കുംഭകോണം: തുടർച്ചയായി മൊബൈലിൽ ദൃശ്യങ്ങൾ പകർത്തിക്കൊണ്ടിരുന്ന ആരാധകനോട് അസഹിഷ്ണുത പ്രകടിപ്പിച്ച് നയൻതാര. ഭർത്താവ് വിഘ്നേഷുമൊത്ത് ക്ഷേത്ര ദർശനത്തിന് എത്തിയപ്പോഴായിരുന്നു സംഭവം.
തമിഴ്നാട്ടിലെ കുംഭകോണത്ത് പൈങ്കുനി ഉത്രം ഉത്സവത്തിനായി ഭർത്താവ് വിഘ്നേഷ് ശിവനുമൊത്ത് എത്തിയപ്പോഴായിരുന്നു സംഭവം. ട്രെയിനിൽ കയറുമ്പോഴും ഫോണിൽ ദൃശ്യങ്ങൾ പകർത്തിക്കൊണ്ടിരുന്ന ആൾക്ക് നടി താക്കീത് നൽകുകയായിരുന്നു. ക്ഷേത്രത്തിൽ എത്തിയപ്പോൾ മുതൽ ഇരുവരെയും ജനക്കൂട്ടം പൊതിഞ്ഞ നിലയിലായിരുന്നു. ഇതിൽ ഏറെ അസ്വസ്ഥയായിരുന്നു താരം.
നയൻതാര താക്കീത് നൽകിയതോടെ ഒപ്പമുണ്ടായിരുന്നവരും ദൃശ്യങ്ങൾ പകർത്തിയ ആളെ വിലക്കി. സോഷ്യൽ മീഡിയയിൽ ഇതിന്റെ ദൃശ്യങ്ങൾ പ്രചരിക്കുന്നുണ്ട്. നയൻതാരയെ പിന്തുണച്ചും നിരവധി പേരാണ് ക്മന്റുകളുമായി എത്തിയത്.
വിഘ്നേഷുമായുളള വിവാഹത്തിന് ശേഷം തുടർച്ചയായി മാദ്ധ്യമശ്രദ്ധയിലാണ് ദമ്പതികൾ. ഇവരുടെ വാടക ഗർഭധാരണവും ക്ഷേത്ര സന്ദർശനങ്ങളുമെല്ലാം നിരന്തരം വാർത്തകളായിരുന്നു. സ്വകാര്യത പോലും ലംഘിക്കുന്ന തരത്തിൽ പോകുന്നിടത്തെല്ലാം ദൃശ്യങ്ങൾ പകർത്തുന്നതിനെ നിശിതമായി വിമർശിച്ചാണ് നയൻതാരയുടെ ആരാധകർ താരത്തിന്റെ പെരുമാറ്റത്തെ ന്യായീകരിക്കുന്നത്. മിക്കപ്പോഴും കൂൾ ആയി ചിരിയോടെയാണ് നയൻതാരയെ കാണാനാകുക.
