ഇന്ത്യൻ ക്രിക്കറ്റ് താരം വിരാട് കോഹ്‌ലിയുടെ നിലവിലെ ബാറ്റിംഗ് ഫോമിനെയും തന്ത്രങ്ങളെയും പ്രശംസിച്ച് മുൻ ദക്ഷിണാഫ്രിക്കൻ ഇതിഹാസ താരം എബി ഡിവില്ലിയേഴ്സ്. സ്വന്തം സ്വാഭാവിക ശൈലിയിൽ ശാന്തമായി ബാറ്റ് വീശുമ്പോൾ കോഹ്‌ലിയെ തടഞ്ഞുനിർത്തുക അസാധ്യമാണെന്ന് ഡിവില്ലിയേഴ്സ് നിരീക്ഷിച്ചു. 2027-ൽ നടക്കാനിരിക്കുന്ന ഏകദിന ലോകകപ്പിൽ ഇന്ത്യൻ ടീമിനായി വിരാട് സൃഷ്ടിക്കാൻ പോകുന്ന സ്വാധീനം ഓർക്കുമ്പോൾ എതിരാളികൾക്ക് അത് ഭയം ഉളവാക്കുന്നതാണെന്നും അദ്ദേഹം വ്യക്തമാക്കി.
തന്റെ കരിയറിലെ മൂന്നാമത്തെ മികച്ച ഘട്ടത്തിലൂടെയാണ് കോഹ്‌ലി ഇപ്പോൾ കടന്നുപോകുന്നതെന്ന് ഡിവില്ലിയേഴ്സ് അഭിപ്രായപ്പെട്ടു. മത്സരങ്ങളെ മുൻപത്തേക്കാൾ ഏറെ ശാന്തമായും അനായാസമായും സമീപിക്കുന്ന പുതിയ പതിപ്പ് കോഹ്‌ലിയെ കൂടുതൽ അപകടകാരിയാക്കുന്നുണ്ട്. അനാവശ്യമായ സമ്മർദ്ദങ്ങളോ ചിന്തകളോ ഇല്ലാതെ മനസ്സിന്റെ ആഗ്രഹത്തിനനുസരിച്ച് (Instinct) കളിക്കാനിറങ്ങുമ്പോൾ താരത്തിന് മികച്ച തീരുമാനങ്ങൾ എടുക്കാൻ സാധിക്കുന്നുണ്ടെന്നും, 2027 ലോകകപ്പിൽ അനുഭവസമ്പത്ത് കൊണ്ടും ബാറ്റിംഗ് മികവ് കൊണ്ടും ഇന്ത്യയുടെ ഏറ്റവും വലിയ കരുത്ത് വിരാട് കോഹ്‌ലി തന്നെയായിരിക്കുമെന്നും ഡിവില്ലിയേഴ്സ് കൂട്ടിച്ചേർത്തു.
