ബംഗളൂരു; എയ്റോ ഇന്ത്യ 2023 ന് ബംഗളൂരുവിൽ തുടക്കം. പ്രധാനമന്ത്രി നരേന്ദ്രമോദിയാണ് ഷോ ഉദ്ഘാടനം ചെയ്തത്. നവ ഭാരതത്തിന്റെ പുതിയ സമീപനമാണ് ഷോ പ്രതിഫലിപ്പിക്കുന്നതെന്ന് പ്രധാനമന്ത്രി പറഞ്ഞു. ഇന്ന് ലോകത്തെ പ്രതിരോധ കമ്പനികൾക്ക് ഇന്ത്യ ഒരു വിപണി മാത്രമല്ല. കഴിവുളള ഒരു പ്രതിരോധ പങ്കാളിയാണെന്ന് പ്രധാനമന്ത്രി ചൂണ്ടിക്കാട്ടി. പ്രതിരോധ മേഖലയിൽ ഏറെ മുൻപിലുളള രാജ്യങ്ങളുമായി പോലും ഈ പങ്കാളിത്തം വളർന്നതായും അദ്ദേഹം പറഞ്ഞു.
എയ്റോഇന്ത്യയെ വെറും ഒരു പ്രദർശനമായി മാത്രം കണ്ടിരുന്ന ഒരു കാലമുണ്ടായിരുന്നു. എന്നാൽ കഴിഞ്ഞ കുറച്ച് നാളുകൾ കൊണ്ട് രാജ്യം അത്തരം കാഴ്ചപ്പാട് മാറ്റിയെടുത്തു. ഇന്ന് ഇത് ഒരു പ്രദർശനത്തിനപ്പുറം ഇന്ത്യയുടെ കരുത്താണ് വിളിച്ചോതുന്നത്. ഇന്ത്യൻ പ്രതിരോധ മേഖലയുടെ സ്വയം പര്യാപ്തതയും അതിന്റെ സാദ്ധ്യതയുമാണ് എയ്റോ ഷോ ഫോക്കസ് ചെയ്യുന്നതെന്നും പ്രധാനമന്ത്രി പറഞ്ഞു.
പ്രതിരോധ ആവശ്യങ്ങൾക്കായി ആശ്രയിക്കാവുന്ന രാജ്യമെന്ന നിലയിൽ വിദേശ രാജ്യങ്ങൾ ഇന്ത്യയെ കണ്ടുതുടങ്ങി. ഇന്ത്യയുടെ വികസിച്ചുകൊണ്ടിരിക്കുന്ന സാമർത്ഥ്യത്തിന്റെ ഉദാഹരണമാണ് ഇന്ന് എയ്റോ ഷോ. ഇന്ത്യയിൽ ലോകരാജ്യങ്ങൾ അർപ്പിക്കുന്ന വിശ്വാസം ഉയർന്നുവെന്നാണ് എയ്റോ ഷോയിൽ സാന്നിദ്ധ്യമറിയിക്കുന്ന 100 ഓളം രാജ്യങ്ങൾ തെളിയിക്കുന്നത്. ഇന്ത്യയിലും പുറത്തുമുള്ള 700 ലധികം പ്രദർശകരാണ് ഷോയിൽ പങ്കെടുക്കുന്നത്. എയ്റോഷോയുടെ കഴിഞ്ഞകാല റെക്കോഡുകൾ തകർക്കുന്നതാണ് ഈ പങ്കാളിത്തമെന്നും പ്രധാനമന്ത്രി കൂട്ടിച്ചേർത്തു.
പുതിയ ചിന്താഗതിയും പുതിയ സമീപനമായി രാജ്യം മുന്നോട്ടുപോയപ്പോൾ അതിന്റെ സംവിധാനങ്ങളും പുതിയ ചിന്താഗതികൾ സ്വായത്തമാക്കി തുടങ്ങി. 21 ാം നൂറ്റാണ്ടിലെ നവഭാരതം ഒരു അവസരവും പാഴാക്കില്ല. കഠിനാധ്വാനത്തിന്റെ ഒരു കുറവും ഉണ്ടാക്കില്ലെന്നും പ്രധാനമന്ത്രി പറഞ്ഞു. ഇന്നത്തെ ഇന്ത്യയുടെ വിജയമാണ് രാജ്യത്തിന്റെ ശേഷിയുടെ തെളിവെന്നും പ്രധാനമന്ത്രി പറഞ്ഞു. പ്രതിരോധ, എയ്റോസ്പേസ് മേഖലയിലെ നമ്മുടെ രാജ്യത്തിന്റെ അനന്തമായ സാദ്ധ്യതകൾ തുറന്നുകാട്ടാനുളള മനോഹരമായ വേദിയാണ് എയ്റോ ഇന്ത്യ ഷോയെന്നും പ്രധാനമന്ത്രി ചൂണ്ടിക്കാട്ടി. എയ്റോ ഇന്ത്യഷോ 2023 ന്റെ സ്മാരക സ്റ്റാമ്പുകളും പ്രധാനമന്ത്രി പുറത്തിറക്കി.
Discussion about this post