കൊച്ചി: പൊതുസ്ഥലത്ത് മദ്യപിച്ചെന്ന് ആരോപിച്ച് പിടികൂടിയ യുവാക്കളെ അടിവസ്ത്രം മാത്രം ധരിപ്പിച്ച് ലോക്കപ്പിലടച്ച എസ്ഐയ്ക്ക് സ്ഥലം മാറ്റം. എറണാകുളം സൗത്ത് സ്റ്റേഷന്‍ എസ്ഐ എ സി വിപിനെതിരെയാണ് നടപടി. തൃക്കാക്കര അസിസ്റ്റന്റ് കമ്മീഷണര്‍ കേസന്വേണം നടത്തും. യുവാക്കളെ അടിവസ്ത്രം മാത്രം ധരിപ്പിച്ച് പീഡിപ്പിച്ച പോലീസിനെ കംപ്ലെയിന്റ് അതോറിറ്റി ചെയര്‍മാന്‍ ഇന്നലെ രാത്രി കയ്യോടെ പിടികൂടിയിരുന്നു.
പൊതുസ്ഥലത്ത് മദ്യപിച്ചെന്ന് ആരോപിച്ച് പിടികൂടിയ യുവാക്കളെ അടിവസ്ത്രം മാത്രം ധരിപ്പിച്ച് ലോക്കപ്പിലിടയ്ക്കുകയായിരുന്നു. വൈദ്യപരിശോധനയ്ക്ക് കൊണ്ടുപോകാം എന്ന് പറഞ്ഞ് ബലമായി ജീപ്പില്‍ കയറ്റി. കൊണ്ടുപോയത് എറണാകുളം സൗത്ത് പോലീസ് സ്റ്റേഷനിലേക്കാണ്. മൂവരുടെയും വസ്ത്രങ്ങളുരിഞ്ഞശേഷം ലോക്കപ്പിലടയ്ക്കുകയായിരുന്നു.
വിവരമറിഞ്ഞ് പോലീസ് കംപ്ലയിന്റ് അഥോറിറ്റി അര്‍ധരാത്രി സ്റ്റേഷനില്‍ പരിശോധന നടത്തി. പോലീസ് പീഡനം നടക്കുന്നെന്ന് അറിഞ്ഞ് ജസ്റ്റിസ് നാരായണക്കുറുപ്പ് പരിശോധനക്കെത്തിയതോടെ പോലീസ് തിടുക്കത്തില്‍ ഇവരെ വസ്ത്രം ധരിപ്പിക്കാന്‍ ശ്രമിച്ചു.
കസ്റ്റഡിയില്‍ എടുത്തവരെ വിട്ടു കിട്ടണമെന്നും എസ്ഐക്കെതിരെ നടപടി എടുക്കണമെന്നും ആവശ്യപ്പെട്ട് എംഎല്‍എ ഹൈബി ഈഡന്റെ നേതൃത്വത്തില്‍ സ്റ്റേഷന്‍ ഉപരോധിച്ചു. യുവാക്കളെ ജാമ്യത്തില്‍ വിടാമെന്ന് കമ്മീഷണര്‍ അറിയിച്ചതോടെ സമരം അവസാനിപ്പിച്ചു. യുവാക്കളെ അടിവസ്ത്രം മാത്രം ധരിപ്പിച്ച് ലോക്കപ്പിലടച്ച സംഭവത്തില്‍ പോലീസ് നയം വ്യക്തമാക്കണമെന്ന് പ്രതിപക്ഷനേതാവ് രമേശ് ചെന്നിത്തല പറഞ്ഞു.
Discussion about this post