പറവൂര്‍:വിശ്വഹിന്ദു പരിഷത്ത് നടത്തുന്ന ഘര്‍ വാപ്‌സിയെ അനുകൂലിച്ച വെള്ളാപ്പള്ളി നടേശന്‍, മതപരാവര്‍ത്തനത്തെ അനുകൂലിച്ച് വീണ്ടും രംഗത്തെത്തി. ഈഴവരാകാന്‍ തയ്യാറുള്ള അന്യമതസ്ഥരെ എസ്.എന്‍.ഡി.പി യോഗം സ്വീകരിക്കുമെന്ന് വെള്ളാപ്പള്ളി നടേശന്‍ പറഞ്ഞു. കരിമ്പാടം ശാഖയിലെ ശ്രീനാരായണ പ്രാര്‍ത്ഥനാ കുടുംബ യൂണിറ്റുകളുടെ സംയുക്ത വാര്‍ഷികവും അഞ്ച് നവവര്‍ഷ പദ്ധതികളുടെ ഉദ്ഘാടനവും നിര്‍വ്വഹിക്കുകയായിരുന്നു എസ്എന്‍ഡിപി യോഗം ജനറല്‍ സെക്രട്ടറി.
ഘര്‍വാപ്പസിയിലൂടെ തിരിച്ചു വരുന്നവര്‍ ഹിന്ദുമതത്തില്‍ ഏതു ജാതിയില്‍ ഉള്‍പ്പെടുമെന്ന് ചില രാഷ്ട്രിയ നേതാക്കള്‍ക്കും മതനേതാക്കള്‍ക്കും ആശങ്കയുണ്ട്. ആര്‍ക്കും സത്യപ്രസ്താവനയിലൂടെ എസ്.എന്‍.ഡി.പി യോഗത്തില്‍ അംഗത്വം നല്‍കാം. അതിന് നിയമസാധുതയുണ്ട്. മതപരിവര്‍ത്തനം ശാശ്വത പരിഹാരമല്ലെന്ന് ഗുരുദേവന്‍ പറഞ്ഞിട്ടുണ്ട്. യോഗവും മതപരിവര്‍ത്തനത്തിന് എതിരാണ്. മതം മാറിയ ഈഴവരെ തിരിച്ചു കൊണ്ടുവരാന്‍ വര്‍ഷങ്ങളായി എസ്.എന്‍.ഡി.പി യോഗം ശ്രമിക്കുന്നുണ്ടെന്നും വെള്ളാപ്പള്ളി നടേശന്‍ പറഞ്ഞു.
ഹിന്ദുക്കളെ മതം മാറ്റിയതെങ്ങനെയെന്ന് ചരിത്രത്തില്‍ വ്യക്തമാണ്. ഒരു കൂട്ടര്‍ കുത്തിക്കൊന്നും മറ്റൊരു കൂട്ടര്‍ നക്കികൊന്നുമാണ് മതം മാറ്റിയത്. സമുദായത്തിനു അര്‍ഹമായതു കിട്ടുംവരെ ജാതി പറയേണ്ടിവരുമെന്നും വെള്ളാപ്പള്ളി പറഞ്ഞു.
Discussion about this post