കോഴിക്കോട്: മുഖ്യമന്ത്രിയുടെ യുഎഇ സന്ദർശനത്തിന് അനുമതി നിഷേധിച്ചതിന് പിന്നാലെ കേന്ദ്രസർക്കാരിനെ വിമർശിച്ച് മന്ത്രി മുഹമ്മദ് റിയാസ്. ലോകം എന്തെന്ന് മനസ്സിലാക്കുന്നതിന് വേണ്ടിയാണ് വിദേശയാത്രകൾ. പ്രധാനമന്ത്രി ധാരാളം വിദേശ യാത്രകൾ നടത്തുന്നുണ്ടല്ലോയെന്നും മുഹമ്മദ് റിയാസ് ചോദിച്ചു. കോഴിക്കോട് മാദ്ധ്യമങ്ങളോട് ആയിരുന്നു അദ്ദേഹത്തിന്റെ പ്രതികരണം.
വിദേശ യാത്ര നടത്തുക എന്നത് ഒരു മോശം കാര്യമല്ല. മന്ത്രിമാർ ഇതിന് മുൻപും നിരവധി തവണ വിദേശ യാത്രകൾ നടത്തിയിട്ടുണ്ട്. ലോകത്തെ നേരിട്ട് കണ്ട് അറിയുകയാണ് വിദേശയാത്രകളുടെ ലക്ഷ്യം. ഒരുപാട് വിദേശയാത്ര നടത്തുന്നയാളല്ലേ നമ്മുടെ പ്രധാനമന്ത്രിയും.
നാവിന്റെ വലിപ്പം കൊണ്ട് മാത്രം നിലനിന്ന് പോകുന്ന പാർട്ടിയല്ല സിപിഎം. മറിച്ച് രാഷ്ട്രീയ പ്രശ്‌നങ്ങളിൽ വിഷയങ്ങളിലും സജീവമായി ഇടപെടുന്ന പാർട്ടിയാണ്. സിപിഎം ഉത്തരവാദിത്വങ്ങൾ ഏറ്റെടുക്കുന്നത് രാഷ്ട്രീയ നന്മയ്ക്ക് വേണ്ടിയാണ്. അല്ലാതെ രാഷ്ട്രീയ ലാഭത്തിന് വേണ്ടിയല്ലെന്നും മുഹമ്മദ് റിയാസ് വ്യക്തമാക്കി.
നിക്ഷേപക സംഗമത്തിൽ പങ്കെടുക്കുന്നതിന് വേണ്ടിയുള്ള മുഖ്യമന്ത്രിയുടെ യുഎഇ യാത്രയ്ക്കാണ് അനുമതി നിഷേധിച്ചത്. പരിപാടിയിൽ മുഖ്യമന്ത്രി പങ്കെടുക്കേണ്ട കാര്യമില്ലെന്നുള്ള നിരീക്ഷണത്തെ തുടർന്നായിരുന്നു അനുമതി നൽകാതിരുന്നത്. അതേസമയം നിക്ഷേപക സംഗമത്തിൽ പങ്കെടുക്കാൻ കേരള സർക്കാരിന്റെ പ്രതിനിധി സംഘം യുഎഇയിലേക്ക് തിരിക്കും.
