ക്രിക്കറ്റ് ചരിത്രത്തിൽ റണ്ണടിച്ചുകൂട്ടുന്ന ബാറ്റർമാരും വിക്കറ്റ് വേട്ട നടത്തുന്ന ബൗളർമാരും തകർപ്പൻ ക്യാച്ചുകളെടുക്കുന്ന ഫീൽഡർമാരുമാണ് സാധാരണയായി ‘പ്ലെയർ ഓഫ് ദി മാച്ച്’ പുരസ്കാരത്തിന് അർഹരാകാറുള്ളത്. എന്നാൽ ഒരു റൺ പോലും നേടാതെ, ഒറ്റ വിക്കറ്റ് പോലും വീഴ്ത്താതെ, ഒരു ക്യാച്ച് പോലും എടുക്കാതെ ഒരു താരം മത്സരത്തിലെ താരമായി തിരഞ്ഞെടുക്കപ്പെട്ട അവിശ്വസനീയമായ ഒരു റെക്കോർഡ് അന്താരാഷ്ട്ര ക്രിക്കറ്റ് ചരിത്രത്തിലുണ്ട്. വെസ്റ്റ് ഇൻഡീസിന്റെ മുൻ ഇതിഹാസ പേസ് ബൗളർ കാമറൂൺ കഫിയാണ് ക്രിക്കറ്റ് ലോകത്തെ ഞെട്ടിച്ച ഈ നേട്ടത്തിന് ഉടമ.
2001 ജൂൺ 23-ന് ഹരാരെയിൽ സിംബാബ്വെക്കെതിരെ നടന്ന കോകോ- കോള കപ്പ് ഉദ്ഘാടന മത്സരത്തിലാണ് ഈ അപൂർവ്വ നിമിഷം പിറന്നത്. മത്സരത്തിൽ ആദ്യം ബാറ്റ് ചെയ്ത വെസ്റ്റ് ഇൻഡീസ് നിശ്ചിത 50 ഓവറിൽ അഞ്ച് വിക്കറ്റ് നഷ്ടത്തിൽ 266 റൺസ് നേടി. പതിനൊന്നാമനായി ലിസ്റ്റ് ചെയ്യപ്പെട്ട കഫിക്ക് ബാറ്റ് ചെയ്യാൻ അവസരം ലഭിച്ചില്ല. തുടർന്ന് മറുപടി ബാറ്റിംഗിനിറങ്ങിയ സിംബാബ്വെയ്ക്കെതിരെ വിൻഡീസിനായി ബോളിംഗ് ഓപ്പൺ ചെയ്തത് കാമറൂൺ കഫിയായിരുന്നു. ബാറ്റിംഗിന് അനുകൂലമായ പിച്ചിൽ സിംബാബ്വെ ബാറ്റർമാരെ വരിഞ്ഞുമുറുക്കുന്ന അസാധാരണമായ പ്രകടനമാണ് കഫി പുറത്തെടുത്തത്.
തന്റെ പത്തോവർ ക്വാട്ട പൂർത്തിയാക്കിയ കഫി വിട്ടുകൊടുത്തത് വെറും 20 റൺസ് മാത്രമാണ്. രണ്ട് മെയ്ഡൻ ഓവറുകൾ ഉൾപ്പെടെയായിരുന്നു കഫിയുടെ ഈ സ്പെൽ. അതായത് ഓവറിൽ ശരാശരി വെറും രണ്ട് റൺസ് മാത്രം. റൺറേറ്റ് ഉയർത്താൻ ശ്രമിച്ച എതിർ ബാറ്റർമാർക്ക് ഒരവസരവും നൽകാതെ കഫി സൃഷ്ടിച്ച കടുത്ത സമ്മർദ്ദം സിംബാബ്വെയുടെ ബാറ്റിംഗ് നിരയെ പൂർണ്ണമായി തകർത്തു. കഫിയുടെ പന്തിൽ വിക്കറ്റ് വീണില്ലെങ്കിലും, മറുവശത്ത് നിന്ന് പന്തെറിഞ്ഞ സഹതാരങ്ങൾക്ക് ആ സമ്മർദ്ദം മുതലെടുത്ത് വിക്കറ്റുകൾ വീഴ്ത്താൻ കഴിഞ്ഞു. ഒടുവിൽ സിംബാബ്വെ ഇന്നിംഗ്സ് 50 ഓവറിൽ ഒൻപത് വിക്കറ്റിന് 239 റൺസിൽ അവസാനിക്കുകയും വെസ്റ്റ് ഇൻഡീസ് 27 റൺസിന് ജയിക്കുകയും ചെയ്തു.
പരമ്പരാഗത കണക്കുകളുടെ അടിസ്ഥാനത്തിൽ വിക്കറ്റോ റണ്ണോ സ്വന്തം പേരിൽ കുറിക്കാനായില്ലെങ്കിലും, കളിയുടെ ഗതി പൂർണ്ണമായി നിയന്ത്രിക്കുകയും വിജയത്തിലേക്ക് വഴിയൊരുക്കുകയും ചെയ്തത് കഫിയുടെ ഈ ബോളിംഗ് പ്രകടനമാണെന്ന് ജൂറി വിലയിരുത്തി. തുടർന്നാണ് മത്സരത്തിലെ താരത്തിനുള്ള പുരസ്കാരം അദ്ദേഹത്തിന് സമ്മാനിച്ചത്. ക്രിക്കറ്റ് എന്നാൽ കേവലം റണ്ണുകളും വിക്കറ്റുകളും മാത്രമല്ല, സമ്മർദ്ദം സൃഷ്ടിച്ച് കളിയെ സ്വാധീനിക്കുന്ന തന്ത്രപരമായ മികവ് കൂടിയാണെന്ന് തെളിയിച്ച പ്രകടനമായി ഇന്നും കാമറൂൺ കഫിയുടെ ഈ മത്സരം ഓർമ്മിക്കപ്പെടുന്നു.
