തൃശൂർ; പൂരനഗരിയിൽ തലയെടുപ്പോടെ ഇനി റോബോട്ടുകളും. ഫ്യൂച്ചറിസ്റ്റിക് ടെക്നോളജി പൊതുജനങ്ങൾക്ക് പരിചയപ്പെടുത്താൻ തൃശൂർ ആസ്ഥാനമായ സ്റ്റാർട്ടപ്പ് കമ്പനി ഇൻകർ റോബോട്ടിക്സ് ആണ് എക്സ്പോ സംഘടിപ്പിച്ചിരിക്കുന്നത്. പൂരം എക്സിബിഷന്റെ ഭാഗമായിട്ടാണ് ഏപ്രിൽ നാല് മുതൽ മെയ് 22 വരെ എക്സ്പോ നടക്കുക.
ശസ്ത്രക്രിയകളിൽ സഹായിക്കുന്ന റോബോട്ടുകൾ മുതൽ വയലുകളിൽ കർഷകരെ സഹായിക്കുന്നത് വരെയുള്ള വൈവിധ്യമാർന്ന ജോലികൾക്കായി നിയോഗിക്കുന്ന റോബോട്ടുകളെ സന്ദർശകർക്ക് കാണാം. യുകെ, മിഡിൽ ഈസ്റ്റ് എന്നിവിടങ്ങളിൽ നിന്നുള്ള പ്രമുഖരും പ്രത്യേക അതിഥികളായി എക്സ്പോ സന്ദർശിക്കും. റോബോട്ടിക്സിലെ ഏറ്റവും നൂതനവും അത്യാധുനികവുമായ സംഭവവികാസങ്ങൾ ഇൻകർ പ്രദർശനത്തിന് ഒരുക്കിയിട്ടുണ്ട്.
സാങ്കേതികവിദ്യയുടെ പരിണാമത്തിലൂടെ ഒരാളെ നയിക്കുന്ന സെൻസറുകളുള്ള 50 അടി ഇന്ററാക്ടീവ് ഭിത്തിയാണ് അതിഥികളെ സ്വാഗതം ചെയ്യുക. റോബോട്ടുകൾ, ആർട്ടിഫിഷ്യൽ ഇന്റലിജൻസ്, ഇൻഡസ്ട്രിയൽ റോബോട്ടുകൾ എന്നിവ ഹാൾമാർക്കുകളായി പ്രവർത്തിക്കും. ഡ്രോൺ സാങ്കേതികവിദ്യ പരിചയപ്പെടുത്തുന്ന വിഭാഗവും സന്ദർശകർക്ക് വേണ്ടി ഒരുക്കിയിട്ടുണ്ട്.
കുട്ടികൾ ഉൾപ്പെടെയുള്ളവർക്ക് സാങ്കേതിക മേഖലയിൽ നാം കൈവരിച്ച പുരോഗതികൾ നേരിട്ട് പഠിക്കാനും അനുഭവിക്കാനുമുള്ള മികച്ച അവസരമാണ് എക്സ്പോയിലൂടെ ലഭിക്കുകയെന്ന് ഇൻകർ റോബോട്ടിക്സ് സ്ഥാപകൻ രാഹുൽ പി ബാലചന്ദ്രൻ പറഞ്ഞു. 4500 ചതുരശ്ര അടി വിസ്തീർണമുള്ള വേദിയിലാണ് പ്രദർശനം. നാവോ, ഡോബോട്ട് മജീഷ്യൻ, ഡോബോട്ട് എം1, കുക്കിംഗ് റോബോട്ട്, ഫാംബോട്ട് എന്നിവയുൾപ്പെടെയുള്ള വ്യത്യസ്ത റോബോട്ടുകളെ ആളുകൾക്ക് തനതായ പ്രവർത്തനക്ഷമതയോടെ പ്രദർശന വേദിയിൽ കാണാം.
Discussion about this post