ഉപദേഷ്ടാക്കള്‍ പ്രശസ്തരാകണമെന്നില്ല. ജനബന്ധവും അക്കാദമിക മൂല്യവും വിഷയ വൈദഗ്ധ്യവുമാണ് ഉപദേഷ്ടാക്കളെ നിശ്ചയിക്കുന്നതിന് മാനദണ്ഡമാകേണ്ടത്. അക്കാര്യത്തില്‍ പൊരുത്തക്കേടും വിവാദവും വരുത്തിവെച്ചു. നേട്ടങ്ങള്‍ എടുത്തുകാണിക്കാന്‍ സര്‍ക്കാരിന് കഴിയും. മലയാളം എല്ലാ സ്‌കൂളുകളിലും നിര്‍ബന്ധമാക്കുന്ന ഓര്‍ഡിനന്‍സ്, സെക്രട്ടേറിയറ്റിലും വകുപ്പുകളിലും മലയാളഭാഷ ഉപയോഗിക്കണമെന്ന നിര്‍ദേശം എന്നിവ ശ്രദ്ധേയം. പല സര്‍ക്കാരുകളും മടിച്ചുനിന്ന കാര്യമാണത്. ഏറ്റവും നന്നായി പ്രവര്‍ത്തിക്കുന്നത് വിദ്യാഭ്യാസ വകുപ്പാണെന്ന് തോന്നുന്നു. പൊതുവിദ്യാലയങ്ങളുടെ പ്രവര്‍ത്തന മേന്മ മെച്ചപ്പെടുത്തുന്നത് വഴി സ്വകാര്യ വിദ്യാഭ്യാസം നിരുത്സാഹപ്പെടുത്താനുളള ചില ശ്രമങ്ങളെങ്കിലും നടക്കുന്നു. വീട് ഇല്ലാത്തവര്‍ക്ക് വീട് നല്‍കുന്നതിനുളള നടപടികള്‍, ആര്‍ദ്രം ചികിത്സാ പദ്ധതി, ആരോഗ്യ ഇന്‍ഷ്വറന്‍സ്, ശൗചാലയ നിര്‍മ്മാണം എന്നിവയും എടുത്തുപറയണം. ഗ്രാമപഞ്ചായത്തുകളുടെ പ്രവര്‍ത്തനം മെച്ചപ്പെടുന്നു.
പൊതുമരാമത്തിലും നല്ല പ്രവര്‍ത്തനം നടക്കുന്നു. സര്‍ക്കാര്‍ പരിഹരിച്ചെടുക്കേണ്ടതും സര്‍ക്കാരില്‍ നിന്നും പ്രതീക്ഷിക്കുന്നതുമായ ഒട്ടേറെ കാര്യങ്ങളുണ്ട്. എന്നാല്‍ ഈ സര്‍ക്കാരിനെ വിമര്‍ശനാത്മകമായും ഒപ്പം അനുഭാവപൂര്‍വമായും വിലയിരുത്തകയാണ് വേണ്ടതെന്ന് തോന്നുന്നു. അങ്ങനെ പറയാന്‍ പ്രേരിപ്പിക്കുന്നത് ദേശീയ സാഹചര്യങ്ങളാണ്. പകരം വെക്കാന്‍ മറ്റെന്ത് എന്ന ചോദ്യമാണ് പാര്‍ട്ടി ലൈന്‍ പിന്തുടരാത്ത എന്നെപ്പോലെയുളളയാളുകള്‍ക്ക് മുമ്പിലുളള ചോദ്യം. തെറ്റുകളെ വിമര്‍ശിക്കുകയും ഗുണപരമായതിനെ പിന്തുണക്കുകയും ചെയ്യുമ്പോള്‍ അത് നല്ല നിലക്ക് സ്വീകരിക്കാനും സര്‍ക്കാര്‍ തയ്യാറാകേണ്ടതുണ്ട്.
Discussion about this post