ജനശതാബ്ദി ട്രെയിനുകളിലെ പുതിയ കോച്ചുകളെച്ചൊല്ലിയുള്ള യാത്രക്കാരുടെ പരാതികൾ ഒടുവിൽ ഫലം കണ്ടു. ദീർഘദൂര യാത്രക്കാർക്ക് തീരെ അനുയോജ്യമല്ലാത്ത കുത്തനെയുള്ള സീറ്റുകൾക്ക് പകരം, യാത്രക്കാർ ആവശ്യപ്പെട്ടിരുന്ന കംഫർട്ടബിൾ ആയ ബക്കറ്റ് ടൈപ്പ് സീറ്റുകളുള്ള കോച്ചുകൾ എത്തിക്കാൻ റെയിൽവേ തീരുമാനിച്ചു. ഇതിനായി ആദ്യ ഘട്ടത്തിൽ 16 പുതിയ കോച്ചുകൾ തിരുവനന്തപുരം ഡിവിഷന് ദക്ഷിണ റെയിൽവേ കൈമാറിയിട്ടുണ്ട്.
തിരുവനന്തപുരം–കോഴിക്കോട് ജനശതാബ്ദി ട്രെയിനുകളിലാണ് ആദ്യം ഈ പുതിയ കോച്ചുകൾ ഘടിപ്പിക്കുന്നത്. രണ്ടാം ഘട്ടത്തിൽ തിരുവനന്തപുരം–കണ്ണൂർ ജനശതാബ്ദിയിലെ സെക്കൻഡ് സിറ്റിങ് കോച്ചുകളും മാറ്റും. ചെന്നൈ ഇന്റഗ്രൽ കോച്ച് ഫാക്ടറി ജനശതാബ്ദി സെക്കൻഡ് സിറ്റിങ് കോച്ചുകളുടെ നിർമ്മാണം നിർത്തിയതോടെയാണ് സാധാരണ മെയിൽ/എക്സ്പ്രസ് ട്രെയിനുകളിലെ ജനറൽ കോച്ചുകൾക്ക് തുല്യമായ, ചരിവില്ലാത്ത സീറ്റുകൾ ജനശതാബ്ദിയിലും നൽകിയിരുന്നത്. ഇതിനെതിരെ യാത്രക്കാർ ഉയർത്തിയ കടുത്ത അമർഷത്തെത്തുടർന്ന് ഉത്തരേന്ത്യൻ റെയിൽവേ ഡിവിഷനുകളിൽ നിന്നാണ് ഇപ്പോൾ ബക്കറ്റ് സീറ്റുകളുള്ള പുതിയ കോച്ചുകൾ കേരളത്തിലേക്ക് എത്തിച്ചിരിക്കുന്നത്.
അതേസമയം, തിരുവനന്തപുരം–ഷൊർണൂർ വേണാട് എക്സ്പ്രസിലെ അതിരൂക്ഷമായ തിരക്ക് പരിഹരിക്കുന്നതിനായി ഉയർന്ന ശേഷിയുള്ള പുതിയ ജനറൽ കോച്ചുകൾ അനുവദിക്കാനും റെയിൽവേ തീരുമാനിച്ചു. 108 പേർക്ക് പകരമായി 220 പേർക്ക് ഇരിക്കാനും അമ്പതോളം പേർക്ക് നിൽക്കാനും സൗകര്യമുള്ള 10 പുതിയ കോച്ചുകളാണ് വേണാടിനായി ഉടൻ ലഭ്യമാക്കുന്നത്. ലഗേജ് റാക്കിന്റെ ഭാഗത്ത് കുഷ്യൻ നൽകിയിട്ടുള്ളതിനാൽ ഇവിടെയും യാത്രക്കാർക്ക് സുഖകരമായി ഇരിക്കാൻ കഴിയും. ആഴ്ചയുടെ തുടക്കത്തിലും അവസാന ദിവസങ്ങളിലും യാത്രക്കാർക്ക് കയറിപ്പറ്റാൻ പോലും കഴിയാത്തവിധം ശ്വാസം മുട്ടിക്കുന്ന തിരക്ക് അനുഭവപ്പെടുന്ന വേണാട് എക്സ്പ്രസ് യാത്രക്കാർക്ക് ഈ തീരുമാനം വലിയ രീതിയിൽ ആശ്വാസമാകും.
