അദാനി പൊളിയാൻ കാത്തിരുന്നവർക്ക് തിരിച്ചടി; അദാനി എന്റർപ്രൈസസിൽ 400 മില്യൺ ഡോളർ നിക്ഷേപിച്ച് അബുദാബി കമ്പനി

ന്യൂഡൽഹി : അദാനി എന്റർപ്രൈസസിൽ 400 മില്യൺ അമേരിക്കൻ ഡോളർ നിക്ഷേപിച്ച് അബുദാബി കമ്പനി. അബുദാബി ആസ്ഥാനമാക്കി പ്രവർത്തിക്കുന്ന ഇന്റർനാഷണൽ ഹോൾഡിംഗ് കോ ആണ് നിക്ഷേപം നടത്തുമെന്ന് പ്രസ്താവിച്ചത്. കമ്പനിയുടെ അനുബന്ധ കമ്പനിയായ ഗ്രീൻ ട്രാൻസ്‌മിഷൻ ഇൻവെസ്റ്റ്മെന്റ് ഹോൾഡിംഗ് ആർ.എസ്.സി ലിമിറ്റഡ് എന്ന കമ്പനി വഴിയാണ് നിക്ഷേപം നടത്തുക.

“അദാനി എന്റർപ്രൈസസിന്റെ അടിസ്ഥാന ഘടനയിലും വളർച്ചയിലും ഞങ്ങൾക്ക് വിശ്വാസമുണ്ട്. ദീർഘകാലാടിസ്ഥാനത്തിൽ വലിയൊരു വളർച്ച ഉണ്ടാകുമെന്നും അതുവഴി ഞങ്ങളുടെ ഓഹരിയുടമകൾക്ക് നേട്ടമുണ്ടാകുമെന്നും ഞങ്ങൾ കരുതുന്നു“. ഐ.എച്ച്.സി ചീഫ് എക്സിക്യൂട്ടീവ് ഓഫീസർ ബസർ ഷുഹൈബ് വ്യക്തമാക്കി. അദാനി എന്റർപ്രൈസസിന്റെ എഫ്.പി.ഒയുടെ 16 ശതമാനമാണ് ഐ.എച്ച്.സി കയ്യാളാനൊരുങ്ങുന്നത്.

ഷോർട്ട് സെല്ലിംഗ് സ്ഥാപനമായ ഹിൻഡൻബർഗിന്റെ ദുരൂഹമായ റിസർച്ച് റിപ്പോർട്ടോടെ അദാനി ഓഹരികളുടെ വില ഇടിഞ്ഞിരുന്നു. ആസൂത്രിതമായ റിപ്പോർട്ടിനെതിരെ പരാതി നൽകുമെന്ന് അദാനി ഗ്രൂപ്പ് വ്യക്തമാക്കുകയും ചെയ്തു. ഇതിനിടയിലാണ് വൻ തുക നിക്ഷേപവുമായി ഐ.എച്ച്.സി രംഗത്തെത്തിയത്. അതേസമയം താഴെപ്പോയ അദാനി എന്റർപ്രൈസസ് ഓഹരിവില ഇന്നത്തെ വ്യാപാരത്തിൽ തിരിച്ച് കയറി. 4.2 ശതമാനമാണ് തിരിച്ച് കയറിയത്.

ഹിൻഡൻബർഗ് നടത്തുന്ന ചതി അവരുടെ റിസർച്ച് റിപ്പോർട്ടുകളിൽ കൂടിയാണ്. ഒരു കമ്പനിയെ ടാർജറ്റ് ചെയ്യുന്നു. ആ കമ്പനിയിലെ നിക്ഷേപകർ അപകടത്തിലാണ് എന്നൊരു റിസർച്ച് റിപ്പോർട്ട് ഇറക്കി പരിഭ്രാന്തി സൃഷ്ടിക്കുന്നു. അതിന് പിന്നാലെ ഇവർ നേരിട്ടോ ഇവരുടെ അനേകം പ്രോക്സികൾ വഴിയോ അതേ കമ്പനിയുടെ വൻ തുകയുടെ ഓഹരികൾ വിറ്റിരിക്കും. നിക്ഷേപകർ കൂട്ടമായി പണം പിൻവലിക്കുകയും ഇരയാകുന്ന കമ്പനിയുടെ ഓഹരി മൂല്യം കുത്തനെ ഇടിയുകയും ചെയ്യുന്നു. അതോടെ ഹിൻഡൻബെർഗ് രാവിലെ വിറ്റ ഓഹരികൾ കുറഞ്ഞ വിലയ്ക്ക് വാങ്ങി ലാഭം കൊയ്യുന്നു.