പാകിസ്ഥാനിലെ വടക്കുപടിഞ്ഞാറൻ അതിർത്തി ജില്ലയായ സ്വാതിൽ അവിടുത്തെ ന്യൂനപക്ഷ ഹൈന്ദവ സമൂഹം ചരിത്രത്തിലദ്യമായി വാൽമീകി ജയന്തി ആഘോഷിച്ചു. ഖൈബർ പഖ്തുൻഖ്വ പ്രവിശ്യയിലെ സ്വാത് ജില്ലാ ഭരണകൂടത്തിന്റെ നേതൃത്വത്തിലാണ് തിങ്കളാഴ്ച ഈ ചരിത്രപരമായ ചടങ്ങ് സംഘടിപ്പിച്ചത്. രാമായണത്തിന്റെ കർത്താവായ മഹർഷി വാൽമീകിയുടെ ജന്മദിനാഘോഷത്തിന്റെ ഭാഗമായി നടന്ന ചടങ്ങിൽ നൂറുകണക്കിന് വിശ്വാസികൾ പങ്കെടുത്തു.
വാൽമീകി സമുദായത്തിൽപ്പെട്ട വിശ്വാസികൾ പ്രത്യേക മതപരമായ ചടങ്ങുകളും പ്രാർത്ഥനകളും നടത്തി. പാകിസ്ഥാന്റെ പുരോഗതിക്കും ഐശ്വര്യത്തിനും സുരക്ഷയ്ക്കുമായി പ്രത്യേക പ്രാർത്ഥനകൾ ഉയർന്ന ചടങ്ങിൽ, മതസൗഹാർദ്ദം പുലരേണ്ടതിന്റെ ആവശ്യകതയും ഓർമ്മിപ്പിച്ചു. അഡീഷണൽ ഡെപ്യൂട്ടി കമ്മീഷണർ നെമത്തുള്ള, അസിസ്റ്റന്റ് കമ്മീഷണർ അഫ്നാൻ റസ, ന്യൂനപക്ഷ സമുദായ പ്രതിനിധി ഡോ. സണ്ണി കുമാർ എന്നിവർ ചടങ്ങിൽ വിശിഷ്ടാതിഥികളായി പങ്കെടുത്തു.
ചടങ്ങിൽ വാൽമീകി സമുദായത്തിലെ പൂജാരി മഹർഷി വാൽമീകിയുടെ ഉപദേശങ്ങളെക്കുറിച്ചും ആഘോഷത്തിന്റെ പവിത്രതയെക്കുറിച്ചും സംസാരിച്ചു. രാജ്യത്ത് മതസ്വാതന്ത്ര്യം ഉറപ്പാക്കേണ്ടതിന്റെയും ന്യൂനപക്ഷങ്ങളുടെ അവകാശങ്ങൾ സംരക്ഷിക്കേണ്ടതിന്റെയും പ്രാധാന്യം ഭരണകൂട പ്രതിനിധികളും ഊന്നിപ്പറഞ്ഞു. വിവിധ മതവിശ്വാസികൾ തമ്മിലുള്ള പരസ്പര ബഹുമാനവും സൗഹാർദ്ദവുമാണ് സമാധാനപരമായ സഹവർത്തിത്വത്തിന് അടിസ്ഥാനമെന്ന് അവർ വ്യക്തമാക്കി.
സുരക്ഷയടക്കമുള്ള മുൻകരുതലുകൾ എടുത്ത് ആഘോഷങ്ങൾ ഭംഗിയായി സംഘടിപ്പിച്ചു നൽകിയതിന് സ്വാത് ജില്ലാ ഭരണകൂടത്തിന് ഹൈന്ദവ സമുദായ പ്രതിനിധികൾ നന്ദി അറിയിച്ചു. ന്യൂനപക്ഷ അവകാശങ്ങൾ സംരക്ഷിക്കുന്നതിനും മതസൗഹാർദ്ദം വളർത്തുന്നതിനും വേണ്ടിയുള്ള സുപ്രധാന ചുവടുവെപ്പാണ് ഈ ആഘോഷമെന്ന് ജില്ലാ ഭരണകൂടവും വ്യക്തമാക്കി.
