ലോക ക്രിക്കറ്റ് പ്രേമികളെ ഒന്നടങ്കം ഞെട്ടിച്ചുകൊണ്ട് ഇംഗ്ലണ്ട് ടെസ്റ്റ് ടീം നായകൻ ബെൻ സ്റ്റോക്സ് അന്താരാഷ്ട്ര ക്രിക്കറ്റിൽ നിന്നും വിരമിക്കൽ പ്രഖ്യാപിച്ചത് വലിയ വാർത്തയായിരുന്നു. ന്യൂസിലൻഡിനെതിരെ ട്രെന്റ് ബ്രിഡ്ജിൽ നടക്കുന്ന മൂന്നാം ടെസ്റ്റിന്റെ നാലാം ദിന മത്സരത്തിന് തൊട്ടുമുൻപാണ് 35-കാരനായ താരം തന്റെ അപ്രതീക്ഷിത തീരുമാനം സഹതാരങ്ങളെ അറിയിച്ചത്. ഈ മത്സരത്തോടെ താൻ അന്താരാഷ്ട്ര ക്രിക്കറ്റിന്റെ എല്ലാ ഫോർമാറ്റുകളിൽ നിന്നും പടിയിറങ്ങുകയാണെന്ന് സ്റ്റോക്സ് വ്യക്തമാക്കി.
ബെൻ സ്റ്റോക്സിന്റെ വിരമിക്കൽ വാർത്ത സ്റ്റേഡിയത്തിൽ അനൗൺസ് ചെയ്തതോടെ ട്രെന്റ് ബ്രിഡ്ജ് ഗാലറി ഒന്നടങ്കം എഴുന്നേറ്റ് നിന്ന് കൈയടിച്ചാണ് ഈ ഇതിഹാസ താരത്തിന് ആദരവ് അർപ്പിച്ചത്. എന്നാൽ, തൊട്ടടുത്ത നിമിഷം മൈതാനത്ത് പിറന്നത് ക്രിക്കറ്റ് ചരിത്രത്തിലെ തന്നെ ഏറ്റവും സുവർണ്ണ നിമിഷങ്ങളിലൊന്നായിരുന്നു.
വിരമിക്കൽ വാർത്ത ആരാധകരിലേക്ക് എത്തിയതിന് പിന്നാലെ പന്തുമായി എത്തിയ സ്റ്റോക്സ് തന്റെ മാന്ത്രികത വീണ്ടും പുറത്തെടുത്തു. മത്സരത്തിന്റെ 81-ാം ഓവറിലെ ആദ്യ പന്തിൽ തന്നെ ന്യൂസിലൻഡ് താരം സക്കറിയ ഫൗൾക്സിനെ (6 റൺസ്) ഹാരി ബ്രൂക്കിന്റെ കൈകളിൽ എത്തിച്ച് സ്റ്റോക്സ് വിക്കറ്റ് കൊയ്തു.
ഇതിഹാസ താരം ഇയാൻ ബോത്തമിനോട് പണ്ട് ചോദിച്ചതുപോലെ “ആരാണ് നിങ്ങൾക്ക് വേണ്ടി ഈ തിരക്കഥകളെഴുതുന്നത്” എന്ന ചോദ്യം സ്റ്റോക്സിന്റെ കാര്യത്തിലും ആരാധകർ ആവർത്തിക്കുകയാണ്. വിക്കറ്റ് വീണതോടെ ഇംഗ്ലീഷ് താരങ്ങൾ ഓടിയെത്തി തങ്ങളുടെ പ്രിയപ്പെട്ട നായകനെ കെട്ടിപ്പിടിച്ച് വൈകാരികമായാണ് ആ നിമിഷം ആഘോഷിച്ചത്.
ബെൻ സ്റ്റോക്സിന്റെ വിരമിക്കൽ പ്രഖ്യാപനം ഇംഗ്ലണ്ട് ക്രിക്കറ്റിൽ നാടകീയമായ ഒരു വാരത്തിന് ശേഷമാണ് ഉണ്ടാകുന്നത്. ഒന്നാം ടെസ്റ്റിന് ശേഷം ചെൽസിയിലെ ഒരു നൈറ്റ് ക്ലബ്ബിന് പുറത്തുണ്ടായ അച്ചടക്ക ലംഘനവുമായി ബന്ധപ്പെട്ട് സ്റ്റോക്സിനും ഫാസ്റ്റ് ബൗളർ ഗസ് അറ്റ്കിൻസണിനും രണ്ടാം ടെസ്റ്റ് നഷ്ടമായിരുന്നു.
ഇസിബിയുടെയും ക്രിക്കറ്റ് റെഗുലേറ്ററുടെയും അന്വേഷണത്തിനൊടുവിൽ ഇരുവർക്കും രേഖാമൂലം മുന്നറിയിപ്പ് നൽകി വിട്ടയക്കുകയായിരുന്നു. ഈ വിലക്ക് സമയത്ത് ഇരുവരും കൗണ്ടി ചാമ്പ്യൻഷിപ്പിൽ കളിക്കുകയും മികച്ച പ്രകടനം പുറത്തെടുത്ത് മൂന്നാം ടെസ്റ്റിനുള്ള ടീമിലേക്ക് തിരിച്ചെത്തുകയുമായിരുന്നു. ക്യാപ്റ്റനായി തിരിച്ചെത്തിയ അവസാന ടെസ്റ്റിലും മികച്ച പ്രകടനമാണ് സ്റ്റോക്സ് പുറത്തെടുത്തത്. ഒന്നാം ഇന്നിങ്സിൽ 4 വിക്കറ്റുകൾ വീഴ്ത്തിയ താരം രണ്ടാം ഇന്നിങ്സിൽ 2 വിക്കറ്റുകൾ കൂടി സ്വന്തമാക്കി.
മത്സരത്തിൽ ന്യൂസിലൻഡ് ഒൻപത് വിക്കറ്റ് നഷ്ടത്തിൽ 288 റൺസിന് രണ്ടാം ഇന്നിങ്സ് ഡിക്ലയർ ചെയ്തതോടെ ഇംഗ്ലണ്ടിന് മുന്നിൽ 373 റൺസിന്റെ വിജയലക്ഷ്യമാണ് ഉയർന്നിരിക്കുന്നത്. പരമ്പര സ്വന്തമാക്കാൻ ഇംഗ്ലണ്ടിന് ഈ റൺസ് അടിച്ചെടുക്കേണ്ടതുണ്ട്. അന്താരാഷ്ട്ര കരിയറിലെ തന്റെ അവസാന മത്സരത്തിൽ ടീമിനെ വിജയത്തിലേക്ക് നയിച്ച് വിരമിക്കൽ അവിസ്മരണീയമാക്കാൻ ഉറച്ചാണ് ബെൻ സ്റ്റോക്സ് ഇപ്പോൾ കളിക്കളത്തിലുള്ളത്.
