കൊച്ചി കളമശ്ശേരിയിൽ യുവതിയെ ഭീഷണിപ്പെടുത്തി കൂട്ടബലാത്സംഗത്തിന് ഇരയാക്കിയ കേസിൽ ഞെട്ടിക്കുന്ന വിവരങ്ങൾ പുറത്ത്. സ്പാ ജോലിയുടെ മറവിൽ കൂടുതൽ പെൺകുട്ടികളെ ഇരയാക്കാൻ വിപുലമായ പെൺവാണിഭ ശൃംഖല തന്നെ പ്രവർത്തിച്ചിരുന്നതായി പോലീസ് കണ്ടെത്തി. കേസിലെ മുഖ്യസൂത്രധാരനായ ആലപ്പുഴ സ്വദേശി ശ്രീരാജ് തട്ടിപ്പിനായി പതിനഞ്ചോളം യുവതികളെ ഇത്തരത്തിൽ അഭിമുഖത്തിനെന്ന പേരിൽ വിളിപ്പിച്ചിരുന്നതായാണ് പോലീസിന്റെ പുതിയ കണ്ടെത്തൽ.
കേസിൽ അറസ്റ്റിലായ ശ്രീരാജിന്റെ പക്കൽ നിന്നും പിടിച്ചെടുത്ത രണ്ട് മൊബൈൽ ഫോണുകൾ വിശദമായ ശാസ്ത്രീയ പരിശോധനയ്ക്ക് വിധേയമാക്കിയപ്പോഴാണ് നിർണ്ണായകമായ വാട്‌സ്ആപ്പ് ചാറ്റുകളും വിവരങ്ങളും പോലീസിന് ലഭിച്ചത്. മോശം ഉദ്ദേശ്യത്തോടെയും ക്രൂരമായ അതിക്രമങ്ങൾ ആസൂത്രണം ചെയ്തുമാണ് ഇയാൾ യുവതികളെ വ്യാജ അഭിമുഖങ്ങൾക്കായി കൊച്ചിയിലേക്ക് വിളിച്ചുവരുത്തിയിരുന്നത്. നിലവിൽ ക്രൂര പീഡനത്തിനിരയായ അതിജീവിതയെയും സമാനമായ രീതിയിൽ സ്പാ ജോലി വാഗ്ദാനം ചെയ്താണ് ഇയാൾ വലയിലാക്കിയതും തുടർന്ന് വിളിച്ചുവരുത്തി ആക്രമിച്ചതും.
ശ്രീരാജ് തയ്യാറാക്കിയ 10 മുതൽ 15 വരെ യുവതികളുടെ പട്ടിക പോലീസ് ശേഖരിച്ചിട്ടുണ്ട്. ഇതിൽ കൂടുതൽ പേർ ക്രൂരമായ അതിക്രമങ്ങൾക്ക് ഇരയായിട്ടുണ്ടോ എന്ന സംശയത്തിലാണ് പോലീസ്. ഇവർക്ക് ഈ റാക്കറ്റുമായി ബന്ധപ്പെട്ട് ദുരനുഭവങ്ങൾ ഉണ്ടായിട്ടുണ്ടോ എന്ന് കണ്ടെത്താൻ പോലീസിന്റെ നേതൃത്വത്തിൽ വിപുലമായ അന്വേഷണം ആരംഭിച്ചു. കൊച്ചി കേന്ദ്രീകരിച്ച് പ്രവർത്തിക്കുന്ന വ്യാജ സ്പാ സെന്ററുകളെയും തൊഴിൽ ഏജൻസികളെയും കേന്ദ്രീകരിച്ച് അന്വേഷണം ഊർജ്ജിതമാക്കാനാണ് സിറ്റി പോലീസിന്റെ തീരുമാനം.
