അധിക ലഗേജെന്ന് പറഞ്ഞ് പിഴ ഈടാക്കി എയര്‍ ഏഷ്യ, ‘ഞാന്‍ മേക്കപ്പ് കിറ്റുമായി വരുമെന്നാണോ അവര്‍ പ്രതീക്ഷിച്ചത്?’ കുറിക്കു കൊള്ളുന്ന ചോദ്യം ഉന്നയിച്ച് പി ആര്‍ ശ്രീജേഷ്

കൊച്ചി: ഹോക്കി താരം ഒളിംപ്യന്‍ പി.ആര്‍.ശ്രീജേഷില്‍ നിന്ന് പിഴ ഈടാക്കി വിമാന കമ്പനി. എയര്‍ ഏഷ്യയാണ് ഇന്ത്യയുടെ അഭിമാന താരത്തിനെ പിഴ ഈടാക്കി അവഹേളിച്ചത്. ബെംഗളൂരുവില്‍ നിന്ന് കൊച്ചിയിലേക്കുള്ള യാത്രയില്‍ അനുവദനീയമായ അളവിലുള്ള ലഗേജ് ബാഗായിരുന്നിട്ടും കായിക ഉപകരണം എന്ന പേരില്‍ 1500 രൂപ ശ്രീജേഷില്‍ നിന്ന് എയര്‍ ഏഷ്യ അധികമായി ഈടാക്കി. തനിക്കുണ്ടായ അനുഭവം പി ആര്‍ ശ്രീജേഷ് തന്നെയാണ് ട്വിറ്ററിലൂടെ പ്രതികരിച്ചത്.

പ്രാദേശിക സര്‍വീസ് നടത്തുന്ന വിമാനങ്ങളില്‍ ചെക്ക് ഇന്‍ ബാഗേജ് ആയി 15 കിലോ വരെ സൗജന്യമായി അനുവദിക്കുന്നുണ്ട്. ശ്രീജേഷിന്റെ ബാഗിനു 15 കിലോയില്‍ താഴെയായിരുന്നു ഭാരം. എന്നാല്‍ ഹോക്കി ഗോള്‍കീപ്പര്‍ കാലില്‍ കെട്ടുന്ന പാഡുകള്‍ ശ്രീജേഷിന്റെ ബാഗിലുണ്ടായിരുന്നു. കായിക ഉപകരണമാണെന്നു ചൂണ്ടിക്കാട്ടി 1500 രൂപ അധികം ഈടാക്കുകയായിരുന്നു.

‘ഞാന്‍ മേക്കപ്പ് കിറ്റുമായി വരുമെന്നാണോ അവര്‍ പ്രതീക്ഷിച്ചത്?’ എന്ന ചോദ്യം ഉന്നയിച്ച് രൂക്ഷമായി പ്രതികരിച്ച ശ്രീജേഷ് ഈ ചോദ്യത്തോടൊപ്പം അധിക തുക ഇടാക്കിയ ബില്ലും പോസ്റ്റ് ചെയ്തിട്ടുണ്ട്.

പെട്ടെന്ന് വൈറലായ ഈ പോസ്റ്റിനെത്തുടര്‍ന്ന്, വിമാന കമ്പനിയുടെ നടപടിക്കെതിരെ വ്യാപക പ്രതിഷേധമാണ് സമൂഹ മാധ്യമങ്ങളിലുണ്ടായിരിക്കുന്നത്.

Extra charges for the sports equipment bag which come below 15kg ??Are they expecting me to carry makeup kit?? ..funny concept @AirAsia pic.twitter.com/yrV8vVvCDk

— sreejesh p r (@16Sreejesh) November 1, 2016