ത്ര്യത്തിന്റെ അമൃതകാലത്തിലൂടെ ഭാരതം ലോകത്തിന്റെ നെറുകയിലേക്ക് കുതിക്കുമ്പോൾ, അതിർത്തിക്കപ്പുറത്ത് നിന്ന് കേൾക്കുന്നത് വിലാപങ്ങളും വെടിയൊച്ചകളും മാത്രം. ഒരേ മണ്ണിൽ ഒരുമിച്ച് പിറന്നവർ, എന്നാൽ ഒരു ഭാഗത്ത് വികസനത്തിന്റെ മഹാവിസ്മയങ്ങൾ തീർത്ത് ഭാരതാംബയുടെ മാറോട് ചേർന്ന് ജമ്മു കശ്മീർ ജനത പുഞ്ചിരിക്കുമ്പോൾ, പാകിസ്ഥാന്റെ ക്രൂരമായ അധിനിവേശത്തിന് കീഴിൽ പാക് അധീന കശ്മീരിലെ (PoK) ജനങ്ങൾ നരകയാതന അനുഭവിക്കുകയാണ്. ഈ രണ്ട് വ്യത്യസ്ത യാഥാർത്ഥ്യങ്ങളുടെ നേർചിത്രമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
കഴിഞ്ഞ ദിവസം അതിർത്തിയെ സാക്ഷി നിർത്തി രണ്ട് വലിയ സംഭവങ്ങളാണ് അരങ്ങേറിയത്. ഭാരതത്തിന്റെ അവിഭാജ്യ ഘടകമായ ജമ്മു കശ്മീരിനെയും ലഡാക്കിനെയും ബന്ധിപ്പിക്കുന്ന തന്ത്രപ്രധാനമായ സോജില ടണലിന്റെ നിർണായകമായ തുരങ്കം തുറക്കൽ (Breakthrough) കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരിയുടെ സാന്നിധ്യത്തിൽ ഇന്ത്യൻ എൻജിനീയർമാർ ആഘോഷിച്ചപ്പോൾ, അതിന് കൃത്യം 100 കിലോമീറ്റർ മാത്രം അകലെ പാക് അധീന കശ്മീരിൽ പാകിസ്ഥാൻ സൈന്യം സ്വന്തം ജനതയ്ക്ക് നേരെ വെടിയുതിർക്കുകയായിരുന്നു. റാവലകോട്ട്, മുസാഫറാബാദ്, മിർപൂർ തുടങ്ങിയ നഗരങ്ങളിൽ ജനങ്ങൾ നടത്തിയ വൻ പ്രതിഷേധ മാർച്ചിന് നേരെ പാക് ഭരണകൂടം നടത്തിയ അടിച്ചമർത്തലിൽ 27-ലധികം പേരാണ് കൊല്ലപ്പെട്ടത്. നിരവധി പേരെ തടവിലാക്കുകയും ഇന്റർനെറ്റ് വിച്ഛേദിക്കുകയും ചെയ്തുകൊണ്ട് പാകിസ്ഥാൻ അവിടെ അടിയന്തരാവസ്ഥയ്ക്ക് തുല്യമായ ഭീകരാന്തരീക്ഷമാണ് സൃഷ്ടിച്ചിരിക്കുന്നത്.
ഗോതമ്പ് വിലവർദ്ധനവ്, താങ്ങാനാവാത്ത വൈദ്യുതി ചാർജ്, കടുത്ത പണപ്പെരുപ്പം, പാക് പഞ്ചാബ് കേന്ദ്രീകൃത ഭരണകൂടത്തിന്റെ ക്രൂരമായ അവഗണന എന്നിവയ്‌ക്കെതിരെ നിസഹായരായ കശ്മീരി ജനത വർഷങ്ങളായി നടത്തുന്ന പോരാട്ടത്തിന്റെ തുടർച്ചയാണ് ഇപ്പോഴത്തെ സംഘർഷം. കഴിഞ്ഞ രണ്ട് വർഷങ്ങളായി ഭീകരമായ അടിച്ചമർത്തലുകളാണ് പാക് സൈന്യം ഇവിടെ നടത്തുന്നത്. കശ്മീരിലെ പ്രകൃതിവിഭവങ്ങൾ മുഴുവൻ കൊള്ളയടിച്ച് പാകിസ്ഥാനിലെ മറ്റ് പ്രവിശ്യകൾക്ക് നൽകുകയും തദ്ദേശീയരെ പട്ടിണിക്കിടുകയും ചെയ്യുന്ന പാക് നയത്തിന്റെ സ്വാഭാവിക പ്രതികരണമാണിതെന്ന് ഭാരതം വ്യക്തമാക്കുന്നു. പലയിടങ്ങളിലും പാക് വിരുദ്ധ മുദ്രാവാക്യങ്ങളും ഭാരതത്തോട് ചേരാനുള്ള ആഗ്രഹങ്ങളും പരസ്യമായി ഉയർന്നു കഴിഞ്ഞു.
എന്നാൽ മറുഭാഗത്ത്, നരേന്ദ്ര മോദി സർക്കാരിന്റെ ശക്തമായ രാഷ്ട്രീയ തീരുമാനത്തിലൂടെ 370-ാം വകുപ്പ് റദ്ദാക്കിയതിന് ശേഷമുള്ള ജമ്മു കശ്മീരിന്റെ വികസന മുന്നേറ്റം ലോകത്തെ അത്ഭുതപ്പെടുത്തുന്നതാണ്. മുൻപ് വെറും 450 കോടി രൂപ മാത്രമായിരുന്ന വാർഷിക നിക്ഷേപം ഇന്ന് 5,824 കോടി രൂപയായി കുതിച്ചുയർന്നു. ഭാരതത്തോടൊപ്പം തോളോടുതോൾ ചേർന്ന് വളരാൻ 1.6 ലക്ഷം കോടി രൂപയുടെ നിക്ഷേപ നിർദ്ദേശങ്ങളാണ് കശ്മീരിലേക്ക് ഒഴുകിയെത്തുന്നത്. വിഘടനവാദികളുടെ കല്ലേറും ചോരപ്പുഴയും ഇന്ന് കശ്മീരിന് ഭൂതകാലം മാത്രമാണ്. കഴിഞ്ഞ രണ്ടായിരത്തിലധികം ദിവസങ്ങളായി കല്ലേറിലോ അക്രമങ്ങളിലോ ഒരു യുവാവിന്റെ പോലും ജീവൻ നഷ്ടപ്പെട്ടിട്ടില്ല എന്ന മാറ്റം ഭാരതത്തിന്റെ കടുത്ത സുരക്ഷാ നയങ്ങളുടെ വിജയമാണ്. കശ്മീരിലെ കഫേകളും റെസ്റ്റോറന്റുകളും വിനോദസഞ്ചാരികളെക്കൊണ്ട് നിറഞ്ഞിരിക്കുന്നു. കാഴ്ച്ചക്കാരുടെ മനം കവർന്ന് മഞ്ഞു മലകൾക്കിടയിലൂടെ വന്ദേ ഭാരത് ട്രെയിനുകൾ കുതിച്ചു പായുന്നു. ചിനാബ് റെയിൽപ്പാലവും ഇസഡ്-മോർ ടണലും ഭാരതീയ എൻജിനീയറിങ് മികവിന്റെ പ്രതീകങ്ങളായി നിലകൊള്ളുന്നു. 2020-ൽ വെറും 69 സ്റ്റാർട്ടപ്പുകൾ മാത്രമുണ്ടായിരുന്ന താഴ്‌വരയിൽ ഇന്ന് 1300-ലധികം സ്റ്റാർട്ടപ്പുകളുമായി യുവാക്കൾ പുതിയ ഇന്ത്യയുടെ ഭാഗമാകുകയാണ്.
സമുദ്രനിരപ്പിൽ നിന്ന് 11,500 അടി ഉയരത്തിൽ നിർമ്മിക്കുന്ന 13.15 കിലോമീറ്റർ നീളമുള്ള സോജില ടണൽ പൂർത്തിയാകുന്നതോടെ ഏഷ്യയിലെ തന്നെ ഏറ്റവും നീളമേറിയ ഇരുവശ ഗതാഗത തുരങ്കമായി ഇത് മാറും. ശീതകാലത്ത് കടുത്ത മഞ്ഞുവീഴ്ച കാരണം മാസങ്ങളോളം ഒറ്റപ്പെട്ടുപോകുന്ന ലഡാക്കിലേക്ക് ഭാരത സൈന്യത്തിന് ഏതു കാലാവസ്ഥയിലും അതിവേഗം എത്തിച്ചേരാൻ ഇത് വഴി സാധിക്കും. ഭാരതത്തിന്റെ ഈ അസാധ്യ വികസന മുന്നേറ്റവും കശ്മീരിലെ സമാധാന അന്തരീക്ഷവുമാണ് പാക് ഭരണകൂടത്തെ ഭയപ്പെടുത്തുന്നത്. അതുകൊണ്ട് തന്നെയാണ് അതിർത്തിയിൽ ഭീകരരെ ഉപയോഗിച്ച് അക്രമം നടത്താൻ അവർ ഇപ്പോഴും ശ്രമിക്കുന്നത്. ജമ്മു കശ്മീരിന്റെ കേന്ദ്രഭരണ പദവി താൽക്കാലികം മാത്രമാണെന്നും ഉചിതമായ സമയത്ത് സംസ്ഥാന പദവി തിരികെ നൽകുമെന്നും ആഭ്യന്തരമന്ത്രി അമിത് ഷാ പാർലമെന്റിൽ വ്യക്തമാക്കിയതുമാണ്. ഭാരതത്തിന്റെ പരമാധികാരത്തിന് കീഴിൽ ജമ്മു കശ്മീരും ലഡാക്കും ഗിൽജിത് ബാൾട്ടിസ്ഥാനും സുരക്ഷിതമാണെന്ന് ഉറക്കെ പ്രഖ്യാപിക്കുന്നതാണ് അതിർത്തിയിലെ ഈ രണ്ട് ചിത്രങ്ങൾ. ഒന്ന് വികസനത്തിന്റെ വെളിച്ചത്തിലേക്ക് നയിക്കുമ്പോൾ മറ്റൊന്ന് പാകിസ്ഥാൻ എന്ന പരാജയപ്പെട്ട രാജ്യത്തിന്റെ തകർച്ചയുടെ ആഴം വ്യക്തമാക്കുന്നു. ഭാരതത്തിന്റെ ഭാഗമായ കശ്മീർ പുഞ്ചിരിക്കുമ്പോൾ, പാകിസ്ഥാൻ കൈയേറിയ കശ്മീർ കത്തിയെരിയുകയാണ്.
