തമിഴ്നാട് നിയമസഭയിൽ മുഖ്യമന്ത്രി സി. ജോസഫ് വിജയ് നടത്തിയ പരാമർശങ്ങളെ ചൊല്ലി ഭരണ-പ്രതിപക്ഷ അംഗങ്ങൾ തമ്മിൽ രൂക്ഷമായ തർക്കവും ബഹളവും ഉടലെടുത്തു. മുൻ ഡിഎംകെ ഭരണകാലത്തെ അഴിമതികളെക്കുറിച്ച് എൻഫോഴ്സ്മെന്റ് ഡയറക്ടറേറ്റ് (ഇഡി) നൽകിയ രേഖകളും സർക്കാരിയ കമ്മീഷൻ റിപ്പോർട്ടും ഉദ്ധരിച്ച് മുഖ്യമന്ത്രി സംസാരിച്ചതാണ് പ്രതിപക്ഷത്തെ പ്രകോപിപ്പിച്ചത്. സഭാ നടപടികൾ ആരംഭിച്ചയുടൻ ഡിഎംകെ വിപ്പ് ഇ.വി. വേലുവിന്റെ നേതൃത്വത്തിൽ പ്രതിപക്ഷ അംഗങ്ങൾ ഈ പരാമർശങ്ങൾ സഭാ രേഖകളിൽ നിന്ന് നീക്കം ചെയ്യണമെന്ന് ആവശ്യപ്പെട്ട് രംഗത്തെത്തി.
എന്നാൽ പൊതുമണ്ഡലത്തിൽ നിലവിലുള്ള കാര്യങ്ങൾ മാത്രമാണ് മുഖ്യമന്ത്രി പരാമർശിച്ചതെന്നും അത് സഭാ നിയമങ്ങൾക്ക് വിരുദ്ധമല്ലെന്നും ചൂണ്ടിക്കാട്ടി സ്പീക്കർ ജെ.സി.ഡി. പ്രഭാകർ പ്രതിപക്ഷത്തിന്റെ ആവശ്യം തള്ളി. നിയമമന്ത്രി ആർ. നിർമ്മൽ കുമാർ സർക്കാരിന്റെ നിലപാടിനെ പിന്തുണയ്ക്കുകയും ഡിഎംകെയ്ക്കെതിരായ അഴിമതി ആരോപണങ്ങൾ ശരിവെക്കുകയും ചെയ്തു. തുടർന്ന് പ്രതിപക്ഷ അംഗങ്ങൾ നടുത്തളത്തിലിറങ്ങി ശക്തമായി പ്രതിഷേധിക്കുകയും സ്പീക്കറുടെ ഡയസിന് മുന്നിൽ തടിച്ചുകൂടി മുദ്രാവാക്യം വിളിക്കുകയും ചെയ്തു.
നിരവധി തവണ മുന്നറിയിപ്പ് നൽകിയിട്ടും പ്രതിപക്ഷ അംഗങ്ങൾ പ്രതിഷേധം തുടർന്നതോടെ സഭാ നായകൻ കെ.എ. സെങ്കോട്ടയ്യൻ നടപടി ആവശ്യപ്പെട്ടു. ഇതേത്തുടർന്ന് സ്പീക്കറുടെ ഉത്തരവുപ്രകാരം മാർഷൽമാർ എത്തി പ്രതിഷേധിച്ച ഡിഎംകെ എംഎൽഎമാരെ ബലമായി സഭയിൽ നിന്ന് പുറത്താക്കി. സഭയിൽ നിന്ന് പുറത്താക്കപ്പെടുമ്പോഴും അംഗങ്ങൾ സർക്കാരിനും സ്പീക്കർക്കുമെതിരെ മുദ്രാവാക്യം വിളി തുടരുന്നുണ്ടായിരുന്നു.
