ക്രിക്കറ്റ് ചരിത്രത്തിൽ സ്ഥിതിവിവരക്കണക്കുകളെപ്പോലും അപ്രസക്തമാക്കുന്ന ഒരു ബാറ്റിംഗ് രുദ്രതാണ്ഡവത്തിനാണ് ശ്രീലങ്കയിൽ നടന്ന ട്രൈ നേഷൻ എ സീരീസ് ഫൈനൽ സാക്ഷ്യം വഹിച്ചത്. ഇന്ത്യൻ ക്രിക്കറ്റിലെ കൗമാര വിസ്മയം 15-കാരൻ വൈഭവ് സൂര്യവംശി ലങ്കൻ ബൗളർമാരെ ദയവില്ലാതെ വേട്ടയാടിയപ്പോൾ പിറന്നത് കരിയറിലെ ഏറ്റവും അവിശ്വസനീയമായ ഒരു ഇന്നിങ്സാണ്. വെറും 29 പന്തുകളിൽ നിന്ന് 10 ഫോറുകളും 8 സിക്സറുകളും ഉൾപ്പെടെ 94 റൺസാണ് താരം അടിച്ചുകൂട്ടിയത്. 11 പന്തിൽ 50 റൺസ് നേടിയ വൈഭവ് ലിസ്റ്റ് എ ക്രിക്കറ്റ് ചിരിത്രത്തിലെ ഏറ്റവും വേഗതയേറിയ അർദ്ധ സെഞ്ച്വറി എന്ന നേട്ടവും സ്വന്തമാക്കി.
വിക്കറ്റ് വീണ പന്ത് ഉൾപ്പെടെ തന്റെ മുഴുവൻ ഇന്നിങ്സിലും വെറും 6 ഡോട്ട് ബോളുകൾ മാത്രമാണ് വൈഭവ് വഴങ്ങിയത്. ബാക്കി 23 പന്തുകളിലും താരം റൺ നേടി എന്നതും ശ്രദ്ധിക്കണം. വൈഭവിന്റെ ആ മാരക സ്ട്രൈക്ക് റേറ്റ് (324.14) പിറന്നത് ഈ രീതിയിലായിരുന്നു
15-YEAR-OLD VAIBHAV SOORYAVANSHI IN TRI SERIES FINAL:
4,4,4,6,6,0,6,4,4,6,6,4,4,2,4,1,0,4,1,0,0,4,6,0,6,1,6,1 , വിക്കറ്റ്
ആദ്യ മൂന്ന് പന്തുകളിലും തുടർച്ചയായ ബൗണ്ടറികൾ (4, 4, 4) പായിച്ചുകൊണ്ടാണ് വൈഭവ് തുടങ്ങിയത്. തൊട്ടുപിന്നാലെ അടുത്ത രണ്ട് പന്തുകളും ഗാലറിയുടെ അപ്പർ ഡെക്കിൽ (6, 6) ചെന്ന് പതിച്ചു! ഇന്നിങ്സിലുടനീളം സിംഗിളുകളേക്കാൾ കൂടുതൽ ബൗണ്ടറികളിലാണ് ഈ 15-കാരൻ വിശ്വസിച്ചത്.
കഴിഞ്ഞ മത്സരത്തിലെ ചില അനാവശ്യ സ്ലെഡ്ജിങ്ങുകൾക്കും വിവാദങ്ങൾക്കും മറുപടി നൽകാൻ ക്രീസിലെത്തിയ വൈഭവ് സൂര്യവംശി തികച്ചും അക്രമാസക്തമായ ഭാവത്തിലായിരുന്നു. ഒരറ്റത്ത് പ്രിയാൻഷ് ആര്യ (35) മികച്ച പിന്തുണ നൽകിയപ്പോൾ, മറുവശത്ത് ലങ്കൻ ക്യാപ്റ്റൻ സഹൻ ആരച്ചിഗെ തന്റെ ബൗളർമാരെ മാറി മാറി പരീക്ഷിച്ചിട്ടും വൈഭവിന്റെ ഡിഫെൻസ് ഒരു കോട്ട പോലെ തകർക്കാൻ അവർക്കായില്ല.
ഒടുവിൽ സെഞ്ച്വറിക്ക് വെറും 6 റൺസ് മാത്രം അകലെ വെച്ചാണ് (94 റൺസ്) താരം പുറത്താകുന്നത്. അപ്പോഴേക്കും ഇന്ത്യ എ ടീം 9.3 ഓവറിൽ 132 റൺസ് എന്ന അജയ്യമായ സ്കോറിലേക്ക് എത്തിക്കഴിഞ്ഞിരുന്നു. മുൻ ഇന്ത്യൻ താരം കെ. ശ്രീകാന്ത് മുമ്പ് പറഞ്ഞതുപോലെ, സച്ചിൻ ക്രിക്കറ്റിലെ ദൈവമാണെങ്കിൽ, ഈ ചെറുപ്രായത്തിൽ ക്രിക്കറ്റ് ലോകത്തെ വിറപ്പിക്കുന്ന വൈഭവ് സൂര്യവംശി ദൈവത്തിന്റെ പുത്രൻ തന്നെയാണെന്ന് അടിവരയിടുന്നതായിരുന്നു മിർപൂരിലെ ഈ പോരാട്ടം.
