“ആരോഗ്യ വകുപ്പ് ഡയറക്ടർ തുരപ്പൻ പണി കാണിച്ചു, അതുകൊണ്ടാണ് മാറ്റിയത്; നിപ ഫലം വന്നിട്ടും എന്നെ അറിയിച്ചില്ല”മന്ത്രി കെ. മുരളീധരൻ

നിപ പ്രതിരോധ പ്രവർത്തനങ്ങളുമായി ബന്ധപ്പെട്ട് ആരോഗ്യവകുപ്പിൽ പുകയുന്ന ആഭ്യന്തര തർക്കങ്ങൾ ഒടുവിൽ പരസ്യപ്പൊട്ടിത്തെറിയിലേക്ക്. കഴിഞ്ഞ കുറച്ചു ദിവസങ്ങളായി ഉയർന്നുവന്ന എല്ലാ ആക്ഷേപങ്ങൾക്കും കടുത്ത ഭാഷയിൽ മറുപടി നൽകിയ ആരോഗ്യമന്ത്രി കെ. മുരളീധരൻ, വകുപ്പിലെ ഉന്നത ഉദ്യോഗസ്ഥർക്കെതിരെ കടുത്ത ആഞ്ഞടിക്കലാണ് നടത്തിയത്. ആരോഗ്യ വകുപ്പ് ഡയറക്ടർ (ഡിഎച്ച്എസ്) തനിക്കെതിരെ ‘തുരപ്പൻ പണി’ കാണിച്ചുവെന്നും, അനുമതിയില്ലാതെ കാര്യങ്ങൾ ചെയ്തതുകൊണ്ടാണ് അദ്ദേഹത്തെ സ്ഥാനത്തുനിന്നും മാറ്റിയതെന്നും മന്ത്രി തുറന്നടിച്ചു. നിപ പരിശോധനാ ഫലം ഉച്ചയ്ക്ക് വന്നിട്ടും തന്നെ കൃത്യസമയത്ത് അറിയിക്കാതെ വീഴ്ച വരുത്തിയെന്നും മന്ത്രി ആരോപിച്ചു. കോഴിക്കോട് കലക്ട്രേറ്റിൽ അടിയന്തര അവലോകന യോഗത്തിന് ശേഷം  സംസാരിക്കുകയായിരുന്നു അദ്ദേഹം.

നിപ രോഗിക്ക് ആവശ്യമായ മരുന്നുകൾ നൽകുന്നില്ലെന്ന പ്രതിപക്ഷത്തിന്റെ ആക്ഷേപങ്ങൾ പൂർണ്ണമായും അടിസ്ഥാനരഹിതമാണെന്ന് മന്ത്രി വ്യക്തമാക്കി. രോഗിയെ ആശുപത്രിയിൽ പ്രവേശിപ്പിച്ച ആദ്യ ദിവസം തന്നെ ‘റിബാവറിൻ’ മരുന്ന് നൽകിയിരുന്നു. നിലവിൽ ഇന്ത്യയിൽ തന്നെ ലഭ്യല്ലാതിരുന്ന അത്യാധുനിക മരുന്നായ ‘റെംഡിവിർ’ ഓസ്‌ട്രേലിയയിൽ നിന്നും കേന്ദ്ര ഏജൻസികളുടെ സഹായത്തോടെ എത്തിക്കാൻ മന്ത്രാലയം ദ്രുതഗതിയിൽ നടപടികൾ സ്വീകരിച്ചു. ഒടുവിൽ ഇന്നലെ രാത്രിയോടെ ഈ മരുന്ന് കോഴിക്കോട്ട് എത്തിക്കുകയും രോഗിക്ക് ആദ്യ ഡോസ് നൽകുകയും ചെയ്തിട്ടുണ്ട്. പ്രതിരോധ പ്രവർത്തനങ്ങളിൽ ആരോഗ്യവകുപ്പ് ഒരു ശതമാനം പോലും വിട്ടുവീഴ്ചയ്ക്കില്ല. ഈ നിമിഷം വരെ ജില്ലയിൽ നിപ പടർന്നുപിടിക്കുന്ന സാഹചര്യമില്ലെന്നും രോഗി വളരെ അവശ നിലയിലാണ് ആശുപത്രിയിലെത്തിയതെന്നും മന്ത്രി കൂട്ടിച്ചേർത്തു.

അതേസമയം, നിപ പ്രതിരോധത്തിൽ സർക്കാരിന് വീഴ്ച പറ്റിയെന്ന് ആരോപിച്ച് മുൻ മുഖ്യമന്ത്രി പിണറായി വിജയനും മുൻ ആരോഗ്യമന്ത്രി കെ.കെ. ശൈലജയും രംഗത്തെത്തിയതിനെ മന്ത്രി ശക്തമായി വിമർശിച്ചു. പ്രതിപക്ഷം നിപയെ ഒരു രാഷ്ട്രീയ ആയുധമായി കണ്ട് വേട്ടയാടാനാണ് ശ്രമിക്കുന്നത്. മുൻപ് നിപ വന്നപ്പോൾ ആരോഗ്യമന്ത്രിമാർ നേരിട്ട് ക്യാമ്പ് ചെയ്ത ചരിത്രം ഓർമ്മിപ്പിക്കുന്ന പ്രതിപക്ഷം, താൻ തലസ്ഥാനത്തിരുന്ന് സംസ്ഥാനത്തെ മുഴുവൻ കാര്യങ്ങളും ഏകോപിപ്പിക്കുന്നത് മനസ്സിലാക്കുന്നില്ല. നിലവിൽ രോഗിയുടെ സമ്പർക്കപ്പട്ടികയിലുള്ള ഹൈ റിസ്‌ക് വിഭാഗത്തിലെ 3 പേരുടെ ഫലങ്ങൾ നെഗറ്റീവ് ആയത് വലിയ ആശ്വാസമാണ്. കേന്ദ്ര സംഘം കോഴിക്കോട്ട് എത്തി സ്ഥിതിഗതികൾ വിലയിരുത്തുന്നുണ്ട്. ഉദ്യോഗസ്ഥരുടെ ഭാഗത്തുനിന്നുണ്ടാകുന്ന വീഴ്ചകളിൽ കടുത്ത നടപടി തുടരുമെന്നും, ജനങ്ങൾ പരിഭ്രാന്തരാകേണ്ട സാഹചര്യമില്ലെന്നും മന്ത്രി കെ. മുരളീധരൻ വ്യക്തമാക്കി.