ലോകകപ്പ് ചരിത്രത്തിൽ സുവർണ്ണ അധ്യായം കുറിച്ചതിന് പിന്നാലെ ഡെമോക്രാറ്റിക് റിപ്പബ്ലിക് ഓഫ് കോംഗോ (DR Congo) കായിക ലോകത്തെ കണ്ണീരിലാഴ്ത്തി ടൂർണമെന്റിൽ നിന്നും വിടവാങ്ങി. ബുധനാഴ്ച നടന്ന നോക്കൗട്ട് മത്സരത്തിൽ ഇംഗ്ലണ്ടിനോട് 2-1 ന് തോറ്റ് ടീം പുറത്തായതിന് തൊട്ടുപിന്നാലെ, വാർത്താസമ്മേളനത്തിൽ പങ്കെടുക്കുകയായിരുന്ന കോംഗോയുടെ ഫ്രഞ്ച് മുഖ്യ പരിശീലകൻ സെബാസ്റ്റ്യൻ ഡെസാബ്രെയെ തേടി അച്ഛന്റെ മരണവാർത്തയെത്തുകയായിരുന്നു.
റൗണ്ട് ഓഫ് 32 പോരാട്ടത്തിൽ ഇംഗ്ലണ്ടിനോട് തോറ്റതിന് ശേഷമുള്ള ഔദ്യോഗിക പത്രസമ്മേളനത്തിൽ മാധ്യമപ്രവർത്തകരുടെ ചോദ്യങ്ങൾക്ക് ഡെസാബ്രെ മറുപടി നൽകിക്കൊണ്ടിരിക്കുകയായിരുന്നു. ഇതിനിടയിലാണ് കോംഗോ ടീമിന്റെ മീഡിയ ഓഫീസർ സങ്കടകരമായ ആ അനൗൺസ്‌മെന്റുമായി എത്തിയത് ഫ്രഞ്ച് ഭാഷയിൽ മീഡിയ ഓഫീസർ പറഞ്ഞു: “എല്ലാവർക്കും നന്ദി, എന്നാൽ ഞങ്ങളുടെ കോച്ചിന്റെ പിതാവ് അന്തരിച്ച വിവരം ഞങ്ങൾ ഇതിനാൽ അറിയിക്കുകയാണ്. ഞങ്ങളുടെ ആത്മാർത്ഥമായ അനുശോചനം.”
വാർത്ത കേട്ട് ഒരു നിമിഷം സ്തബ്ധനായിപ്പോയ ഡെസാബ്രെ, പതിഞ്ഞ ശബ്ദത്തിൽ “മെർസി” എന്ന് പറഞ്ഞ് കസേരയിൽ നിന്നെഴുന്നേറ്റ് പത്രസമ്മേളനം റദ്ദാക്കി അവിടെനിന്നും മടങ്ങുകയായിരുന്നു. മത്സരത്തിൽ തോമസ് ടുഷേൽ പരിശീലിപ്പിക്കുന്ന ഇംഗ്ലണ്ടിനെതിരെ കടുത്ത പോരാട്ടമാണ് കോംഗോ കാഴ്ചവെച്ചത്. 75-ാം മിനിറ്റ് വരെ 1-0 ന് മുന്നിലായിരുന്ന കോംഗോ ചരിത്ര വിജയം നേടുമെന്ന് തോന്നിച്ചെങ്കിലും അവസാന നിമിഷങ്ങളിൽ ഇംഗ്ലീഷ് ക്യാപ്റ്റൻ ഹാരി കെയ്ൻ രക്ഷകനായി അവതരിച്ചു. 75-ാം മിനിറ്റിലും 86-ാം മിനിറ്റിലും ഇരട്ട ഗോളുകൾ നേടി ഹാരി കെയ്ൻ ഇംഗ്ലണ്ടിന് 2-1 ന്റെ ആവേശകരമായ തിരിച്ചുവരവ് വിജയം സമ്മാനിക്കുകയായിരുന്നു. ജയത്തോടെ ഇംഗ്ലണ്ട് റൗണ്ട് ഓഫ് 16-ൽ മെക്സിക്കോയുമായി ഏറ്റുമുട്ടും.
തോറ്റെങ്കിലും ഇംഗ്ലണ്ടിനെ വിറപ്പിച്ച പ്രകടനത്തിന് കോംഗോ ഗോൾകീപ്പർ ലയണൽ എംപാസി വലിയ പ്രശംസ പിടിച്ചുപറ്റി. ജൂഡ് ബെല്ലിംഗ്ഹാം ഉൾപ്പെടെയുള്ള ഇംഗ്ലീഷ് താരങ്ങൾ മത്സരത്തിനിടയിൽ എംപാസിയെ കെട്ടിപ്പിടിച്ചാണ് അഭിനന്ദിച്ചത്. പിതാവിന്റെ വിയോഗം ഡെസാബ്രെയെ ഉലച്ചെങ്കിലും, കോംഗോ ഫുട്ബോൾ ചരിത്രത്തിലെ ഏറ്റവും മികച്ച ലോകകപ്പ് ക്യാമ്പെയ്നാണ് അദ്ദേഹം സമ്മാനിച്ചത്. 1974-ന് ശേഷം ആദ്യമായി ലോകകപ്പിന് യോഗ്യത നേടിയ കോംഗോ, ചരിത്രത്തിലാദ്യമായാണ് നോക്കൗട്ട് ഘട്ടത്തിൽ പ്രവേശിക്കുന്നത്. ലോകകപ്പിലെ തങ്ങളുടെ ആദ്യ വിജയവും ആദ്യ ഗോൾ നേട്ടവും സ്വന്തമാക്കിയാണ് കോംഗോ 2026 ലോകകപ്പിന്റെ വലിയ സർപ്രൈസ് സ്റ്റോറിയായി മാറി മടങ്ങുന്നത്.
