ബംഗളൂരു : ടെക്ക് കമ്പനി എംഡിയെയും സിഇഒയെയും മുൻ ജീവനക്കാരൻ വെട്ടിക്കൊന്നു. ബംഗളൂരുവിലാണ് സംഭവം. ഏറോണിക്സ് ഇന്റർനെറ്റ് കമ്പനിയുടെ എംഡി ഫനീന്ദ്ര സുബ്രമണ്യയും സിഇഒ വിനു കുമാറുമാണ് കൊല്ലപ്പെട്ടത്. കമ്പനിയിലെ മുൻ ജീവനക്കാരൻ ഫെലിക്സ് ആണ് ഇവരെ വെട്ടിക്കൊന്നത്. അക്രമി ഫെലിക്സ് ഒളിവിലാണെന്ന് ബെംഗളൂരു നോർത്ത് ഈസ്റ്റ് ഡിസിപി ലക്ഷ്മി പ്രസാദ് പറഞ്ഞു.
വൈകീട്ടോടെയാണ് ആക്രമണം നടന്നത്. ഓഫീസിലേക്ക് അതിക്രമിച്ച് കയറിയ ഫെലിക്സ് ഒന്നാം നിലയിലും മൂന്നാം നിലയിലും ജോലി ചെയ്യുകയായിരുന്ന രണ്ട് പേരെയും വാൾ കൊണ്ട് വെട്ടിക്കൊല്ലുകയായിരുന്നു. വെട്ടിയ ശേഷം കത്തി കൊണ്ട് ആക്രമണവും നടത്തി. സംഭവസ്ഥലത്ത് വെച്ച് തന്നെ ഇരുവരും കൊല്ലപ്പെട്ടു.
പ്രതിയായി ഫെലിക്സ് ഈ കമ്പനി വിട്ട് പുതുതായിി ബിസിനസ് ആരംഭിച്ചിരുന്നു. എന്നാൽ ഏറോണിക്സ് കമ്പനി ഫെലിക്സിന്റെ ബിസിനസിൽ ഇടപെട്ടതാണ് ആക്രമണത്തിന് കാരണമെന്നാണ് റിപ്പോർട്ട്. ഫെലിക്സ് ടിക് ടോക്ക് താരമാണ്, ജോക്കർ ഫെലിക്സ് എന്ന പേരിലാണ് ഇയാൾ അറിയപ്പെട്ടിരുന്നത്. ഇയാൾക്ക് വേണ്ടി പോലീസ് അന്വേഷണം ശക്തമാക്കിയിട്ടുണ്ട്.
Discussion about this post