വനിതാ സംവരണ ബില്ലും ലോക്സഭാ മണ്ഡലങ്ങളുടെ പുനർനിർണയവും പ്രധാന അജണ്ടയാക്കി പാർലമെന്റിന്റെ പ്രത്യേക സിറ്റിംഗ് അടുത്ത മാസം മൂന്നാം വാരം വിളിച്ചുചേർക്കാൻ കേന്ദ്ര സർക്കാർ ആലോചിക്കുന്നു.
ബ്രിക്സ് ഉച്ചകോടി പൂർത്തിയായതിന് ശേഷം പ്രത്യേക സിറ്റിംഗ് നടത്തുന്നതിനെക്കുറിച്ചാണ് ഭരണകൂടം നിലവിൽ ചർച്ചകൾ നടത്തുന്നത്. സർവകക്ഷി യോഗം വിളിച്ച് പ്രതിപക്ഷവുമായി കൂടിയാലോചനകൾ നടത്തിയ ശേഷം മാത്രമേ അന്തിമ തീരുമാനമെടുക്കാവൂ എന്ന് വ്യക്തമാക്കി കോൺഗ്രസ് അധ്യക്ഷൻ മല്ലികാർജ്ജുൻ ഖാർഗെ പ്രധാനമന്ത്രിക്ക് കത്തയച്ചിട്ടുണ്ട്.
ഭരണഘടനാ ഭേദഗതി ആവശ്യമായ സുപ്രധാന വിഷയമായതിനാൽ പാർലമെന്റിൽ മൂന്നിൽ രണ്ട് ഭൂരിപക്ഷം ഉറപ്പാക്കേണ്ടത് സർക്കാരിന് അനിവാര്യമാണ്. ഡിഎംകെ, ശരദ് പവാറിന്റെ നേതൃത്വത്തിലുള്ള എൻസിപി തുടങ്ങിയ നിർണായക പ്രാദേശിക കക്ഷികളുടെ പിന്തുണ കൂടി ഉറപ്പുവരുത്തിയ ശേഷമേ പ്രത്യേക സിറ്റിംഗിന്റെ തീയതിയിൽ അന്തിമ പ്രഖ്യാപനം ഉണ്ടാവുകയുള്ളൂ.
