കേരളത്തിലെ രാഷ്ട്രീയ വിയോജിപ്പുകൾ കാരണം മുൻ മുഖ്യമന്ത്രി പിണറായി വിജയനെ കെട്ടിപ്പിടിക്കാൻ തനിക്ക് കഴിയില്ലെന്ന കോൺഗ്രസ് നേതാവ് രാഹുൽ ഗാന്ധിയുടെ പ്രസ്താവനയ്ക്കെതിരെ കടുത്ത ഭാഷയിൽ പ്രതികരിച്ച് സി.പി.എം പൊളിറ്റ് ബ്യൂറോ അംഗം എം.എ. ബേബി. പിണറായി വിജയനെ ആലിംഗനം ചെയ്യാൻ ഇവിടെ ആരും രാഹുൽ ഗാന്ധിയോട് ആവശ്യപ്പെട്ടിട്ടില്ലെന്ന് എം.എ ബേബി പരിഹസിച്ചു. എന്നാൽ മറ്റ് പ്രതിപക്ഷ നേതാക്കളെ ഇ.ഡി (എൻഫോഴ്സ്മെന്റ് ഡയറക്ടറേറ്റ്) അറസ്റ്റ് ചെയ്യണമെന്ന് ആവശ്യപ്പെടുന്ന വിലകുറഞ്ഞ രാഷ്ട്രീയം രാഹുൽ ഗാന്ധി അവസാനിപ്പിക്കണമെന്നും അദ്ദേഹം ആവശ്യപ്പെട്ടു. തിരുവനന്തപുരത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
കേന്ദ്ര അന്വേഷണ ഏജൻസിയായ ഇ.ഡിക്ക് വേണ്ടി പ്രവർത്തിക്കുന്ന ഒരു ഏജന്റായി രാഹുൽ ഗാന്ധി മാറരുത്. സഹപ്രവർത്തകരായ പ്രതിപക്ഷ നേതാക്കൾക്കെതിരെ കേന്ദ്ര അന്വേഷണ ഏജൻസികളെ ഉപയോഗിക്കണമെന്ന് പരസ്യമായി ആവശ്യപ്പെടുന്നത് രാഹുൽ ഗാന്ധിയുടെ ജോലിയല്ലെന്നും എം.എ. ബേബി കുറ്റപ്പെടുത്തി. ആലിംഗനം എന്നത് നിർബന്ധിച്ച് പിടിച്ചുവാങ്ങേണ്ട ഒന്നല്ല. അത് സ്നേഹവും സൗഹൃദവും പ്രകടിപ്പിക്കാൻ പരസ്പര ധാരണയോടെ ചെയ്യേണ്ട ഒന്നാണ്. രാഷ്ട്രീയ വിയോജിപ്പ് കാരണം പിണറായി വിജയനെ കെട്ടിപ്പിടിക്കാൻ കഴിയില്ലെന്ന് പറയുന്ന രാഹുൽ ഗാന്ധി പാർലമെന്റിൽ പോയി പ്രധാനമന്ത്രി നരേന്ദ്ര മോദിയെ പരസ്യമായി ആലിംഗനം ചെയ്തിട്ടുണ്ടെന്ന കാര്യം രാജ്യം കണ്ടതാണെന്നും എം.എ. ബേബി ഓർമ്മിപ്പിച്ചു.
